कर्मचारीको अन्योल : मन्त्रीलाई बिदा गर्ने कि नगर्ने ?

चुनावी तालमेलका लागि गठबन्धन गरेका हौं, समर्थन फिर्ता लिएका छैनौं : महरा
चन्द्रशेखर अधिकारी

काठमाडौं — मंगलबार माओवादीले सरकार छाड्ने/नछाड्ने संशयबीच परराष्ट्र मन्त्रालयमा आयोजित पत्रकार सम्मेलनमा उपप्रधान तथा परराष्ट्रमन्त्री कृष्णबहादुर महराले आफू सरकारबाट निस्किन पार्टीको निर्णय पर्खिरहेको बताए ।

संयुक्त राष्ट्रसंघको मानव अधिकार परिषद्मा सर्वाधिक मत ल्याएर नेपाल विजयी भएको जानकारी गराउन आयोजित पत्रकार सम्मेलनमा महराले आफ्नो पार्टीले सरकारलाई दिएको समर्थन फिर्ता नलिएको बताउँदै वामपन्थी एकताको बचाउ गरे । उनले छोटो समय परराष्ट्रमन्त्रीका रूपमा रहँदा आफूलाई सहयोग गर्ने सबैलाई धन्यवाद पनि दिए । पत्रकार सम्मेलनको केही घण्टामा नै प्रधानमन्त्री शेरबहादुर देउवाले मन्त्रिपरिषद् पुनर्गठन गरे र महरा बिना विभागीय मन्त्री बनाइए ।

माओवादीभित्र सरकार र प्रतिपक्ष दुवैमा खुट्टा राखेर अघि बढ्न नहुने मत राख्दै आएका महराले मंगलबार पनि प्रधानमन्त्री देउवासँग कुराकानी गरेका थिए । त्यसो त देउवासँग राम्रो सम्बन्ध भएका माओवादी नेता मानिने महरा सोमबारदेखि नै मन्त्रालय आउन छाडिसकेका थिए । मंगलबार पनि मन्त्रालय नआउने भन्दै उनले राष्ट्रसंघको विजयबारे पत्रकार सम्मेलन गरी जानकारी गराउन सचिव र सहसचिवलाई निर्देशन दिएका थिए । तर पार्टी सरकारबाट बाहिरिने भनिएपछि त्यसैबारे जानकारी दिन उनी मन्त्रालय आएको परराष्ट्र अधिकारीहरूले बताए ।

अधिकारीहरूका अनुसार सरकारमा माओवादीको नेतृत्व गरिरहेका महरा आफ्नो पार्टी सरकारबाट बाहिरिएको घोषणा गर्ने तयारीसाथ पत्रकार सम्मेलनमा आएका थिए । तर, उनी आइनपुग्दै पार्टीले सरकारबाट फिर्ता नहुने निर्णय लियो ।

उनले आफ्नो पार्टीको ध्यान समयमा निर्वाचन होस् भन्ने रहेको बताए । बरु सरकारको एक घटक माओवादीलाई थाहा नदिई मन्त्री थपिनुलाई आफ्नो पार्टीले गम्भीर रूपमा लिएको बताए ।

संसद नै नभएको अवस्थामा कुनै दलले सरकारलाई समर्थन गर्नु र नगर्नुको कुनै अर्थ नभए पनि उनले पुराना सहमतिअनुसार नै समर्थनमै रहेको स्पष्ट पारे । महराले प्रधानमन्त्री देउवाको कदमको कुनै आलोचना नगरी भने, ‘हामीले चुनावी तालमेल गरेका हौं । सरकारबाट फिर्ता हुन होइन । यो विषय गठबन्धनले पनि सोचेको हुनुपर्छ ।’

महराले कूटनीतिक सम्बन्ध सुदृढ बनाउनेदेखि अन्तर्राष्ट्रिय मञ्चमा सहभागी हुँदा प्रधानमन्त्रीको साथ र समर्थन पाएको भन्दै देउवाको प्रशंसा गरे ।

दुवै छिमेकी मुलुकसँग आफ्नो कार्यकालमा सम्बन्ध सुदृढ भएको दाबी उनले गरे । पत्रकार सम्मेलन सकेर महरा मन्त्रालय नबसी फर्किए । परराष्ट्र अधिकारीहरू भने महरालाई बिदाइ गर्ने कि नगर्ने अन्योलमा थिए । महराले कर्मचारीहरूलाई धन्यवाद दिएर बिदा भए पनि यही अन्योलका कारण कर्मचारीहरूले उनको बिदाइ गरेनन् ।

प्रकाशित : आश्विन ३१, २०७४ १९:२५
ADVERTISEMENT
प्रतिक्रिया
पठाउनुहोस्
ADVERTISEMENT

कम्युनिस्ट अधिनायकवाद ल्याउने प्रयत्न हुँदै छ : देउवा

कम्युनिस्टहरू मौसमअनुसार चोला बदल्छन् : पौडेल
कान्तिपुर संवाददाता

काठमाडौं — प्रधानमन्त्री एवं कांग्रेस सभापति शेरबहादुर देउवाले कांग्रेसलाई समाप्त पार्ने उद्देश्यसाथ बाम गठबन्धन निर्माण भएको बताउँदै त्यसविरुद्ध लोकतन्त्रवादीहरू एकजुट हुन आवश्यक रहेको बताएका छन् ।

नेविसंघले मंगलबार आयोजना गरेको राष्ट्रिय रणनीतिक प्रशिक्षण कार्यक्रममा देउवाले ‘कम्युनिस्ट अधिनायकवाद’ विरुद्ध एकजुट भएर सामना गर्न विद्यार्थी कार्यकर्ताहरूलाई आग्रह गरे । ‘कांग्रेसलाई सिध्याउन कम्युनिस्ट गठबन्धनको निर्माण भएको हो ।

कांग्रेस कमजोर बनाएर एकदलीय अधिनायकवाद स्थापना गरी सर्वसत्तावाद लाद्ने प्रपञ्चविरुद्ध एकजुट भएर भिड्नुपर्छ,’ देउवाले भने, ‘यो सामान्य घटना होइन । यसलाई गम्भीर रूपमा लिएर जनतालाई बुझाउने काम गरौं ।’

देशभरबाट प्रशिक्षण कार्यक्रममा आएका नेविसंघका विद्यार्थीलाई देउवाले अहिलेको चुनौती सामना गर्न जुझारु भएर भिड्नसमेत निर्देशन दिए । १० वर्षभित्र कम्युनिस्ट शासन व्यवस्था ल्याउने उद्घोष गरेर बनेको गठबन्धनले लोकतन्त्रवादीलाई झस्काएको भन्दै वरिष्ठ नेता रामचन्द्र पौडेलले नेपालका कम्युनिस्टहरू अवसरवादी सिद्धान्तको आडमा हुर्किएको बताए । ‘कम्युनिस्टहरू भनेका अवसरवादी चरित्र भएका तत्त्व हुन् । सिद्धान्तको कुनै टुंगो छैन ।

निर्दलको पक्षमा लहर आउँदा त्यसकै पक्षमा कम्युनिस्टहरू गए, जातिवाद, क्षेत्रीयतावादको लहर आउँदा त्यतै गए,’ पौडेलले भने, ‘कम्युनिस्टहरू मौसमअनुसार चोला बदल्छन् ।’ उनले कम्युनिस्टहरूले चोला बदलेकै कारण २००७ सालको क्रान्तिले ल्याएको प्रजातान्त्रिक व्यवस्थाको हत्या भएको बताए ।

महामन्त्री शशांक कोइरालाले बीपी कोइरालाले १८ वर्षसम्म कम्युनिस्ट नहुनेलाई हृदय नभएको र २५ वर्षसम्म पनि कम्युनिस्ट भएकालाई दिमाख नभएको भन्ने गरेको स्मरण गर्दै भने, ‘विश्वबाट हराइसकेको कम्युनिस्ट व्यवस्था आउँछ भन्नु त्यस्तै दिमाख नभएकाहरूको उपज मात्रै हो ।’ उनले लोकतन्त्रवादीहरूलाई कमजोर बनाउन भएको कम्युनिस्ट गठबन्धनविरुद्ध सिंगो पार्टी एक भएर अघि बढ्नुपर्ने अवस्था आएको बताए ।

प्रशिक्षणमा चुनावका बेला जनतामाझ कस्ताकस्ता मुद्दा लिएर जाने र विपक्षी गठबन्धनसँग वैचारिक मुद्दामा कसरी प्रतिरोध गर्ने भन्ने विषयमा कांग्रेस केन्द्रीय सदस्य महेश आचार्य र धनराज गुरुङले प्रशिक्षण दिएका थिए । नेविसंघ अध्यक्ष नैनसिंह महरले देशव्यापी रूपमै नेविसंघलाई चुनावी अभियानमा खटाउन रणनीतिक प्रशिक्षण आयोजना गर्नुपरेको बताए ।

उनले विपक्षी गठबन्धनले उठाएका मुद्दाहरूको खण्डन गर्दै चुनावी मुद्दा लिएर जिल्ला–जिल्ला जाने बताए । कार्यक्रममा केन्द्रीय सदस्य प्रकाशरण शरण महत, कृषिमन्त्री रामकृष्ण यादव, सञ्चारमन्त्री मोहनबहादुर बस्नेतलगायतले कांग्रेसको पक्षमा जनलहर ल्याउन प्रत्येक निर्वाचन क्षेत्रमा नेविसंघको समूह खटाउन आग्रह गरे ।

प्रकाशित : आश्विन ३१, २०७४ १९:२५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT