योजना आयोग उपाध्यक्षमा वाग्ले

उपाध्यक्ष नियुक्त भएपछि वाग्लेले मुख्य ५ विषयमा आफ्नो ध्यान केन्द्रित रहने प्रतिक्रिया दिए। ‘सबैभन्दा पहिले त मुलुक संघीयतामा गइसकेपछि आयोगको भूमिका र कार्यक्षेत्रबारे यस अघिदेखि भइरहेको कामलाई पूर्णता दिएर थिंक ट्यांकका रूपमा पुन:संरचना गरिनेछ,’ उनले भने। यसअघि पुन:संरचनाको खाका बनाउने काममा समेत संलग्न वाग्लेले आयोग भने खारेज नहुने बताए।

सन् २०३० सम्म मुलुकलाई मध्यम आय भएको देशमा पुर्‍याउन प्रयत्न गरिने पनि उनले बताए। दिगो विकास लक्ष्य र सन् २०२२ सम्म अति कम विकसित मुलुकबाट माथि उकास्ने काममा पनि संलग्न रहने उनले बताए। संघीय संरचनामा बजेट निर्माणलगायत वित्तीय क्षेत्रमा सहकार्य गर्ने योजना पनि वाग्लेले सुनाए। ‘आर्थिक सुधारका केही कामलाई द्रुत रूपमा अगाडि बढाउनुपर्ने आवश्यकता पनि छ,’ उनले भने।