बिरामीको रगत तान्दै फोहोरमा फाल्दै, ल्याबहरुले आफूखुसी दिन्छन् रिपोर्ट

अवधेशकुमार झा

राजविराज — सप्तरी सदरमुकाम राजविराजस्थित केही ल्यावले बिरामीको रगत तानेर फाल्दै आफूखुसी रिपोर्ट दिने गरेको पाइएको छ ।

जिल्ला समन्वय समिति कार्यालयको गेटअघि मंगलबार दिउँसो व्यस्त सडकमा फालिएको फोहोरको थुप्रोमा सयवटा भन्दा बढी रगत भरेको सिरिन्ज फेला परेको थियो । कार्टुनभित्र राखेर फालिएको देखेपछि सर्वसाधारणको भीड लागेको थियो । विभिन्न रोगसम्बन्धी समस्या लिएर डाक्टरसित उपचार गर्ने बिरामीलाई रगत जाँचका लागि डाक्टरले भन्ने गरेपछि बिरामी ल्यावमा रगत जचाउन जाने गरेका छन् । रगतको नमुना परीक्षणै नगरी फालिएको अवस्थामा देखिएको जनस्वास्थ्य कार्यालय सप्तरीका सूचना अधिकृत छेदीप्रसाद यादवले बताए ।

‘बिरामीको रगत तानेर फाल्दै आफूखुसी रिपोर्ट दिने काम जघन्य अपराध हो’ यादवले भने, ‘कुन ल्यावले यस्तो गरेको हो अनुसन्धान गरिरहेका छौं ।’ राजविराजका अधिकांश ल्यावहरु अनाधिकृत रुपमै सञ्चालन हुँदै आएको छ । ‘बिरामीको रगत तानेर फाल्दै आफूखुसी रिपोर्ट दिनु अपराध हो’ गजेन्द्रनारायण सिंह सगरमाथा अञ्चल अस्पतालका डा. रन्जितकुमार झाले भने, ‘यस्ता कार्यमा संलग्नलाई कानुनी दायरामा ल्याउनुपर्छ ।’ उनले बिरामी मानिसको रगत तानेर बिच बाटोमा फालिँदा उक्त बाटो भएर हिँड्ने स्वस्थ मानिसमा पनि प्राणघातक रोगहरु फैलिने खतरा बढेको बताए ।

‘फालिएको रगत कुन रोगका बिरामी को हो, ती सिरिन्जको सुई स्वस्थ मानिसको खुट्टामा घोचिए एचआईभी, हेपाटाईटिस 'बी' र 'सी' लगायत प्राणघातक रोगको संक्रमण फैलिने खतरा पनि उत्तिकै छ’ डा झाले भने, ‘रगत लामो समयसम्म असुरक्षित तरिकाले फालिँदा कुहिएर अन्य रोगको संक्रमण फैलिने खतरा पनि उत्तिकै छ ।’

प्रहरी उपरीक्षक मुकेशकुमार सिंहले रगत तानेर फालिएको घटनाका विषयमा अनुसन्धान गर्न एकजनालाई नियन्त्रणमा लिइएको बताए ।

प्रकाशित : कार्तिक १, २०७४ १०:३७
ADVERTISEMENT
प्रतिक्रिया
पठाउनुहोस्
ADVERTISEMENT

कुकुर तालिम केन्द्रमा यसरी मनाइयो कुकुर तिहार

आज कुकुर तिहार
तस्बिरः कविन अधिकारी

काठमाडौं — तिहारको दोस्रो दिन बुधबार घर–घरमा सुरक्षा गर्ने कुकुरलाई मीठा मीठा खानेकुरा खान दिएर मनाइँदैछ । यही अवसरमा नेपाल प्रहरीले काठमाडौंको सामाखुशीस्थित कुकुर तालिम केन्द्रमा कुकुर तिहार मनाए । कुकुरलाई अबिर, माला गरेर प्रहरीले कुकुर तिहार मनाएका हुन् ।

कार्तिक कृष्ण चतुर्दशीका दिन कुकुरलाई मीठा मीठा परिकार खान दिए यमराजको ढोकामा द्वारपालका रुपमा बस्ने श्याम र सबल नामका कुकुरले यमलोक जाँदा बाटो छोडिदिने धार्मिक विश्वासका आधारमा कुकुर तिहार मनाउने गरिएको धर्मशास्त्रविद् एवम् नेपाल पञ्चाङ्ग निर्णायक समितिका अध्यक्ष प्रा डा रामचन्द्र गौतमले जानकारी दिए । 

वैवस्वत मन्वन्तरको कुलमा जन्मिएको कुकुरले धर्मराज युधिष्ठिरलाई स्वर्ग यात्रामा समेत साथ दिएको धार्मिक विश्वास छ । कुकुरलाई आज्ञापालक र सुरक्षामा भरपर्दो घरपालुवा जनावरका रुपमा लिइन्छ । घरमा कुकुर पाल्नाले मुटु र मधुमेह रोग लाग्दैन भनी विश्वास गर्नेहरुको सङ्ख्यासमेत बढ्न थालेको छ ।

 

नरक चतुर्दशी 

आज बिहानै अरुणोदयकालमा नदी वा तलाउमा गई स्नान, तर्पण गरेर यमदीप दक्षिण फर्काएर बगाउनाले मृत्युपश्चात् नरकको दर्शन गर्नु नपर्ने धार्मिक विश्वासका कारण नरके नुहाउने विधिसमेत रहेको गौतमले बताए । यसरी बत्ती बालेर बगाउनुलाई नरके बगाउने भनिन्छ । यस दिनलाई नरक चतुर्दशी पनि भनिन्छ । 

यमपञ्चक अर्थात् तिहारका पाँचै दिन साँझमा घर–घरमा परिवार सङ्ख्याअनुसार यमदीप दान गरिन्छ । तिहारका पाँच दिनमा तिलको तेल लगाएर स्नान गर्ने प्रचलनसमेत रहेको छ । रासस

प्रकाशित : कार्तिक १, २०७४ १०:३७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT