रामप्रित यादबलाई संरक्षण पुरस्कार
काठमाडौं — एघारौं राष्ट्रिय संरक्षण दिवसका अवसरमा शनिवार आयोजित कार्यक्रममा वनमन्त्री बिक्रम पाण्डेले एक लाख ५१ हजार रुपैयाँ र सम्मान पत्र यादबलाई हस्तान्तरण गरे । यो पुरस्कार पाउने उनी चौथो व्यक्ति हुन् ।
सरकारले यो वर्षको संरक्षण पुरस्कार वरिष्ठ संरक्षणकर्मी रामप्रित यादबलाई दिएको छ ।
प्राकृतिक सम्पदाको संरक्षण, सम्वद्र्धन, वन, वनस्पति, जीवजन्तु एवं जैविक विविधताको संरक्षण तथा अनुसन्धानमा कम्तिमा १० वर्ष योगदान पुर्याएका व्यक्तिमध्येबाट १ जनालाई यो पुरस्कार दिने गरिएको छ ।
विक्रम सम्वत् १९९९ सालको पुस ८ मा सिरहमा जन्मिएका यादबले २९ वर्ष वन मन्त्रालय मातहत रहेर विभिन्न निकुञ्जमा काम गरेका थिए । उनी २०५६ सालमा चितवन निकुञ्जको प्रमुख संरक्षण अधिकृतबाट २९ वर्षे सरकारी सेवाबाट निवृत्त भएका थिए ।
७२ वर्षीय यादब सेवा निवृत्तपछि पनि जैविक विविधता संरक्षणमा अहोरात्र लागि परेका छन् । विश्वमै दुर्लभ घडियाल गोहीलाई संरक्षण गर्ने उद्देश्यले २०३५ सालमा चितवन निकुञ्जको कसरामा स्थापना गरि प्राकृतिक रुपमा रहेका घडियालका अण्डा संकलन गर्ने, बच्चा उत्पादन गरी पुन: प्राकृतिक वासस्थानमा नै छाड्ने कार्यमा यादबको अग्रही भूमिका थियो ।
प्रकाशित : आश्विन ७, २०७४ १६:३५