अज्ञात समूहद्वारा कंक्रिट उद्योगमा आगजनी

रवीन्द्र उप्रेती

बर्दिवास(महोत्तरी) — अज्ञात समूहले यहाँको एक कंक्रिट उद्योगमा बुधबार राति आगजनी गरेको छ । मध्य राततिर आएको समूहले बर्दिवास नगरपालिका-२ स्थित हङकङ डाडाँमा सञ्चालित सोनामाई कंक्रिट उद्योगको भ्याकुम लोडरमा आगो लगाएको प्रहरीले जनाएको छ ।

उद्योग सञ्चालक प्रदीप खड्काकाअनुसार आगजनीबाट ६० लाखबढी मूल्यको क्षति पुगेको छ । सुरक्षा दृष्टिले अति संवेदनशील बर्दिवासमा निर्वाचनको संघारमा आएर गराईएको आगजनीलाई अर्थपूर्ण र सुरक्षा चुनौतीको रुपमा हेरिएको छ ।

उद्योगमा कार्यरत १० जना कामदार क्रसर परिसरकै क्वाटरमा आराम गर्न गएको मौका पारि राति डेढ बजेतिर पेट्रोल छर्केर आगो लगाएका उद्योगका स्टाफ दामोदर भण्डारीले जनाए । कामदारले आगो दन्किएपछि मात्र थाहा पाएका थिए । डिजल ट्यांकीमा नै आगो सल्किएकोले उनीहरुले प्रयास गर्दा पनि आगो नियन्त्रणमा लिन नसकिएको जनाए । उद्योगका म्यानेजर रामकुमार भुजेलकाअनुसार ट्यांकीमा १ सय ३० लिटर जति डिजेल रहेको बताए ।

घटनालगत्तै पुगेको प्रहरीको प्रयास लेसमेत आगो नियन्त्रण हुन सकेन र पूर्ण क्षति भएको भुजेलले जनाए । आगलागी नियन्त्रण हुन नसकदा २ महिनाअघि मात्र खरिद गरिएको २ घनमिटर क्षमताको भ्याकुम लोडरलगाएतका सामान जलेर नष्ट भएको छ ।

बर्दिवासमा हाल ८ क्रसर सञ्चालनममा छन् । स्थानीय तह निर्वाचनको घोषणा भएसँगै केही समूहले ५ देखि १० लाखसम्म रकमै किटेर चन्दा माग गर्दै आएको र मागेबमोजिम दिन असमर्थता जनाएपछि कारबाही स्वरुप आगजनी गरिएको जनाइएको छ ।

बर्दिवास प्रहरीका डिएसपी प्रवीण पोखरेलले घटनास्थलबाट बरामद सबुत प्रमाणको आधारमा आगजनीमा संलग्नको खोजतलास सुरु गरिएको जनाए । पोखरेलकाअुसार वरामद प्रमाणले घटना अनुसन्धानमा सहयोग पुगेको छ । अघिल्ला निर्वाचनका बेलासमेत उक्त क्रसरमा पटक पटक विस्फोट लगाएत भौतिक सामानमा क्षति पुर्‍याइएकाले यसको पनि सघन अनुसन्धान थालिएको डिएसपी पौडेलले जनाए ।

‘घटना श्रृङखलावद्धरुपमा घटदै आएको पाइएको छ,’ पौडेलले भने, ‘यसको कारण पनि पइल्याउने प्रयास थालेका छौं ।’

प्रकाशित : भाद्र २९, २०७४ १२:३३
ADVERTISEMENT
प्रतिक्रिया
पठाउनुहोस्
ADVERTISEMENT

रामबहादुर दाहालले जिते शारीरिक सुगठन प्रतियोगिताको उपाधि

प्रथम नेपाल च्याम्पियन राष्ट्रिय खुल्ला प्रतियोगिता
कान्तिपुर संवाददाता

धरान — झापाका रामबहादुर दाहाल धरानमा आयोजित प्रथम नेपाल च्याम्पियन राष्ट्रिय खुल्ला शारीरिक सुगठन प्रतियोगितामा आकर्षक शरीरका धनी ठहरिए । उनले प्रथम नेपाल च्याम्पियनको उपाधि हात पार्दै नगद राशी १ लाख सहित ट्रफि, व्यानेट र एकथान जगर मेसिन प्राप्त गरे ।

 
गतवर्षको मिस्टर नेपालको उपाधि जितिसकेका उनले ७० केजी तौल समूहबाट प्रथम हुदै अलओभर राउण्डमा २० जनालाई पछि पार्दै उपाधि जितेका हुन् । उनले उपाधि जितेपछि भने, ‘मेरो लक्ष क्रमस पुरा हुँदै गएको छ । युवा पुस्ता शारीरिक सुगठन तर्फ आकर्षित हुन थालेकाले उनीहरुका लागि प्रेरणाको स्रोत बन्न र शारीरिक सुगठनको विकासमा ध्यान दिने छु ।’
 
धरानको सभागृहमा बुधबार अबेर रातिसम्म भएको प्रतियोगितामा आयोजक एलाइनेट जिमका  खेलाडी रमेश कार्की ६५ केजी तौल समूहबाट अलओभर राउण्डमा फर्स्ट रनर अप भए । उनले नगद ५० हजार रुपैयाँमा चित्त बुझाए । सोही तौलसमूहबाट आएका एआरओ जिमका विकास धिमाल सेकेण्ड रनरअपमात्र भए । उनले नगद ४० हजार रुपैयाँ हात पारे । बुटवलबाट ५५ केजी तौल समूहबाट सहभागी सुनिल आले थर्ड रनर अप हुँदै मस्ट इम्प्रुभर टाइटलको ५ हजार पुरस्कार सहित नगद ३५ हजार रुपैयाँ हात पारे । 
 
प्रतियोगितामा बेस्ट पोजरको टाइटल मनिकुमार राई, मोस्ट मस्कुलरको टाइटटल सुकदेव कार्की घोषित भए । उनीहरुले जनही नगद ५ हजार प्राप्त गरे । झापा, मोरङ, सुनसरी, राजविराज, काठमाडौं, पोखरालगायतका जिम क्लवबाट सहभागी मध्ये विजेताहरुलाई राष्ट्रिय खेलकुद परिषदका सदस्य सचिव केशवकुमार विष्ट, आयोजक एलाइनेट जिमका अध्यक्ष विक्रम लिम्बुले ट्रफी तथा नगद र प्रमाणपत्र वितरण गरेका थिए ।
 
उक्त अवसरमा विभिन्न खेलकुद क्षेत्रमा योगदान दिएका अग्रजहरुलाई सम्मान र अभिनन्दन समेत गरिएको थियो । राखेपका सदस्य सचिव विष्टलाई अभिनदन गरिएको थियो । शारीरिक सुगठनका तर्फबाट राष्ट्रिय रेफ्री राजभगत प्रधानाङ्ग, फुटवल तर्फ एन्फाका उपाध्यक्ष किशोर राई, व्यवयासीय तर्फ डम्बर तामाङ र राजेन्द्र राउतलाई सम्मान पत्र प्रदान गरिएको थियो ।

प्रकाशित : भाद्र २९, २०७४ १२:३३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT