एमाले र माओवादी एक भएर कम्युनिस्ट एकताको सन्देश दिन्छौं : शर्मा

जिल्ला सदरमुकाम खलंगामा आइतबार बिहान प्रेस चौतारी र प्रेस सेन्टरले गरेको पत्रकार सम्मेलनमा बोल्दै मन्त्री शर्माले समय अभावका कारण मात्रै एमाले माओवादीले आ–आफ्नै उम्मेदवारी दिनु परेको बताएका हुन् । ‘हामी पार्टी एकता गरेरै निर्वाचनमा जाने तयारीमा थियौं,’ शर्माले भने, ‘केही प्राविधिक कुरा नमिल्नु तथा समयाभाव अर्को समस्या रह्यो ।’तत्कालै पार्टी एकता सम्भव नभएपछि ६०/४० सिट बाँडफाँडका आधारमा निर्वाचनमा जाने र निर्वाचनलगत्तै पार्टी एकताको तयारी भइरहेको उनको भनाइ छ ।

देश र राष्ट्रिय हितको साथै समयको मागबमोजिम नै कम्युनिस्ट एकताको प्रक्रिया सुरु भएको तर्क शर्माले गरे । कम्युनिस्ट एकताको सन्देश निर्वाचनलगत्तै एमाले र माओवादी एक भएर दिने उनले बताएका छन् । राजनीति स्थिर नहुँदा देश स्थिर भइरहने अवस्था नरहेकाले विकास निर्माण संभव नदेखिएपछि एकता प्रक्रिया थालिएको उनले बताए । ‘जब राजनीति नै स्थिर नभए आर्थिक समृद्धि देशको विकास सम्भव नै देखिएन, त्यसैले पनि ठूलो रिस्क मोलेर पार्टी एकताको प्रक्रिया थालिएको हो,’ उनले भने ।

अब बन्ने सरकार ५ वर्षसम्म रहने भन्दै उनले त्यसपछि जनताले दल तथा उम्मेदवारी छान्ने अवसर पनि पाउने उनको भनाइ छ । दस महिनाभन्दा धेरै सरकार नटिक्ने भएकाले जनता पनि अलमलमा परेकाले अब जनप्रेमी र विकासप्रेमी पार्टी अस्तित्व मात्रै रहने उनले बताए ।

देशले स्थायी सरकारको महसुस गरेको र वाम तथा लोकतान्त्रिक ध्रुविकरण सुरु भएकाले अब देशमा विकास र आर्थिक समृद्धिले पनि फड्को मार्न धेरै समय नलाउने शर्माको जिकिर छ ।