कारबाहीको सिफारिस

थुनुवा मृत्यु प्रकरण
कान्तिपुर संवाददाता

दाङ — वडा प्रहरी कार्यालय लमहीमा थुनुवाको मृत्युको छानबिन गरी प्रहरीले यथार्थ विवरण सार्वजनिक गरेको छ । अनुसन्धान टोलीले प्रहरी नियन्त्रणमा मृत्यु भएका थुनुवालाई बेवारिसे शव फेला परेको भनेर प्रहरीले गलत सूचना दिएको ठहर गरेको छ ।

घटनामा प्रहरी दोषी देखिएको ठहरसहित टोलीले जिम्मेवार प्रहरी अधिकारीलाई विभागीय कारबाहीको सिफारिस गरेको छ ।

घोराही १४, नयाँ बजारका ४० वर्षीय गँगटे भनिने देवबहादुर विकको भदौ १४ मा प्रहरी नियन्त्रणमै मृत्यु भएको थियो । प्रहरीले भने घोराही ३, चौपट्टामा बेवारिसे शव फेला परेको भन्ने गलत सूचना सार्वजनिक गरी अन्त्येष्टिसमेत गरेको थियो । 

गलत सूचना दिने र माथिल्लो तहमा घटनाबारे जानकारी नगराउने जिल्ला प्रहरी प्रमुख एसपी दुर्गा सिंह, वडा प्रहरी कार्यालय लमहीका प्रमुख इन्स्पेक्टर सुरज खड्कासहित मुद्दा फाँटका जिम्मेवार प्रहरीलाई हदैसम्मको विभागीय कारबाही हुने अनुसन्धान प्रमुख एसएसपी दिलीपकुमार चौधरीले बताए । ‘विकको प्रहरी नियन्त्रणमै रहेका बेला मृत्यु भएको देखियो । उसको स्वास्थ्य समस्या रहेछ । अस्पतालले फोक्सोमा समस्या भएर मृत्यु भएको देखाएको छ,’ उनले भने, ‘प्रहरीले बाहिर गलत सूचना दिएकाले जिम्मेवार अधिकारीलाई हदैसम्मको विभागीय कारबाही हुन्छ ।’

राप्ती उपक्षेत्रीय अस्पतालको पोस्टमार्टम रिपोर्टमा फोक्सोमा पिप जमेर मृत्यु भएको खुलाइएको चौधरीले जनाए । विकलाई भदौ १३ मा प्रहरीले पक्राउ गरी लमही अस्पतालमा चेकजाँच गर्न लगेको थियो । भदौ १४ मा पुन: चेकजाँच गर्न लैजाँदा उनको मृत्यु भइसकेको थियो । त्यसपछि जिल्ला प्रहरी कार्यालयले फेसबुक पेजमा मृतकको फोटो राखी बेवारिसे शव भनी विज्ञप्ति जारी गरेको थियो ।

 

प्रकाशित : भाद्र २८, २०७४ ०८:०१
प्रतिक्रिया
पठाउनुहोस्

दलित परिवारमाथि आक्रमण

अन्तरजातीय विवाह
कान्तिपुर संवाददाता

सुर्खेत — अन्तरजातीय विवाह गरेकै कारण यहाँका एक दलित परिवारमाथि आक्रमण भएको छ । बराहताल गाउँपालिका ८, दमारका भक्तबहादुर, अमृता विक दम्पतीमाथि सोमबार मध्यरातमा कुटपिट गरिएको हो । कुटपिटबाट दुवै घाइते भएका छन् ।


घाइते दम्पतीको मध्यपश्चिमाञ्चल क्षेत्रीय अस्पताल कालागाउँमा उपचार भइरहेको छ । उनीहरूको टाउको, छाती र हातमा चोट छ । छोरा बलबहादुरले शाही थरकी छोरी विवाह गरी ल्याएकै कारण आफूहरूमाथि कुटपिट भएको भक्तबहादुरले सुनाए । ‘मध्यरातमा आएर निर्दोष बाबुआमामाथि कुटपिट भयो,’ छोरी कृष्णाले घटनाबारे भनिन्, ‘माथिल्लो तलाबाट उहाँहरूलाई तल खसालियो । अनि प्रतिकार गर्न खोज्दा उल्टै कुटपिट भयो ।’ बलबहादुरले गत जेठमा दैलेख दुल्लु नगरपालिका छडुङकी रमा शाहीलाई विवाह गरी भित्र्याएका थिए । माइती पक्षकाले आइतबार घरमा आएर ‘डुम’ सँग बिहे गर्ने भन्दै रमालाई फिर्ता लिएको कृष्णाले बताइन् । भक्तबहादुरको अवस्था अज्ञात छ । छोरालाई अपहरण गरी लगेको उनीहरूको आरोप छ । भागेर अन्तरजातीय बिहे गरेकाले दुवैजना माइती पक्षले छोरी लैजाने त्रासले लुक्दै आएका थिए । भक्तबहादुर र रमा केही दिनअघि घर आइपुगेका थिए । घर आएको थाहा पाएपछि खोस्ने उद्देश्यले आइतबार केटी पक्षका आफन्तहरू आएको बताइएको छ । घटनापछि दलित परिवार त्रसित छ । अमृता छोराको चिन्ताले बेहोस छिन् ।
प्रहरीले घटनास्थल मुचुल्का तयार पारेको छ । घटनाको अनुसन्धान भइरहेको र भक्तबहादुरको खोजी तीव्र पारिएको जिल्ला प्रहरी कार्यालयले जनाएको छ । उता, रमाकी दिदी विष्णाकुमारी शाहीले बहिनी फिर्ता लिएको स्विकारेकी छन् । रमाको अछाममा विवाह भएको र ४ वर्षको छोरा भएकाले फिर्ता ल्याएको उनले बताइन् ।
‘जातपातको कुरा गरेर फिर्ता ल्याएको होइन । ऊ विवाहित हो । सम्बन्धविच्छेद पनि भएको छैन यस्तो अवस्थामा हामीले सम्झाइबुझाई फिर्ता ल्याएका हौं,’ उनले भनिन्, ‘उता केटाले पनि तीन जना केटीसँग बिहे गरिसकेको रहेछ ।’ केटाका बाबुआमालाई कुटपिट त के हातले समेत नछोएको उनले दाबी गरिन् ।

प्रकाशित : भाद्र २८, २०७४ ०८:०१
पूरा पढ्नुहोस्
प्रतिक्रिया
पठाउनुहोस्