चिनियाँ टोलीको निष्कर्ष, 'रेलको सम्भावना छ'

कान्तिपुर संवाददाता

काठमाडौं — नेपाल जोड्ने रेल चीनबाट ल्याउन सक्ने सम्भावना रहेको निश्कर्षसहित चिनियाँ प्राविधिक टोली फर्केको छ । नेपालभित्र र चीन जोड्ने रेलमार्गबारे अध्ययन गर्न नेपाल आएको चिनियाँ टोलीले रेल निर्माण प्राविधिक रुपमा सम्भव भएको बताएका छन् ।

नेपाल जोड्ने रेल चीनबाट ल्याउन सक्ने सम्भावना रहेको निश्कर्षसहित चिनियाँ प्राविधिक टोली फर्केको छ ।

नेपालभित्र र चीन जोड्ने रेलमार्गबारे अध्ययन गर्न नेपाल आएको चिनियाँ टोलीले रेल निर्माण प्राविधिक रुपमा सम्भव भएको बताएका छन् । केरुङ–काठमाडौं, काठमाडौं–पोखरा र पोखरा–लुम्बिनीको अध्ययन गरेको उक्त टोलीले त्यस्तो जानकारी दिएका हुन् । उनीहरुले अध्ययन प्रतिवेदन भने केही समयपछि बुझाउने छन् ।

चिनियाँ प्राविधिकले थप अध्ययन गरेर त्यसको सम्भावनालाई टुंगो लगाउनेछन् । चीनको राष्ट्रिय रेलवे प्रशासनका उपप्रमुख चेङ चियान नेतृत्वको २३ सदस्यीय टोली उक्त अध्ययन र लगानीको अवस्थाबारे अध्ययन गर्न सोमबार नेपाल आएको थियो । टोलीले नेपालभित्र र सीमामा जोड्ने रेलको प्राविधिक पक्षबारे अध्ययन गरेको थियो । उक्त टोलीले आएलगत्तै र स्थलगत अवलोकन सकेर जानुअघि छलफल गर्दै सम्भावाना रहेको निश्कर्ष निकालेको हो । टोलीले अन्य प्राविधिकहरुको समेत धारणा र नेपाल सरकारको रेल विभागले तयार गरेको अध्ययनको आधारलाई राखेर नेपालमा रेलमार्ग सम्भव रहेको जानकारी चीन सरकारलाई दिनेछ ।

उनीहरुले आफ्नो पक्षबाट अध्ययन समेत गरिसकेकाले सरकारले पनि अव छुट्टै प्रस्तावसहित रेल निर्माणको लागि अघि बढ्न पर्ने हुन्छ । रेल विभागमा सिनियर डिभिजनल इन्जिनियर तथा प्रवक्ता प्रकाश शर्माले कान्तिपुरसँग भने, ‘अध्ययन राम्रो भएको छ । उनीहरुले आफ्नो चासो राखे हामीले हाम्रो कुरा राख्यौं । भएका अध्ययन र सम्भावना पनि देखाए । केही समस्या र त्यसको निधान पनि देखाएका छन । अब प्रक्रिया अघि बढाउँदा चिनियाँ पक्ष सकारात्मक रहने स्पष्ट छ ।’

यस क्षेत्रमा भौगर्भिक समस्या रहेको जानकारी पनि उनीहरुले दिएका छन् । दुई प्लेटको बीचमा रहेको क्षेत्र भएकाले प्लेट आपसमा जुध्दा रेलमार्गको सुरुङमा समस्या आउन सक्ने भए पनि त्यहाँ रेल कुद्न सक्ने सम्भावना रहेको धारणा उनीहरुले ब्यक्त गरेका छन् ।

प्रकाशित : कार्तिक २४, २०७४ १८:४२
प्रतिक्रिया
पठाउनुहोस्
ADVERTISEMENT
ADVERTISEMENT

सिन्धुलीगढीमा २५० औं विजय दिवस

राजकुमार कार्की

सिन्धुली — वीर गोर्खाली फौजले अंग्रेजी सेनालाई हराएको २५० वर्ष पुगेको दिनको सम्झनामा शुक्रबार ऐतिहासिक सिन्धुलीगढीमा राष्ट्रपति विद्यादेवी भण्डारीले ठूलो गढीमा राष्ट्रिय झन्डा फहराएर गौरव दिवस मनाइएको छ ।

