प्रधानमन्त्री देउवाले गरे पाँचौंपटक मन्त्रीमण्डल विस्तार, राप्रपाबाट ३ मन्त्री र १ राज्यमन्त्रीले साेमबार सपथ लिने

व्यवस्थापिका–संसद्‌मा १८ सांसद रहेको पार्टीले वन तथा भू संरक्षण, उद्योग र विज्ञान तथा प्रविधि मन्त्रालयको जिम्मेवारी प्राप्त गरेकाे छ ।  दीपक बाेहाेरा विज्ञान तथा प्रविधि, विक्रम पाण्डे वन तथा भू संरक्षण, सुनिल थापा उद्याेग तथा रेशम लामा उद्याेग राज्यमन्त्री हुने टुंगाे लागेको प्रधानमन्त्रीका प्रेस संयोजक गोविन्द परियारले जानकारी दिए । उनले सोमबार बिहान ११ बजे मन्त्रिपरिषद् विस्तारको सूचना रहेको जानकारी दिए । सोमबार ३ मन्त्री र १ राज्यमन्त्री थपिएपछि देउवा नेतृत्वको मन्त्रिपरिषद् राज्यमन्त्रीसहित ५४ सदस्यीय पुग्नेछ ।

गत जेठ २३ गते प्रधानमन्त्रीमा निर्वाचित देउवाले २४ जेठमा मन्त्रिमण्डल गठन गरेका थिए भने त्यसपछि २८ गते, असार २, साउन ११ र भदौ ४ गरी चारपटक मन्त्रिपरिषद् विस्तार गरे । सरकारमा अहिले प्रधानमन्त्री सम्बद्ध कांग्रेस, माओवादी केन्द्र, लोकतान्त्रिक फोरमसहितका दलहरु सहभागी छन् । देउवाले इतिहासकै 'जम्बो' मन्त्रिपरिषद् बनाएको भन्दै सर्वत्र आलोचना भइरहेको छ । 

राप्रपाका अध्यक्ष पशुपतिशम्शेर राणाले मुलुकमा राजनीतिक स्थायित्व कायम गर्न तथा आगामी असोज २ गतेको तेस्रो चरणको स्थानीय तह र मंसिरमा हुने प्रादेशिक एवं केन्द्रीय निर्वाचनको कार्यक्रमलाई पूरा गर्ने उद्देश्यले पार्टी सरकारमा सहभागी हुन लागेको बताए । 

राप्रपाबाट वैचारिक असहमति राख्दै गत साउन २२ गते विभाजनका लागि निर्वाचन आयोगमा दल दर्ता गरेको उक्त पार्टीले करिब दुई साता अगाडि दलका रुपमा मान्यता प्राप्त गरेको थियो ।