राष्ट्रपति आज यूएई जाँदै

कान्तिपुर संवाददाता

काठमाडौं — राष्ट्रपति विद्यादेवी भण्डारी युनाइटेड अरब इमिरेट्स (यूएई) को औपचारिक भ्रमणका लागि आज सोमबार त्यसतर्फ जाँदैछिन् । भ्रमणको कार्यक्रम आइतबार सार्वजनिक गरिएको हो ।

भ्रमणका क्रममा नेपाल र यूएईबीच आपसी हितका विषयमा छलफल हुने परराष्ट्र मन्त्रालयले जनाएको छ । राष्ट्रपतिले त्यहाँ रहेका नेपालीसँग अन्तरक्रिया गर्ने पनि कार्यक्रम छ । खाडी मुलुकबीच नै आन्तरिक सम्बन्ध सुमधुर हुन नसकेको अवस्थामा भण्डारी खाडीकै एक मुलुक यूएई जान लागेकी हुन् ।

प्रकाशित : कार्तिक २७, २०७४ ०८:४१
प्रतिक्रिया
पठाउनुहोस्

सुरक्षा व्यवस्था थप कडा पार्न निर्देशन

कान्तिपुर संवाददाता

काठमाडौं — गृह मन्त्रालयले आसन्न चुनावमा सुरक्षा व्यवस्था थप कडा बनाउने भएको छ । पश्चिम पहाडका जिल्लाहरूमा एकपछि अर्को गर्दै माओवादीका उम्मेदवारमाथि बम प्रहारका घटना भएपछि शनिबार गृह मन्त्रालयले नेपाल प्रहरी, सशस्त्र प्रहरी र नेपाली सेनाका उच्च अधिकारीको भेला डाकेको थियो ।

गृह मन्त्रालयले आसन्न चुनावमा सुरक्षा व्यवस्था थप कडा बनाउने भएको छ ।

पश्चिम पहाडका जिल्लाहरूमा एकपछि अर्को गर्दै माओवादीका उम्मेदवारमाथि बम प्रहारका घटना भएपछि शनिबार गृह मन्त्रालयले नेपाल प्रहरी, सशस्त्र प्रहरी र नेपाली सेनाका उच्च अधिकारीको भेला डाकेको थियो । स्रोतका अनुसार उक्त भेलामा गृह सचिव मोहनकृष्ण सापकोटाले सुरक्षा प्रबन्ध कडा पार्न मातहतको निकायलाई निर्देशन दिएका थिए ।

बम प्रहारका घटना र हतियारसहित हिँड्नेहरूको संख्या बढेको भन्दै प्रहरीले पश्चिम पहाडका जिल्लाहरूमा जाँचपडताल कडा पारेको छ । गृह प्रवक्ता नारायणप्रसाद शर्माले मन्त्रालयले निर्वाचनविरोधी गतिविधि गर्नेलाई नियन्त्रण गर्न जिल्ला प्रशासन कार्यालयलाई परिपत्र गरिसकेको बताए । गृहले सुरक्षा चुनौतीअनुसार जिल्लास्तरमै निर्वाचन सुरक्षा नीति परिवर्तन गर्न सक्ने अधिकारसमेत जिल्ला प्रशासन कार्यालयलाई दिएको छ ।

सुरक्षा चुनौती बढे पनि गृहले यसअघिको स्थानीय तहको चुनावमा जस्तै तीन घेराको सुरक्षा योजना जारी राख्ने भएको छ । आइतबार मात्रै निर्वाचन आयोगले निर्वाचन सुरक्षाबारे गृहसचिवसहितका पदाधिकारीलाई बोलाएको थियो । स्रोतका अनुसार उक्त बैठकमा आयोगले आसन्न सुरक्षा चुनौती र त्यसलाई चिर्न के तयारी भइरहेको छ भनेर बुझेको थियो । गृह सचिव सापकोटाले सुरक्षा व्यवस्था कडा पार्न, चेकजाँच बढाउन निर्देशन दिइसकेको बताउँदै अघिल्लो दिनको सुरक्षा अधिकारीसँगको बैठकका कुरा राखेका थिए ।

प्रकाशित : कार्तिक २७, २०७४ ०८:४१
पूरा पढ्नुहोस्
प्रतिक्रिया
पठाउनुहोस्