अनुगमन गर्नेलाई कारबाहीको अधिकार नहुँदा कालोबजारी गर्नेले उन्मुक्ति पाउँछन् : मन्त्री मण्डल

देवनारायण साह

मोरङ — आपुर्तिमन्त्री शिवकुमार मण्डलले अनुगमन गर्नेलाई कारबाहीको अधिकार नहुँदा कालोबजारी गर्नेले उन्मुक्ति पाउने गरेको बताएका छन् ।

प्रेस सेन्टर मोरङले मंगलबार विराटनगरमा गरेको पत्रकार सम्मेलनमा मन्त्री मण्डलले अनुगमन गर्ने क्रममा कालोबजारी समात्नेलाई कारबाही गर्ने कानुनको अभावमा दोषीमाथि कारबाही हुन नसकिरहेको बताएका हुन् । ‘५ वर्षमा १७ हजार पटक बजार अनुगमन भएको छ तर कारबाही गर्ने अधिकार अनुगमन गर्ने निकायलाई नभएकोले कारबाही भएको तथ्यांक भेट्दैन,’ उनले भने, ‘अहिले पनि देशभरि नै दैनिक उपभोग्य सामग्रीलगायत पेट्रोलियम पदार्थमा मिसाबट रहेको छ तर कानुन अभावमा कारबाही नहुँदा ब्यापक मिसाबट र कालोबजारी दिन प्रतिदिन फष्टाउँदै गएको छ ।’ 

कालोबजारी गर्नेलाई कारबाही गर्ने अधिकार स्थानीय प्रशासनको रहेको र उनले आफ्नो मन्त्रालयलाई कालोबजारी गर्ने पसललाई ९० दिन बन्द गर्ने अधिकार मात्रै रहेको उनले प्रस्ट पारे । ‘दबाबका बीच कानुनी प्रक्रियामा अहिले काठमाडौंस्थित दरबारमार्गको पसलहरुको सटर खोलिएको छ तर पसलेहरुलाई अहिलेसम्म गरेको कालोबजारीको सजाय भोग्ने र अब उपरान्त त्यस्तो कार्य नगर्ने भनी कागज गराएर मात्रै सटर खोलिएको छ,’ उनले भने, ‘अहिले कानुन मन्त्रालयमा अनुगमन गर्ने स्थानमा नै कारबाही गर्नेलगायत अधिकार भए कानुन निमार्णको मस्यौदा भइरहेको र त्यो कानुन आइसकेपछि कुनै मिसावट गर्ने र कालोबजारी गर्नेले उन्मुक्ति पाउँदैन ।’ 

Yamaha

अहिले प्रविधि, प्राविधिक र कानुनको अभावमा अनुगमन भएपनि दोषी उन्मुक्ति पाइरहेको उनले सुनाए । बजार अनुगमनमा राजस्व विभागले सहयोग नगरेकोले नै अनुगमन प्रभावकारी नभएको उनको गुनासो छ ।

आयल निगमका महाप्रबन्धक गोपाल खड्कालाई अहिले पदबाट मात्रै मुक्त गरिएको छ, उनलाई आर्थिक अनियमितताबाट मुक्ती नपाएको मन्त्री मण्डल बताउँछन् । उनले अख्तियार दुरुपयोग अनुसन्धान आयोग र अदालतले खड्कालाई कारबाही गर्नेमा आफू ढुक्क रहेको बताए ।
 
उनले सात वटै प्रदेशमा ९० दिन पेट्रोलियम पदार्थको स्टोर गर्ने योजना खडकाको विवादले सुस्त भएकोले अब निर्वाचन आयोगको सहमति त्यसलाई तीव्रता दिने बताए । 

उनले फरक प्रसंगमा विराटनगरलाई १ नम्बर प्रदेशको राजधानी बन्न नदिन कार्यवाहक प्रधानमन्त्री एवं नेपाल लोकतान्त्रिक फोरमका अध्यक्ष विजय गच्छदार र प्रमुख प्रतिपक्षी दल एमालेका अध्यक्ष खड्गप्रसाद ओलीले षड्यन्त्र गरिरहेको बताए । उनले सत्ताधारी पार्टी र प्रमुख प्रतिपक्षका दलका अध्यक्षले १ नम्बर प्रदेशको राजधानी इटहरीलाई बनाउने भन्न थालेकोले विराटनगरवासीलाई पनि एक भएर पहल थाल्न आवश्यक भएको सुनाए ।

भोगौलिक, प्रशासनिक निकायलगायतको संरचनागत हिसाबले पनि १ नम्बर प्रदेशको राजधानी बनाउन विराटनगरको विकल्प नभएको उनी बताउँछन् । 
मन्त्री मण्डलले प्रतिनिधिसभा निर्वाचनमा आफूले मोरङको क्षेत्र नम्बर ५ बाट लड्ने तयारी थालेको बताए । 

Esewa Pasal

प्रकाशित : आश्विन १०, २०७४ १३:०७
ADVERTISEMENT
प्रतिक्रिया
पठाउनुहोस्

घर फर्किंदै परदेशी

कान्तिपुर संवाददाता

स्याङ्जा — दसैंं सुरु भएसँगै वैदेशिक रोजगारमा गएकाहरू घर फर्किने क्रम बढेको छ । बैदेसिक रोजगारीका लागि डेनमार्क पुगेका पुतलीबजार नगरपालिका ठाडो लाइनका प्रकाश ढकाल पनि लामो समयपछि घर फर्किए ।

‘दसैंमा घर जाउँला भन्दा–भन्दै के मिल्दैन के,’ उनले भने, ‘ठूलो रहरले अहिले घर फर्किएको छु ।’ दुई सन्तान, श्रीमतीसहित आएका उनी तिहारपछिमात्रै फर्किने बताउँछन् । ‘कान्छो छोरा जन्मिएदेखि पहिलोपटक नेपालको भूमि टेक्यो,’ उनले दोहोर्‍याए, ‘ममात्र एक्लै नेपाल आए पनि चाडपर्व मनाउन पाएको थिइनँ । कहिलेकाहीं त दसैंको मुखमा विदेश फर्किनुपथ्र्यो ।’

ढकालजस्तै पढाइसँगै रोजगारी गर्न जापान पुगेका वालिङका विज्ञान क्षेत्री पनि चार वर्ष पछि दसैं मनाउन घर फर्किएका छन् । ‘गएपछि आउने भन्ने यतिकै हुने रहेछ,’ उनले भने, ‘घर जाने भनेपछि दसैं नै पार्न मन लाग्ने । चार वर्षमा घर आउँदा दसैं मनाउने उद्देश्यले नै आएको हुँ ।’ एक महिनाको छुट्टी लिएर आएको बताउने उनी दसैं, तिहार मनाएर मात्र फर्किने बताए । ‘पोहोर, परार आउने रहर हो,’ उनले पुन: भने, ‘देशको परिस्थिति राम्रो भएन । कहिले भूकम्पको त्रास कहिले नाकाबन्दीको ।

त्यसकारण पनि आउन सकिएन । अहिले मनमा पीर नलिई घर आउन पाइएको छ ।’ उनीजस्ता कयौं युवाहरू यति बेला दसैं मनाउन घर आउनेहरूको ठूलो जमात छ । 

अघि पछि घर आउन नपाएकामा खासै दु:ख नलाग्ने उनलाई तर चाडबाडको समयमा भने घरको याद निकै आउने र नरमाइलो लाग्ने गरेकामा यो वर्ष भने घर परिवार, साथीसंगीसँग बसी रमाइलो गरी चाडपर्व मनाउने योजना रहेको बताउँछन् । पुतलीबजार नगरपालिका निवासी गणेश सुनार पनि ६ वर्षको अन्तरालमा दसैं मनाउनकै लागि घर फर्किएका छन् । ‘विदेश भन्ने कुरा रहरभन्दा पनि बाध्यता हो,’ उनले भने, ‘आर्थिक अभावले गर्दा के परिवार, के चाडपर्व । कसरी पैसा कमाउने भन्नेतिरै ध्यान हुन्छ ।’ दिनरात काममा व्यस्त भएपछि घर आउने समय पनि नपुग्ने उनले बताए । उनले पनि यस वर्षको दसैं, तिहार परिवार र साथीभाइकै साथ रमाइलो गरी मनाउने बताए । 

विदेश भएका र रोजगारीको सिलसिलामा जिल्ला बाहिर भएकाहरू गाउँ फर्किने क्रम बढ्दै गएपछि दसैंको छुट्टै रौनक बढेको पुतलीबजारका कमल सुनार बताउँछन् ।

प्रकाशित : आश्विन १०, २०७४ १२:५८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT