मोरङमा ६३ वर्षीय वृद्धको घाँटी रेटेर हत्या

हत्या कसले गरेको भन्ने खुलेको छैन । घटनास्थलमा कुनै हतियार वा शंकास्पद वस्तु फेला परेको छैन । प्रहरीले हत्यामा संलग्न कसैलाई सोमबार साँझसम्म नियन्त्रणमा लिन सकेको छैन ।

केही गाउँलेले पहिले बोक्सा आरोप लगाएपछि प्रहरी कारबाहीमा परेका समूहको संलग्नता हुन सक्ने आशंका गरेका छन् । इलाका प्रहरी रंगेलीका निरीक्षक सञ्जीवबाबु खड्काका अनुसार बजारबाट फर्कने क्रममा घरभन्दा करिब दुई सय मिटर पश्चिम सडकमा उनको शव फेला परेको थियो । धारिलो हतियारले अनुहारको आधा भाग र घाँटी आधासम्म काटिएको प्रहरीले जनायो । 

७ बजेतिर भएको घटनाको खबर पाएपछि पुगेको प्रहरी टोलीले राति नै शव रंगेली अस्पताल पु¥याएको थियो । पोस्टमार्टम रिपोर्टमा घाँटी र अनुहारमा धारिलो हतियार प्रहार भएपछि रक्तस्रावका कारण मृत्यु भएको उल्लेख छ । घटनास्थलमा उनले बजारबाट ल्याएको पाउरोटी, बिस्कुट र भुजालगायत सामग्री फेला परेको थियो । घरबाट हिँडेको करिब दुई घण्टापछि उनको ‘दुर्घटना भएको’ खबर पाएर छोरा लक्ष्मी घटनास्थल पुगेका थिए । 

‘म पुग्दा रगताम्य भएर लडिरहनुभएको थियो,’ उनले भने, ‘घाँटी र अनुहार धारिलो हतियारले काटिएको थियो, बोलाउँदा चलमल गर्नुभएन, प्राण गइसकेको रहेछ ।’ पहिलेको घटना सबै साम्य भइसकेको उल्लेख गर्दै उनले पछिल्लो समय कसैसँग झगडा र विवाद नभए पनि यस्तो घटना हुँदा आश्चर्य लागेको बताए ।

घटनापछि मृतककी श्रीमती पटक–पटक मुर्च्छित हुने गरेकी छन् । मृतकका सम्धी महावीर राजवंशीलगायत आफन्तले सूक्ष्म अनुसन्धान गरी हत्यामा संलग्नलाई कारबाहीको माग गरेका छन् । प्रहरी टोलीले सोमबार परिवार, छिमेकी र आफन्तसित सोधपुछ गरेको छ । 

‘घटना रहस्यमय छ,’ खड्काले भने, ‘धारिलो हतियार प्रयोग गरी हत्या भएको छ ।’ सोमबार बिहान प्रहरी पुग्दा घरमा परिवारका केही सदस्य मात्र थिए । आसपास क्षेत्रमा करिब ५० घरको बस्ती भए पनि सान्त्वना दिन कोही आएनन् । प्रारम्भिक अनुसन्धानमा पुरानो रिसइबीका कारण हत्या भएको हुन सक्ने खड्काले बताए । छरछिमेकबाट कोही सहानुभूति दिन नआउनु शंकास्पद रहेको उनले जनाए । 

के भएको थियो पहिले ?
स्थानीयका अनुसार २०६९ सालसम्म तत्कालीन दर्बेसा गाविस–८ वनकोलमा कोही बिरामी परे वा मृत्यु भए पहाडचनले ‘तन्त्रमन्त्र’ गरेको गाउँलेले आरोप लगाउने गरेका थिए । लामो समय थलिएर गाउँकै एक वृद्ध र युवकको मृत्यु भएपछि त्यसमा पहाडचनकै ‘तन्त्रमन्त्र’ लाई कारण मान्दै उनलाई दुव्र्यवहार गरेका थिए ।

पटक–पटक बोक्साको आरोप खेप्दै आएका उनलाई त्यसैताका गाउँलेको समूहले मानव मलमूत्र खुवाउने प्रयास गर्दै कुटपिट गरेको एक स्थानीयले बताए । त्यो घटनापछि पहाडचन र उनकी श्रीमती अंशु केही समय बिस्थापित भएका थिए ।

प्रहरीले पीडित परिवारको उजुरीका आधारमा कुटपिटमा संलग्न ७ जनालाई नियन्त्रणमा लिएर अनुसन्धान गरेपछि उनीहरू फर्केका थिए । पछि नियन्त्रणमा रहेका व्यक्तिलाई जनही दुई हजार रुपैयाँ धरौटीमा छाडिएको थियो । 

आरोपितहरू पटक–पटक प्रहरी तारेखमा धाउनुपर्ने भएपछि असहज स्थिति आएको भन्दै गाउँलेको भेलाले आइन्दा कसैले दुव्र्यवहार र आरोप–प्रत्यारोप नगर्ने सहमति गरेको मृतकका दाजु महावीर राजवंशीले बताए । पीडितको घरभन्दा केही पर्तिर उनका भाइ रामप्रसाद बस्दै आएका थिए । दाजुलाई दुव्र्यवहार हुँदा उनैले धेरै पटक गाउँलेलाई सम्झाई–बुझाई गरेका थिए । 

•     ‘बोक्सा’ आरोपमा यसअघि पटक–पटक अपमानित
•     सान्त्वना दिनसमेत आएनन् छरछिमेकी
•     प्रहरी भन्छ– ‘घटना शंकास्पद’