ओलीले समय मागेपछि प्रधानन्यायाधीशको टुंगो लागेन

बैठकको सुरुमै प्रधानमन्त्री देउवाले कामु प्रधानन्यायाधीश गोपालप्रसाद पराजुलीको नाम संसदीय सुनुवाईका लागि सिफारिस गर्नुपर्ने प्रस्ताव राखेका थिए । ओलीले भने प्रस्तावित नामहरुप्रति थप अध्ययन आवश्यक भन्दै अर्को दिन निर्णय गर्नुपर्ने बताएका थिए । आगामी बैठक असार १५ गतेलाई तोकिएको छ । 

‘बैठकमा न्यायपरिषदबाट प्राप्त नामहरु पेस भए । थप अध्ययन गर्नुपर्ने कुरा आएपछि निर्णय हुन सकेन,’ बैठकपछि उपसभामुख गंगा यादवले कान्तिपुरसँग भने । प्रधानमन्त्रीको अध्यक्षतामा हुने परिषद बैठकमा सभामुख ओनसरी घर्ती, विपक्षी दलका नेता ओली, उपसभामुख यादव र कानुनमन्त्री गोपालमान श्रेष्ठ सहभागी थिए । प्रधानन्यायाधीशका लागि न्याय परिषदले पराजुलीसहित बरिष्ठताक्रम अनुसार सर्वोच्च अदालतका ६ जना न्यायाधीशको नाम पठाएको थियो । 

स्रोतका अनुसार देउवाले प्रधानन्यायाधीशको नियुक्ति लामो समयसम्म रोकिरहन नहुने भन्दै कामु चलाईरहेका बरिष्ठतम न्यायाधीश पराजुलीको नाम पठाउनुपर्ने बताएका थिए । ‘अदालतको काम रोकिरहनु हुन्न’ देउवाको भनाई थियो । ओलीले भने अहिले कामु प्रधानन्यायाधीशको नेतृत्वले अदालती काम गरिरहेकाले हतार गर्नु नपर्ने बताएका थिए । ‘न्यायाधीशहरुले मुद्दा हेरिरहेकै छन् । अन्य अदालती काम पनि भइरहेकै छन्’, ओलीको भनाई उद्धृत गर्दै सहभागी स्रोतले भन्यो, ‘प्रधानन्यायाधीश छान्ने काम आजको आजै नगरौं । थप अध्ययन गरौं ।’ उनले कामु प्रधानन्यायाधीश पराजुलीको उमेरका सम्बन्धमा पनि विवाद आएकोले त्यसबारे संवैधानिक परिषदले बुझ्नुपर्ने धारणा राखेका थिए । 

मुख्य सचिव डा.सोमलाल सुवेदीले न्यायपरिषदबाट प्राप्त ६ जना न्यायाधीशहरुको वैयक्तिक विवरणसहित फाइल बैठकमा सहभागी सबै सहभागीहरुलाई वितरण गरेका थिए । ओलीको फाइलमा भने ५ जनाको मात्र परेको थियो । बरिष्ठ न्यायाधीश दिपकराज जोशीको छुटेपछि ओलीले प्रश्न उठाएका थिए । तर, पछि भने सबै जनाको विवरण उपलब्ध गराइएको थियो । कामु प्रधानन्यायाधीश पराजुलीको उमेर सम्बन्धमा न्याय परिषदले गरेको निर्णय समेत उक्त फाइलमा राखिएको थियो । नागरिकता र शैक्षिक प्रमाणपत्रमा फरक फरक उमेर भएको विवादलाई परिषदले टुंग्याएको थियो । 

ओलीले भने संवैधानिक परिषदले सुनुवाई समितिमा पठाउदा त्यसबारे प्रष्ट भई फाइल अघि बढाउनुपर्ने जिकिर गरेका थिए । उनले मंगलबार बेलुकी पुन : बैठक बोलाउन प्रस्ताव गरेका थिए । तर, सभामुख घर्तीले आफू ३ दिनका लागि राजधानी बाहिर जानुपर्ने कार्यूसूची बनिसकेको बताएकी थिइन । त्यसपछि जेठ १४ को चुनावमा नेताहरु व्यस्त हुनुपर्ने भएकाले १५ गते बस्ने गरी बैठक टुंगिएको थियो । निवर्तमान प्रधानन्यायाधीश सुशिला कार्कीले गत जेठ २४ गते अवकास पाएपछि पराजुलीले कामु चलाउदै आएका छन् ।