मतदाताको एउटै माग– समृद्ध काँठ

दीपेन्द्र विष्ट

काठमाडौं — चाबहिल–साँखु खण्डमा सडकका दायाँबायाँ भत्काएका जीर्ण घर, धुलाम्मे र हिलाम्मे सडक देखिन्छन् । दक्षिणढोकादेखि साँखु पुग्नजेल सडकको धूलोमै हराएर गाडी कुदिरहेका छन् । सडक दायाँबायाँका घरहरू भत्काउने क्रम पनि जारी छ । तर, तत्कालै यो सडक कालोपत्रे हुने सम्भावना भने छैन ।

जहरसिंहपौवादेखि नाङ्लेभारेको छाप भञ्ज्याङसम्म पनि सडकको अवस्था उस्तै नाजुक छ । धूलो र हिलोले सडकवरपरका बासिन्दाले हैरानी खेप्नुपरेको छ । ३ वर्षअघि कालोपत्रे गरिएको सडक भत्किएर कच्ची जस्तै भएका छन् । सार्वजनिक यातायातको स्थिति झनै नाजुक छ । यात्रु ठेलमठेल गरी गन्तव्य पुग्नुको विकल्प छैन । 

त्यसैगरी कीर्तिपुरदेखि दक्षिणकाली पुग्ने सडकको कालोपत्रे पनि विभिन्न स्थानमा उप्किएर नाजुक अवस्था छ । यी केही उदाहरण मात्र हुन् ।

प्रतिनिधि र प्रदेशसभा चुनाव नजिकिँदै गर्दा मतदातालाई राजनीतिक पार्टीको घोषणापत्रले छुन सकेको छैन । मतदाताहरू गाउँ बस्ती र टोलटोलमा मत माग्न पुग्ने उम्मेदवारसँग सडक बाटो, सिँचाइ, खानेपानीलगायत विकासको माग गरिरहेका छन् । काँठका अघिकांश सडकको अवस्था नाजुक छ । यसैले यहाँका मतदाताको अहिले एउटै मत देखिन्छ– ‘जसले विकास गर्छ, उसैलाई भोट ।’

‘विकास र समृद्धि चाहिएको छ, दूरदराजका सडक कालोपत्र भइसके, हाम्रो अवस्था जस्ताको त्यस्तै छ,’ थलीका सहदेव केसीले भने, ‘अब आममानिसलाई दलका आकर्षक घोषणापत्रभन्दा पनि विकास चाहिएको छ ।’ विकास गर्ने पार्टीलाई चुन्नुपर्ने उनले सुनाए । भन्छन्, ‘गफ गरी भोट लिएर जाने अनि गाउँतिर नफर्कनेलाई यसपालि भोट दिने होइन ।’

केही दिन घरदैलो गर्दै पुगेका क्षेत्र २ का एमाले उम्मेदवार माधवकुमार नेपालसँग मतदाताले सडक कालोपत्रेका लागि अनुरोध गरेको प्रशंग सुनाउँदै केसीले भने, ‘उम्मेदवारसँग मतलब छैन, विद्युत्, खानेपानी र सडक कालोपत्रेका लागि प्रत्येक व्यक्तिले अनुरोध गरेका हुन्छ, मानिसलाई आफ्नो दैनिकी सहजसँग कसरी बढ्छ भन्नेमै छ ।’

जहरसिंहपौवाका राजेन्द्र वाइबा पनि कांग्रेस, एमाले कुनै पार्टीका भरमा भोट नदिने भन्दै जनताले विकास चाहेको बताउँछन् । ‘भाषण गरी जनताले भोट हाल्छन् भन्ने भ्रम पाल्ने दिन गएजस्तो लाग्छ, किनभने प्रत्येक मानिसलाई आफ्नो ठाउँको विकास चाहिएको छ,’ उनले भने, ‘जता गए पनि मानिसले उम्मेदवारलाई आफ्नो टोलको विकास गर्ने/नगर्ने प्रश्न गरेको भेटिन्छ ।’ 

दक्षिणकालीका दीपक केसीले संविधान निर्माण भइसकेकाले विकासको माध्यमबाट प्रत्येक मानिसले आर्थिक समृद्धि खोजेको बताए । सडक, बत्तीलगायत भौतिक पूर्वाधार विकास आवश्यकता रहेकाले मतदाताले उम्मेदवारसँग माग गर्नु स्वभाविक रहेको उनको भनाइ छ ।

‘दक्षिणकाली र छमैलेको ग्रामीण बस्तीमा फलेको आलु र गोलभेडा सजिलै बजारमा पुर्‍याउन सकिन्छ भनेर मतदाताले सोचेका छन्,’ उनले भने, ‘यसका लागि गतिलो सडक र यातायातको व्यवस्था हुनुपर्‍यो । मतदाताले उम्मेदवारसँग ग्रामीण र कृषि सडक माग गरेका छन् ।’

काठमाडौं क्षेत्र २ का प्रदेशसभा (क) का कांग्रेस उम्मेदवार लोकेश ढकालले अबको ५ वर्ष चुनिने उम्मेदवारको मुख्य एजेन्डा नै विकास र समृद्धि भएको बताए । ‘मतदाताले उम्मेदवारलाई विकास लागि प्रश्न सोध्नु स्वाभाविकै हो, हामीले गणतन्त्र र संविधानको नारा दिएर भोट माग्यौं त्यो पूरा भयो, अब सबैलाई आर्थिक समृद्धि चाहिएको छ,’ उनले भने, ‘अब ५ वर्षका लागि जित्ने उम्मेदवारले विकासका लागि सोच्नैपर्छ ।’

काठमाडौं क्षेत्र २ प्रदेसभा (ख) का एमाले उम्मेदवार मणिराम फुयालले प्रत्येक मतदाताले विकासका लागि आग्रह गरिराखेको बताए । ‘मतदाताको माग ठीक हो जसले विकास गर्छ, उसलाई भोट दिन्छु भन्ने, यसलाई सकारात्मक लिनुपर्छ,’ उनले भने ।

प्रकाशित : कार्तिक २५, २०७४ ०८:१९
ADVERTISEMENT
ADVERTISEMENT
प्रतिक्रिया
पठाउनुहोस्

‘व्यवसायी नेता’ बीच प्रतिस्पर्धा

पर्वत पोर्तेल

काँकडभिट्ट — झापा १ को प्रदेशसभा सदस्यका लागि ‘व्यावसायिक नेता’ को छवि बनाएका उम्मेदवारबीच प्रतिस्पर्धा हुने भएको छ । प्रदेश १ ‘क’ मा एमालेका श्रीप्रसाद मैनाली र कांग्रेसका केशवराज पाण्डे तथा ‘ख’ मा एमालेका गोपालचन्द्र बुढाथोकी र कांग्रेसबाट अशोककुमार पोख्रेलबीच प्रतिस्पर्धा हुँदैछ ।

सबै व्यवसायी भएकाले उनीहरूबीचको प्रतिस्पर्धा रोचक बन्ने अनुमान गरिएको छ । 

एमालेका मैनाली र बुढाथोकी दुवै यातायात क्षेत्रबाट प्रतिनिधित्व गर्छन् । कांग्रेसका पाण्डे उद्योग वाणिज्य संघसँग आवद्ध छन् भने पोख्रेल कानुन व्यवसायी हुन् ।

यातायात क्षेत्रमा मैनालीको लामो समयदेखि सक्रियता छ । एमाले सम्बद्ध मजदुर संगठनमा आवद्ध उनी नेपाल यातायात व्यवसायी राष्ट्रिय महासंघको दुई कार्यकाल वरिष्ठ उपाध्यक्ष भइसकेका छन् । मेची बस व्यवसायी संघमा करिब २० वर्षदेखि उनी अध्यक्ष हुन् । मैनालीले क्षेत्र नम्बर १ मा वाम गठबन्धनको अवस्था बलियो रहेको दाबी गर्दै भने, ‘मेरो जित सुनिश्चितजस्तै छ ।’

एमालेकै बुढाथोकी पनि लामो समयदेखि यातायात क्षेत्रमा क्रियाशील छन् । ०३५ सालमा विद्यार्थीकालबाटै कम्युनिस्ट राजनीतिमा लागेका बुढाथोकी यो क्षेत्रका लोकप्रिय नेता मानिन्छन् । वाम गठबन्धनअघि प्रतिनिधिसभा सदस्यका रूपमा उनको नाम चर्चामा थियो । तर, गठबन्धनले माओवादी नेता राम कार्कीलाई उम्मेदवार बनाउने निर्णय गर्‍यो । ‘प्रतिनिधिसभा उम्मेदवार बन्न नपाएकोमा मलाई दु:ख छैन,’ बुढाथोकीले भने । उनले प्रदेशसभा सदस्यका लागि पनि टिकट मागेनन् । उनी थप्छन्, ‘पार्टीले उठ्नुपर्छ भनेर मात्रै उठेको हुँ ।’ कांग्रेसका पाण्डेको राजनीति पनि विद्यार्थीकालबाटै सुरु भयो । ०४९ सालमा नेपाल विद्यार्थी संघ कन्काई क्याम्पसका सभापति रहेका उनले त्यसपछि पार्टी सदस्यता लिएका हुन् ।

दुई कार्यकाल महाधिवेशन प्रतिनिधि भइसकेका पाण्डे महासमिति सदस्यको यो तेस्रो कार्यकाल हो । पार्टी राजनीतिसँगै उनी ५० को दशकदेखि निजी क्षेत्रको राजनीतिमा पनि सक्रिय रूपमा लागे । ०५६ मा मेची उद्योग वाणिज्य संघको वरिष्ठ उपाध्यक्ष बनेका उनी त्यसपछि अध्यक्ष बने । उद्योग वाणिज्य महासंघको तीन कार्यकाल केन्द्रीय सदस्य भए । पाण्डेका अनुसार पूर्वी नाका देशको मुख्य व्यापारिक नाकाका रूपमा विकास गर्न सकिने प्रशस्त सम्भावना देखेका छन् । खासगरी भारत, बंगलादेश र भुटानसहित तेस्रो देशसँगको व्यापारका लागि यो नाका सम्भावना प्रशस्त रहेको उनले बताए । प्रदेशसभामा आफूले जिते आर्थिक समृद्धिका लागि काम गर्ने उनको भनाइ छ ।

झापा १ ‘ख’ बाट उम्मेदवार बनेका कांग्रेस नेता पोख्रेल निष्ठावान कानुन व्यवसायीका रूपमा चिनिन्छन् । ०३५ सालमा धुलाबारी माविमा पढ्दै गर्दा उनी राजनीतिमा लागेका हुन् । कांग्रेसका अगुवा नेता याम भण्डारीले उनलाई नेपाल विद्यार्थी संघमा आबद्ध गरेका थिए । 

स्कुलपछि क्याम्पसमा पनि उनले नेविसंघको राजनीति गरे । क्याम्पसपछि वकालती पेसामा संलग्न छन् । वकालत पेसा सुरु गरेपछि पनि यिनले कांग्रेस राजनीतिलाई छाडेनन् । कांग्रेसलाई आधार बनाएर नेपाल बार एसोसिएसनको केन्द्रीय उपाध्यक्षसमेत भए ।

उनी विगत ८ वर्षदेखि वकालती पेसामा सक्रिय छन् । तीन कार्यकाल महाधिवेशन सदस्य बने । पोख्रेलले आफ्नो व्यावसायिक अनुभवका कारण पार्टीले जिम्मेवारी दिएको बताए । नेपाली राजनीतिक संस्कारलाई परिवर्तनको खाँचो रहेको उनको बुझाइ छ ।

प्रकाशित : कार्तिक २५, २०७४ ०८:१९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT