एमाले आमसभातिर, कांग्रेस घरदैलोमा

मोहन शाही

डोटी — मंसिर १० गते हुने प्रदेश र प्रतिनिधिसभा निर्वाचनका लागि मुख्य प्रतिस्पर्धी वाम गठबन्धन र कांग्रेस उम्मेदवार फरकफरक रणनीतिसाथ प्रचारप्रसारमा केन्द्रित भएका छन् । उम्मेदवारसँगै नेता तथा कार्यकर्तासमेत चुनावी प्रचारमा होमिएका छन् ।

प्रदेश र प्रतिनिधिसभा निर्वाचनमा यति बेला वाम गठबन्धनका उम्मेदवार आमसभा तथा कार्यकर्ता भेलामा केन्द्रित छन् । कांग्रेस भने घरदैलो कार्यक्रमलाई प्राथमिकता दिएर अघि बढिरहेको छ ।

कांग्रेसका प्रतिनिधिसभा सदस्यका उम्मेदवार तथा मन्त्री वीरबहादुर बलायर शुक्रबार बिहानैबाट कार्यकर्ता भेटघाटमा जुटेका छन् । दिपायलको सत्कार होटलमा रहेका बलायरले बिहीबार रातिसम्म शिखर नगरपालिकामा घरदैलो गरे । शुक्रबार दिउँसोबाट दिपायल सिलगढी नगरपालिकाभित्रै उनी मतदाताको घरदैलोमा छन् ।

प्रदेशतर्फको निर्वाचन क्षेत्र क मा कांग्रेसका उम्मेदवार भरतबहादुर खडकाले गृह गाउँपालिका पूर्वीचौकीको गाँजरी, पोखरीमा घरदैलो तथा कार्यकर्ता भेटघाट गरी शुक्रबार काडामाडौंमा आइपुगेका छन् । क्षेत्र नं. ख का उम्मेदवार योगेन्द्र शाहीले केआईसिंह गाउँपालिकाको वायलदेखि गणेशकाँडा–लोली–डुम्राकोटसम्मका कार्यकर्ता तथा मतदातासँग भेटघाट गरे । शाहीका साथमा समानुपातिक उम्मेदवार पदमराज जोशी पनि सँगै हिँडेका छन् । कांग्रेसले जिल्लामा अगुवा कार्यकर्तासँग छलफल सकेर घरदैलो तथा गाउँ तहका कार्यकर्ता भेटघाटलाई प्राथमिकता दिएको छ । कांग्रेस उम्मेदवार वाम गठबन्धनले अधिनायकबाद लाद्ने आरोप लगाउँदै जिल्लाको दीर्घकालीन समृद्धिका लागि योग्य, अनुभवीलाई जिताउन भन्दै मतदातासित आग्रह गरिरहेका छन् ।

वाम गठबन्धनका साझा उम्मेदवारहरू भने संयुक्त रूपमा आमसभा तथा कार्यकर्ता भेलामा व्यस्त छन् । उनीहरूले सदरमुकाम नजिकका गाउँपालिकामै जिल्ला तहका नेतासहित पुगेर अगुवा कार्यकर्ताको भेलालाई प्राथमिकता दिइरहेका छन् । बिहीबार वाम गठबन्धनले दिपायलस्थित दिल्पेश्वर मठमा बृहत् कार्यकर्ता भेला तथा आमसभा गरेको थियो । आदर्श गाउँपालिकामा शुक्रबार आमसभा गरिएको छ । प्रतिनिधिसभा सदस्यका उम्मेदवार प्रेमबहादुर आलेमगर, प्रदेशतर्फ निर्वाचन क्षेत्र क का चक्र मल्ल, ख का त्रिलोचन भट्ट, समानुपातिक उम्मेदवार शिवसिंह ओलीले कार्यकर्तामाझ चुनावी एजेन्डा प्रस्तुत गर्दै विजयका लागि मैदानमा खटिन आग्रह गरेका थिए । उनीहरूले वाम गठबन्धनको नेतृत्वमा स्थिर सरकार र समृद्धिका लागि नयाँ अनुहारलाई भोट मागिरहेका छन् ।

जिल्लामा लोकतान्त्रिक र वाम गठबन्धनपछिको शक्तिका रूपमा रहेको राष्ट्रिय जनमोर्चाले कार्यकर्ता भेला तथा प्रशिक्षण कार्यक्रम चलाउँदै आएको छ । नेकपा मसालका महामन्त्रीको उपस्थितिमा बिहान पत्रकार सम्मेलन गरेको जनमोर्चाले दिउँसो कार्यकर्ता प्रशिक्षण राखेको थियो । जनमोर्चाले वाम गठबन्धन बुर्जुवा रहेको तथा कांग्रेस भारतीय बिस्तारवादसँग नजिक रहेकाले आफ्ना उम्मेदवारलाई भोट मागेका छन् । १ लाख ६ हजार ५३४ मतदाता रहेको डोटीमा ४९ हजार १४३ पुरुष र ५७ हजार ४ सय महिलाले मताधिकार प्रयोग गर्न पाउनेछन् ।

प्रकाशित : कार्तिक २५, २०७४ ०८:१८
ADVERTISEMENT
प्रतिक्रिया
पठाउनुहोस्

डोल्पामा द्विपक्षीय प्रतिस्पर्धा

कान्तिपुर संवाददाता

डोल्पा — विगतका निर्वाचनमा जिल्लाभर मूलत: त्रिपक्षीय प्रतिस्पर्धा हुने गरेको थियो । यसपटकको प्रदेश र प्रतिनिधिसभा सदस्य निर्वाचनमा भने अघिल्ला चुनावको तुलनामा वाम गठबन्धनका प्रतिस्पर्धी लोकतान्त्रिक गठबन्धनभन्दा निकै मजबुत देखिएका छन् ।

स्थानीय तह निर्वाचनमा जिल्लाभर एमालेको मत ७ हजार ४ सय ७०, माओवादी केन्द्रको २ हजार ३ सय २६ र स्वतन्त्रको ८ सय ६२ मत थियो । स्थानीय तह निर्बाचनमा स्वतन्त्र उम्मेदवार बनेका पनि एमाले प्रवेश गरिसकेका छन् । तीनवटै मत जोडदा वाम गठबन्धनको पक्षमा १० हजार ६ सय ५८ हुन्छ । कांग्रेसले जिल्लाभरिबाट ३ हजार १ सय ९५ मत प्राप्त गरेको थियो । स्थानीय तहको निर्वाचनमा भने कांग्रेसलाई माओवादी केन्द्रको साथ थियो । जिल्लामा राप्रपालगायत अन्य पार्टीले कांग्रेसलाई सघाएका छैनन् । 

अघिल्लो संविधानसभा निर्वाचनमा एमालेका धनबहादुर बुढाको ६ हजार ९ सय ८५ र एकीकृत माओवादीकी सत्य पहाडीको २ हजार ७ सय ६२ मत थियो । यस्तै कांग्रेसका सुरेशबहादुर शाहीको ९ सय ६५ मत ल्याएका थिए । । उक्त निर्वाचनमा स्वतन्त्र उम्मेदवारी दिएका र अहिले कांग्रेस प्रवेश गरेर प्रतिनिधिसभा सदस्यका उम्मेदवार अंगदकुमार बुढाले १ हजार ५ सय ३४ मत ल्याएका थिए । गाउँगाउँमा वाम गठबन्धन र कांग्रेस उम्मेदवारको चुनावी प्रचारप्रसारले तीव्रता लिएको छ । कांग्रेसका प्रतिनिधिसभा सदस्यका उम्मेदवार बुढाले माथिल्लो डोल्पामा प्रचार सकेर सदरमुकाम आइपुगेको बताए । 

वाम गठबन्धनका उम्मेदवार एमालेका धनबहादुर बुढा तल्लो डोल्पामै व्यस्त छन् । उनी शुक्रबार त्रिपुरासुन्दरी नगरपालिका ९ को बन्तडीमा थिए । १ (क) को प्रदेशसभा सदस्यका उम्मेदवार वेगमसिंह ठकुरी ठूलीभेरी नगरपालिकामा व्यस्त छन् ।

प्रकाशित : कार्तिक २५, २०७४ ०८:१८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT