कांग्रेसले अन्तरघातीविरुद्ध उजुरी माग्यो

कान्तिपुर संवाददाता

काठमाडौं — कांग्रेसले ६ वटा प्रदेशमा स्थानीय तहको निर्वाचनका क्रममा पार्टीका आधिकारिक उम्मेदवारविरुद्ध असहयोग र अन्तर्घात गर्नेहरूको विवरणसहित उजुरी दिन आह्वान गरेको छ ।

केन्द्रीय अनुशासन समितिको बैठकले असोज १० भित्र उजुरी दिन मातहत इकाईलाई आह्वान गरेको हो । बैठकले उजुरीमा आरोपित नेता तथा कार्यकर्तासँग स्पष्टीकरण माग्ने निर्णयसमेत गरेको छ । स्थानीय तहको चुनावमा पार्टीका आधिकारिक उम्मेदवारलाई असहयोग गर्नेलाई कारबाही गर्न उजुरी माग्ने र स्पष्टीकरण सोध्ने प्रक्रिया अघि बढाइएको कांग्रेसले जनाएको छ ।

 

प्रकाशित : भाद्र २८, २०७४ ०७:०९
प्रतिक्रिया
पठाउनुहोस्

समानुपातिक निर्वाचनका लागि ८८ दल

राजेश मिश्र

काठमाडौं — प्रदेश र प्रतिनिधिसभा निर्वाचनमा समानुपातिकतर्फको निर्वाचनमा भाग लिने उद्देश्यले ८८ वटा राजनीतिक दलले निर्वाचन आयोगमा निवेदन दिएका छन् । आयोगले त्यसका लागि निवेदन दिन भदौ २५ देखि २७ सम्म दुई दिन समय दिएको थियो ।

आयोग प्रवक्ता नवराज ढकालले दुई दिनमा निवेदन दिएका दलले मात्रै समानुपातिकतर्फको निर्वाचनमा भाग लिन पाउने बताए । ‘निर्धारित अवधिमा ८८ दलको निवेदन आएको छ । निवेदनउपर छानबिनपछि बुधबार दलहरूको नामावली प्रकाशन गरिनेछ,’ उनले भने, ‘धेरैजसो दलले ७ वटै प्रदेशमा समानुपातिकतर्फ भाग लिने गरी निवेदन दिएको देखिएको छ ।’ आयोगले कुन–कुन प्रदेशमा समानुपातिक निर्वाचनमा भाग लिन चाहेको खुलाएर निवेदन दिन भनेको थियो । प्रदेश र प्रतिनिधिसभा निर्वाचनमा भाग लिने भनेर कुल १ सय २३ राजनीतिक दलमध्ये ९१ दलले भदौ ११ को निर्धारित मितिभित्र आयोगमा निवेदन दिएका थिए ।

त्यसमध्ये मधेस समता पार्टी नेपाल, नेपाल ग्रिन्स र मधेस तराई फोरमले समानुपातिकतर्फको निर्वाचन प्रणालीतर्फका लागि निवेदन दिएका छैनन् । संघीय संसदमा १ सय १० र ७ वटै प्रदेशमा गरी २ सय २० सिट समानुपातिक प्रणालीबाट चुनिनेछन् । प्रतिनिधिसभाको हकमा देशभरबाट राजनीतिक दलले प्राप्त गरेको कुल सदर मतका आधारमा उक्त दलले प्राप्त गर्ने सिट संख्याअनुसार बन्दसूचीमा समावेश गरिएका उम्मेदवारहरूमध्येबाट सांसद चुनिनेछन् । त्यस्तै, प्रदेशसभाको हकमा उक्त प्रदेशभित्र राजनीतिक दलले प्राप्त गरेको कुल सदरमतका आधारमा सांसद चुनिने प्रावधान छ ।

संविधानसभाको २०६४ र २०७० मा भएको दुईवटा निर्वाचनमा उक्त अभ्यास भइसकेको छ । पहिलो संविधानसभामा ५४ र दोस्रोमा १ सय २२ राजनीतिक दलले समानुपातिकतर्फको निर्वाचन प्रणालीमा भाग लिएका थिए । पहिलो पटक हुन लागेको प्रदेशसभा निर्वाचन व्यवस्थापिका संसदको निर्वाचनसँगै गर्न लागिएको छ ।

मंसिर १० र २१ गते दुई चरणमा घोषित निर्वाचनमा एक जना मतदाताले प्रदेशसभातर्फ प्रत्यक्ष र समानुपातिक तथा प्रतिनिधिसभातर्फको प्रत्यक्ष र समानुपातिकका लागि मतदान गर्नेछन् । मतदातालाई सहज पार्न दुवै सभाका लागि छुट्टाछुट्टै मतपत्र र मतपेटिका प्रयोग गरिने आयोगले जनाएको छ । मतपत्रको डिजाइनबारे छलफल भइरहेको प्रवक्ता ढकालले बताए ।

आयोगले आगामी निर्वाचनका लागि समानुपातिकतर्फका उम्मेदवारको बन्दसूची पेस गर्न असोज २९ तथा पहिलो चरणको प्रत्यक्षतर्फको उम्मेदवारी दर्ताका लागि कात्तिक ५ र दोस्रो चरणको निर्वाचनका लागि कात्तिक १६ गते तोकेको छ ।

प्रकाशित : भाद्र २८, २०७४ ०७:०९
पूरा पढ्नुहोस्
प्रतिक्रिया
पठाउनुहोस्