क्यान्सर अस्पताल सञ्चालनमा

कान्तिपुर संवाददाता

ललितपुर — नेपाल क्यान्सर हस्पिटल एन्ड रिसर्च सेन्टरले शनिबारदेखि औपचारिक रूपमा सेवा सुरु गरेको छ । अस्पतालमा शनिबार आयोजित कार्यक्रममा राष्ट्रपति विद्यादेवी भण्डारीले सेन्टरको सेवा औपचारिक सुरुवात गरिन् ।

  • राष्ट्रपति विद्यादेवी भण्डारीद्वारा उद्घाटन
  • २६ रोपनीमा ३० शय्या
  • राजीव गान्धी क्यान्सर हस्पिटलको प्राविधिक सहयोग

नेपाल क्यान्सर हस्पिटल एन्ड रिसर्च सेन्टरले शनिबारदेखि औपचारिक रूपमा सेवा सुरु गरेको छ ।

अस्पतालमा शनिबार आयोजित कार्यक्रममा राष्ट्रपति विद्यादेवी भण्डारीले सेन्टरको सेवा औपचारिक सुरुवात गरिन् । हरिसिद्घिस्थित ५० शय्या क्षमतासहित २६ रोपनीमा रहेको उक्त अस्पताल निजी क्षेत्रबाट सञ्चालित हो । भारत, नयाँदिल्लीस्थित राजीव गान्धी क्यान्सर हस्पिटलको प्राविधिक सहयोगमा स्थापित एवं आबद्घ अस्पतालमा क्यान्सरसम्बन्धी उपचारात्मक र निदानात्मक सबै सेवा प्रदान गरिन्छ । ६ महिनाभित्रै थप एक सय शय्या थप्ने उल्लेख गर्दे अस्पतालका कार्यकारी अध्यक्ष एवं क्यान्सर रोग विशेषज्ञ डा.सुदिप श्रेष्ठले भने, ‘क्यान्सर निको हुन सक्छ भन्ने नारालाई मूल मन्त्र बनाई हामी कार्यरत छौं ।’ राज्यले विशेष सुविधा दिए अस्पतालको उपचार सस्तो गर्न सकिने उल्लेख गर्दै डा. श्रेष्ठले आगामी दिनमा क्यान्सर उपचारका लागि विदेश जानुपर्ने बाध्यता न्यून पार्दै लानेसमेत उल्लेख गरे ।

Yamaha

क्यान्सरसँगको लडाइँ कठिन भए पनि असम्भव भने नरहेको उल्लेख गर्दै स्वास्थ्यमन्त्री गगन थापाले जीवनशैली र आहारबिहारसँग जोडिएको रोगहरूको न्यूनीकरणका लागि व्यक्तिगत प्रयाससमेत अपरिहार्य रहेको बताए । मुलुकमा बर्सेनि १५ हजार नयाँ क्यान्सर बिरामी थपिने गरेको आँकडा छ । विश्वमा बर्सेनि करिब एक करोड ४१ लाख क्यान्सरका नयाँ बिरामी देखिने र ८२ लाखको यही रोगले बर्सेनि मृत्यु हुने अनुमान गरिएको छ ।

प्रकाशित : जेष्ठ २१, २०७४ ०८:३७
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

बोल्न मन छ, तर सक्दैनन्

एसिडपीडित बालक
कान्तिपुर संवाददाता

ललितपुर — उनको पेटमा अन्न नपरेको र मुखबाट एक शब्द पनि ननिस्किएको शनिबार १२ दिन पुग्यो । उनी हुन् गत जेठ ८ मा एसिड आक्रमणमा घाइते भएका प्युटारका ९ वर्षीय करण ब्लोन ।

‘घटनाको दिन साँझ छोरा रुँदै घर आयो । सुरुमा साथीभाइसँग झगडा गरेर रोएको होला भन्ठानेको थिएँ,’ करणकी आमा कान्छीमायाले भनिन्, ‘पानी खान खोजेजस्तो लागेर खुवाउँदा गालामा प्वाल परेको देखें ।’

आत्तिएकी कान्छीमायाले उपचार गर्न करणलाई तत्काल नजिकैको स्वास्थ्य चौकीमा पुर्‍याइन् । उनले त्यतिबेलासम्म एसिड मुखमा परि जलेको भन्ने कुरा सोचेकै थिइनन् । ‘स्वास्थ्यकर्मीले विष खाएको आशंकाले बान्ता हुने औषधि खुवाए,’ कान्छीमायाले भनिन्, ‘सन्चो नभएपछि प्युटारबाट झन्डै २ घण्टा दूध बोक्ने गाडीमा राखेर टीकाभैरवस्थित आनन्दवन अस्पतालमा पुर्‍याएँ ।’

अस्पताल पुगेपछि मात्र उनीहरूले थाहा पाए करणमाथि एसिड आक्रमण भएको भनेर । आनन्दवन अस्पतालमा उपचार हुन नसकेपछि सोही दिन पाटन अस्पतलमा पठाइयो । पाटन अस्पतालले पनि कान्ति बाल अस्पताल रिफर गर्‍यो । कान्तिमा बेड खाली नभएपछि रातारात प्राइभेट क्लिनिकमा पुर्‍याइएको करणका माहिला दाइ किरणले बताए । ‘क्लिनिकले पनि केही गर्न नसकेपछि अन्त्यमा टिचिङ अस्पताल भर्ना गरियो,’ उनले भने । किरणका अनुसार ११ दिनसम्म स्लाइन पानी दिइयो । ‘शुक्रबारदेखि चम्चाले दूध खुवाउने गरेका छौं,’ उनले भने । करणको परिवार वागमती गाउँपालिका ४, सिम्लेबाट गत वर्ष प्युटार बसाइँ सरेको थियो । प्युटार उमावि कक्षा २ मा अध्ययरत करण अहिले हातको इसारामा मात्र आफ्नो कुरा राख्न सक्छन् ।

दाइ किरणका अनुसार गाउँमा दूधमा हुने ‘फयाट’ पत्ता लगाउन एसिड आवश्यक पर्छ । भाइले इसारामा बताएअनुसार एसिड ३ जना मिलेर जबरजस्ती खुवाएका थिए । एकजना प्युटार स्कुलकै कक्षा ५ मा अध्ययनरत छन् । भने बाँकी २ अपरिचित हुन् । घटनाको केही दिनपछि करणका जेठा दाइ मिथुनले महानगरीय प्रहरी वृत्त चापागाउँमा उजुरी दर्ता गरेका छन् । मिथुनले त्यतिबेला भाइलाई माछा मार्न जाऊँ भनी अपरिचित व्यक्तिले मुखमा तेजाब हाली बोल्न नसक्ने बनाएको भनी ठाडो निवेदन दर्ता गराएका थिए । तर, हालसम्म प्रहरीले दोषी पत्ता लगाउन सकेको छैन । महानगरीय प्रहरी वृत्त चापागाउँका डीएसपी श्यामकुमार राईले घाइते बालक बोल्न सक्ने भएपछि कसले गरेको भन्ने कुरा पत्ता लाग्ने बताए ।

प्रकाशित : जेष्ठ २१, २०७४ ०८:३६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT