अष्ट्रेलियामा बेपत्ता युवा खोजिदिन परिवारको दूतावासलाई आग्रह

नारायण खड्का

अष्ट्रेलिया — उच्च शिक्षाका लागि अष्ट्रेलिया आएका सिरहाका एक विद्यार्थी बेपत्ता भएको भन्दै परिवारले अष्ट्रेलियास्थित नेपाली दुतावासलाई खोजीका लागि सहयोग गरिदिन आग्रह गरेको छ ।

करिब १८ बर्षअघि बिद्यार्थी भिषामा अष्ट्रेलिया आएका सिरहा जिल्ला मखनाहा गाविस ५ मा बस्ने प्रभाकर कुमार मंडल करिब १० बर्षदेखि परिवारको सम्पर्कमा नआएको भन्दै परिवारले दुतावासलाई खोजी गरिदिन आग्रह गरेको हो । होटल म्यानेजमेन्टमा ब्याचलर डिग्रीको अध्ययन गर्न भारतको नयाँदिल्ली हुँदै मण्डल अष्ट्रेलिया आएको निवेदनमा उल्लेख गरिएको छ । 

सन २००६ सम्म फोनमा सम्पर्क भए पनि सन २००७ देखि अहिलेसम्म परिवारको सम्पर्कमा नआएको उनका परिवारद्वारा लेखिएको पत्रमा जनाइएको छ । क्यानबेरामा रहेको दुतावासले पनि परिवारको अनुरोधमा मंडलको खोजीकार्यलाई तीब्रता दिएको जनाएको छ । दुतावासका उपनियोग प्रमुख राजेन्द्र पाण्डेले मण्डलको परिवारले उपलब्द्ध गराएको सुचना अनुसार पश्चिम अष्ट्रेलिया र क्युन्सल्याण्ड प्रहरीलाई सहयोगका लागि आग्रह गरिएको जानकारी दिए । पाण्डेले परिवारले उपलब्ध गराएको निवेदनमा मंडलको ठेगाना पश्चिम अष्ट्रेलियाको पर्थ देखिएकाले पर्थ र छिमेकी राज्य क्युन्सल्याण्ड प्रहरीलाई खोजीका लागि आग्रह गरिएको बताए ।

पाण्डेले अष्ट्रेलियास्थित बिदेश बिभागको कन्सुलर शाखामा समेत यसबारेमा जानकारी गराइएको बताए । प्रहरीका साथै सम्बन्धित सबै निकायहरुमा खोजीका लागि आग्रह गरिसकेका कारण चाँडै बेपत्ता भनिएका मण्डलको बारेमा केही जानकारी प्राप्त हुने आशा पाण्डेले गरे ।  साथै दुतावासले अष्ट्रेलियामा रहेका नेपाली समुदायहरुलाई पनि उनको बारेमा केही जानकारी भए दुतावासलाई उपलब्द्ध गराउन आग्रह समेत गरेको छ । 

प्रकाशित : भाद्र १५, २०७४ १०:३७
प्रतिक्रिया
पठाउनुहोस्

समृद्धिको ढोका खुल्यो : प्रधानमन्त्री देउवा

डीआर पन्त

धनगढी — लामो प्रतिक्षा पछि महाकाली नदीमा निर्माण हुने पक्की पुलको शिलान्यास गर्न आइपुगेका प्रधानमन्त्री शेरबहादुर देउवाले पश्चिम नेपालको समृद्धि र विकासको ढोका खुलेको बताएका छन् ।

‘महाकाली नदीमा पुल र दोधारा चाँदनीमा निर्माण हुने सुख्खा बन्दरगाहले पश्चिम नेपालको विकासको ढोका खुलेको छ,’ धनगढी विमानस्थलमा प्रधानमन्त्री देउवाले भने, ‘पश्चिम नेपाल मात्र नभइ देशकै समृद्धिका लागि महत्त्वपूर्ण विकास परियोजना हो ।’ भारतका औद्योगिक सहरसँग सिधा सम्पर्क र सुख्खा वन्दरगाह विकासका लागि कोषेढुंगा सावित हुने प्रधानमन्त्रीले वताए । प्रधानमन्त्री देउवाले भने ‘लामो समयको प्रतिक्षा सकिएको छ अव सुदूरपश्चिमवाट विकास अभियान सुरु भएको छ ।’

नेपाल प्रेस युनियन कैलालीले आयोजना गरेको पत्रकार सम्मेलनमा प्रधानमन्त्री देउवाले सबैलाई निर्वाचनमा होमिन आग्रह समेत गरेका छन् । ‘बाँकी रहेको स्थानीय तह निर्वाचन संगै प्रादेशीक र संसदीय निर्वाचनमा सवैलाइ होमिन आग्रह गर्छु’ संचारकर्मीको जिज्ञासामा प्रधानमन्त्रीले भने, ‘निर्वाचनले राजनैतिक स्थायित्व र संबिधान कार्यान्वयनसंगै समृद्धिको वाटोमा देश अगाडी वढीसकेको छ ।’ समसामयिक राजनैतिक स्थितिका बिषयमा प्रधानमन्त्रीले भने ‘अहिले अरु कुरा छैन् निर्वाचन नै प्रमुख राजनैतिक मुद्दा हो, निर्वाचन पछि देशमा राजनैतिक मुद्दा समाप्त हुन्छन् र देश विकासका मुद्दामा अगाडी बढ्छ ।’

भर्खर सम्पन्न आफ्नो भारत भ्रमणका बिषयमा प्रधानमन्त्रीले टिप्पणी गर्दै भने ‘दुई देश बिचको सम्वन्ध यो भ्रमणले निकै ठूलो उचाइमा पुर्‍याएको छ ।’ भारत भ्रमणका क्रममा सुदूरपश्चिममा ठूलो प्राविधिक शिक्षालय स्थापना हुने , गौरीफण्ट  नाकाको स्तर उन्नती हुने लगायतका बिषयमा महत्त्वपूर्ण सहमति भएको पनि उनले जानकारी दिए । 

प्रधानमन्त्री देउवाले आजै महाकाली नदीमा बन्ने पक्की पुलको शिलन्यान गर्ने कार्यक्रम रहेको छ । ४ लेनको उक्त पुल ३ वर्ष भित्र निर्माण सम्पन्न हुने अधिकारीहरुले बताएका छन् । झण्डै तीन अर्ब लागतमा निर्माण हुने पुलसंगै महाकाली पारी रहेको दोधारा चाँदनी देशसँग जोडिने छ । 

प्रकाशित : भाद्र १५, २०७४ १०:३७
पूरा पढ्नुहोस्
प्रतिक्रिया
पठाउनुहोस्