विसं १८२४ को कात्तिक २४ मा कप्तान किनलोकको नेतृत्वमा आएको ब्रिटिस सेनालाई गोर्खाली फौजले सिन्धुलीगढीबाट पराजित गरेर पठाएको सम्झनामा प्रत्येक वर्ष नेपालको झन्डा फहराएर सलामी अर्पण गरी गौरव दिवस मनाइँदै आएको छ ।

राष्ट्रपति भण्डारीले राष्ट्रिय झन्डोत्तोलन गरेकी थिइन् । नेपाली सेनाको चण्डीदल गणका सेनाले उक्त अवसरमा सलामी अर्पण गरेका थिए । प्रधानसेनापति राजेन्द्र क्षत्री समेत सरिक थिए । राष्ट्रपति भण्डारीले नेपाल एकीकरणको समयमा भएको विजयगाथाले राष्ट्रको सम्मान भएको र सिन्धुलीगढी र त्यस समयमा लडेका फौजले शिर उचो बनाएको बताइन् । सिन्धुलीगढीलाई पर्यटकीय क्षेत्रको रुपमा विकास गरी विश्वसामु चिनाउन लागिपर्न सबैमा उनले आग्रह गरिन् । 

आसन्न प्रतिनिधिसभा र प्रदेशसभा निर्वाचनमा सबैले भाग लिइ समुन्नत नेपाल बनाउन सबैमा लागि पर्न उन अपिल गरिन् । 

नेपाल एकीकरणको समयमा काठमाडौंका तत्कालीन राजा जयप्रकाश मल्ललाई सहयोग गर्न आएको ब्रिटिस सेनालाई वंशु गुरुङ नेतृत्वको गोर्खाली सेनाले सिन्धुलीगढीबाट पराजित गरेर धपाएको थियो । सिन्धुलीगढीमा रहेको सानोगढी, पौवागढी, इनार, भग्नावषेश मात्र बाँकी रहेको दरबारको संरक्षण हुनुपर्ने सो अवसरमा चासो देखाइयो ।

राष्ट्रपति भण्डारीले सबै जागरुक भएर ऐतिहासिक सिन्धुलीगढी क्षेत्रको संरक्षण गर्नु पर्ने बताए । कमलामाइ नगरपालिकाका मेयर खड्गबहादुर खत्रीले गढीको ऐतिहासिक महत्वका बारेमा प्रस्ट्याएका थिए । पृथ्वीनारायण शाहको नेपाल एकीकरणमा बाधा पुर्‍याउन काठमाडौंका तत्कालीन राजालाई सहयोग गर्न आएका ब्रिटिस फौजलाई नेपाली फैजले पराजित गर्दा भएका घटना मेयर खत्रीले सुनाए । गोर्खाली सेनाले आक्रमण गरेर मात्र नभइ अरिङ्गालका गोला, अल्लो, सिस्नुलगायतको समेत मद्दत लिएको इतिहासमा पाइन्छ, नेपाली सेनाको चण्डीदल गणले तत्कालीन यूद्ध झल्काउने खालको नाटक प्रदर्शन गरेको थियो ।

कमलामाइ नगरपालिका र पत्रकार महासंघ शाखाले गौरव दिवस संयुक्त मनाउने गरेका छन् । विश्व साइकल यात्री पुष्कर शाहको नेतृत्वमा एकसय १३ जनाले काठमाडौंदेखि सिन्धुलीगढीसम्म साइकिलिङ गरेका थिए । त्यसको संयोजन समृद्ध सिन्धुली अभियानले गरेको थियो । साइकल यात्रीहरु सदरमुकामसम्म नै आएका थिए । धुलीखेलदेखि शुक्रबार बिहानै दौडिएर एकसय २१ किमि पार गर्दै धावक रामबहादुर कार्की विजयोत्सवमा सरिक भएका थिए 

प्रकाशित : कार्तिक २४, २०७४ १८:४२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT