कोदारी राजमार्गमा पहिरो

अनिश तिवारी

सिन्धुपाल्चोक — बाह्रबिसे नगरपालिकाको गाती शिरिषेमा पहिरो जाँदा कोदारी राजमार्गअन्तर्गत बाह्रबिसे–तातोपानी सडकखण्ड अवरुद्ध भएको छ । शनिबार बेलुकीको वर्षाले कमजोर बनाएको शिरिषेमाथिको पहाड भत्किएर सडक ६ घण्टा थुनिएको हो ।

पहिरोका कारण २६ किमि सडकखण्ड रोकिएपछि बाह्रबिसे तथा राजधानी जान लागेका दर्जनौं यात्रु अलपत्र परेका थिए । ‘बिरामी यात्रुलाई पहिरो कटाउन तत्काल मद्दत गरेका थियौं,’ इलाका प्रहरी कार्यालय, बाह्रबिसेका प्रहरी जवान केदार तिवारीले भने, ‘६ घण्टापछि एक्जाभेटर सहायतामा अवरोध हटायौं तर पहिरो झर्न रोकिएको छैन ।’ निरन्तर झरिरहेको सुक्खा पहिरोले जोखिम बढाएको उनको भनाइ छ । भूकम्पले धाँजा फाटेको पहाड बर्खाले थप कमजोर बनाउने भएकाले कोदारी राजमार्गको यात्रा जोखिमपूर्ण बनेको इलाका प्रहरीले जनाएको छ ।

पहिरोले बाटो थुनिएपछि बिरामी र अन्य यात्रुले सास्ती भोग्नुपर्‍यो । भोटेकोसी गाउँपालिका तातोपानीकी दिलमाया शेर्पाले आफू बाटोमै अलपत्र परेको सुनाइन् । ‘स्वास्थ्य चौकीमा उपचार भएन भनेर धुलिखेल रिफर भएको, पहिरोले बाटोमै अलपत्र परियो,’ उनले भनिन् । वर्षा रोकिए पनि सुक्खा पहिरो गइरहेकाले यात्रु त्रस्त छन् । ठाउँ–ठाउँमा पहिरो जाने क्रम बढेकाले बाह्रबिसेबाट सिरिसेसम्म सवारीसाधन जान सकेका छैनन् ।

शिरिषेबाट बाह्रबिसे बजार पुग्न झन्डै दुई घण्टा लाग्छ । समय धेरै लाग्ने भएकाले सवारीसाधन आउन नमानेको यात्रुको भनाइ छ । गत वर्ष असार २१ मा आएको भोटेकोसी बाढीले कटानमा पारेको बाह्रबिसे तातोपानी सडकखण्ड चिनियाँ निर्माण कम्पनी सीआरसीसीले पुनर्निर्माण गरेको थियो ।

तर, वर्षात र पहिरोले तटीय क्षेत्रमा लगाइएको पर्खाल भत्किँदै गएकाले धेरै स्थानको सडक जीर्ण बन्दै गएको छ । सडक पुनर्निर्माणसँगै नाका खुल्ने व्यग्र प्रतीक्षामा रहेका भोटेकोसीका स्थानीय वर्षा सुरु भएलगत्तै झरिरहने पहिरोले चिन्तित छन् । बर्खा लागेपिच्छे कोदारी राजमार्ग पहिरोले बन्द हुने जम्बुका बासिन्दा बताउँछन् ।

प्रकाशित : असार ५, २०७४ ०८:२४
ADVERTISEMENT
प्रतिक्रिया
पठाउनुहोस्
ADVERTISEMENT

ड्रोनसहित मलेसियन पक्राउ

कान्तिपुर संवाददाता

दोलखा — ड्रोन उडाउने एक जना मलेसियन नागरिकलाई सदरमुकाम चरिकोटबाट प्रहरीले पक्राउ गरेको छ । पानारोमा होटलबाट आइतबार बिहान ड्रोन उडाएपछि युनिसेफमा कार्यरत ५२ वर्षीय मलेसियन टाइ रिङ थ पक्राउ परेका हुन् ।

प्रहरी नायब उपरीक्षक रामेश्वर कार्कीले टाइ रिङसँग रहेको करिब १४ इन्च वर्गाकारको ड्रोन र क्यामेरा अपरेटिङ ल्यापटप बरामद गरेको बताए । ड्रोन उडाउन गृह र नागरिक उड्डयन मन्त्रालयको स्वीकृति चाहिन्छ । निजी प्रयोजनका लागि २ केजी तौलसम्मको ड्रोन ४ सय फिट उचाइ र ५ सय मिटर दूरीसम्म उडाउन स्वीकृति नचाहिने उड्डयन विभागको निर्देशिकामा उल्लेख छ ।

नक्कली परीक्षार्थी पक्राउ
काभ्रे (कास)– अंग्रेजी विषयको परीक्षा दिइरहेका नक्कली परीक्षार्थीलाई प्रहरीले पक्राउ गरेको छ । आइतबार पोखरीनारायणस्थान माविका रोमिश लामाको नाममा परीक्षा दिइरहेका ज्ञानकुञ्ज उच्च माविका अरुण केसीलाई प्रहरीले पक्राउ गरेको हो ।

साथीको नाममा परीक्षा दिइरहेका केसी ज्ञानकुञ्जबाट कक्षा ११ को परीक्षामा नियमित सहभागी छन् । अघिल्लो वर्ष अंग्रेजी विषयमा अनुत्तीर्ण लामाले साथीलाई परीक्षा दिन लगाएको प्रहरीले जनायो ।

प्रवेशपत्र जाँच्ने क्रममा फोटो नमिलेपछि शंका लागेर प्रहरीको जिम्मा लगाएको परीक्षा शाखा प्रमुख रूपेश नेपालले जानकारी दिए । थप अनुसन्धान अघि बढाएको जिल्ला प्रहरी कार्यलयका डीएसपी नवीनराज राईले बताए । केन्द्राध्यक्षसमेत रहेका क्याम्पस प्रमुख सागर तिवारीले लामालाई निष्कासन गर्न राष्ट्रियपरीक्षा बोर्डमा लेखी पठाएको जानकारी दिए ।

प्रकाशित : असार ५, २०७४ ०८:२४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT