ओलीले भने-‘सरकार र विप्लव समूह उस्तै’

‘साम्यवाद आफैंमा सुन्दर परिकल्पना हो तर त्यसमा पुग्न सम्भव छैन
कान्तिपुर संवाददाता

काठमाडौं — एमाले अध्यक्ष केपी ओलीले झूटा कुरा गरेर भ्रमको खेती नगर्न सत्तारूढ दल कांग्रेसलाई आग्रह गरेका छन् । पछिल्लो समय कांग्रेसले लगाएको वाम गठबन्धन लोकतन्त्र धरापमा पार्न लागिपरेको आरोपको प्रतिवाद गर्दै ओलीले लोकतन्त्रको प्रमाणपत्र सानेपा (कांग्रेस मुख्यालय)बाट लिनु नपर्ने व्यंग्य गरे ।

‘हामी लोकतन्त्रवादी हौं भनेर सानेपाले आईएसओ प्रमाणित गर्नुपर्ने, चिह्न दिनुपर्ने होइन,’ काठमाडौंका उम्मेदवारहरूको परिचयात्मक कार्यक्रममा ओलीले प्रश्न गरे, ‘कांग्रेससँग प्रतिवाद गर्ने अरू केही एजेन्डा छैन ?’ उनले भ्रमको खेती नगर्न कांग्रेसलाई चेतावनीसमेत दिए ।

आफूहरूले कम्युनिस्ट सरकार बनाउन लागेकामा दुईमत नरहेको उनले बताए । मंगलबारै आफ्नो चुनाव क्षेत्र झापाबाट फर्केका ओलीले वर्तमान सरकारका गतिविधि र कांग्रेसको चुनावी अभियानप्रति कटाक्ष गरेका थिए । वाम गठबन्धनले जिते साम्यवाद आउने र अधिनायकवाद लाद्ने भन्ने प्रधानमन्त्री शेरबहादुर देउवाको भनाइप्रति लक्षित गर्दै ओलीले भने, ‘साम्यवाद आफैंमा सुन्दर परिकल्पना हो तर त्यसमा पुग्न सम्भव छैन । साम्यवाद नराम्रो व्यवस्था होइन । सबै सुखी हुने, केहीको अभाव नहुने परिकल्पना साम्यवादले गर्छ । त्यो पूर्ण लोकतान्त्रिक हुन्छ,’ उनले भने ।

देउवा नेतृत्वको सरकार र विप्लव समूहले एकै प्रकृतिको काम गरिरहेको आरोपसमेत उनले लगाए । भनेजति चन्दा नपाएपछि सरकारले बूढीगण्डकी जलविद्युत् आयोजनाको चिनियासँगको ठेक्का रद्द गरेको आरोप उनले लगाए । ‘सरकार चुनावी खर्च नपाएपछि ठेक्का रद्द गर्छ, विप्लव समूह जबर्जस्ती चन्दा माग्ने, बम पडकाउँदै हिँड्ने गर्छ । सरकारले तिनलाई कारबाही पनि गर्दैन,’ ओलीले भने ।

.....

नेकपा एमालेका अध्यक्ष केपी ओलीले बूढीगण्डकी जलविद्युत् आयोजना बनाउन चिनियाँ कम्पनी गेजुवा ग्रुपसँग भएको सम्झौता कांग्रेसले चुनाव खर्च उठाउन खारेज गरेको आरोप लगाएका छन् ।

काठमाडौंमा वाम गठबन्धनतर्फबाट प्रतिनिधिसभा र प्रदेशसभाका उम्मेदवारहरुको परिचयात्मक कार्यक्रमलाई मंगलबार सम्बोधन गर्दै उनले अर्को कम्पनीसँग कमिसन लिइ सम्झौता गर्न कांग्रेस नेतृत्वको सरकारले बूढीगण्डकी जलविद्युत् आयोजनाको सम्झौता खारेज गरेको दाबी गरे । बूढीगण्डकीकै जसरी कांग्रेसले स्थानीय तहको निर्वाचन अघि करिब एक दर्जन आयोजनाका लाइसेन्स बेचेको पनि ओलीको आरोप छ । सोमबार बसेको मन्त्रिपरिषद् बैठकले १२ सय मेगावाटको जलाशययुक्त बूढीगण्डकी आयोजनाको सम्झौता रद्द गर्ने निर्णय गरेको थियो । सरकारले उक्त आयोजना अब लगानी बोर्डमार्फत अगाडि बढाउने जनाएको छ ।

गेजुवा ग्रुपलाई इन्जिनियरिङ प्रोक्युरमेन्ट कन्स्ट्रसन एन्ड फाइनान्स (ईपीसी एन्ड एफ) मोडलमा निर्माणको जिम्मा दिने निर्णय तत्कालीन प्रधानमन्त्री पुष्पकमल दाहाल नेतृत्वको सरकारको अन्तिम मन्त्रिपरिषद्ले गरेको हो ।मन्त्रिपरिषद्को उक्त निर्णयपछि गत जेठ २१ गते तत्कालीन ऊर्जामन्त्री जनार्दन शर्मा र कम्पनीबीच समझदारीपत्रमा हस्ताक्षर भइसकेको थियो ।

प्रकाशित : कार्तिक २८, २०७४ १५:२२
प्रतिक्रिया
पठाउनुहोस्

साउदी अरवले १९ थरी पेशामा विदेशी कामदार नलिने, नेपालीको पनि रोजगारी गुम्ने

विदेशी कामदारलाई लेबरमा सिमित बनाउने योजना
होम कार्की

काठमाडौं — साउदी अरवले आफ्नो नागरिकको रोजगारलाई सुनिश्चित गर्न १९ थरीे रोजगारीमा नेपालीसहित विदेशी कामदार नलिने नीति लिएको छ । यो नियम आउँदो जनवरीदेखि लागु हुनेछ । साउदीको श्रम तथा सामाजिक बिकास मन्त्रालयले १९ वटा पेशामा काम गर्ने आप्रवासीको इकमा (परिचयपत्र) समेत नविकरण नगर्ने जनाएको छ । इकमा नविकरण नभएका कामदारले साउदी छोड्नु पर्छ ।

साउदी अरवले आफ्नो नागरिकको रोजगारलाई सुनिश्चित गर्न १९ थरीे रोजगारीमा नेपालीसहित विदेशी कामदार नलिने नीति लिएको छ । यो नियम आउँदो जनवरीदेखि लागु हुनेछ ।साउदीको श्रम तथा सामाजिक बिकास मन्त्रालयले १९ वटा पेशामा काम गर्ने आप्रवासीको इकमा (परिचयपत्र) समेत नविकरण नगर्ने जनाएको छ । इकमा नविकरण नभएका कामदारले साउदी छोड्नु पर्छ ।


स्थानीय सञ्चार माध्यमहरुका अनुसार साउदीले एकाउन्टेन्ट, सेक्रेटरी, सेल्सम्यान, एडमिनिस्ट्रेटर, सेल्स म्यानेजर, सेल्स सुपरभाइजर, फाइनन्स म्यानेजर, चिफ एकाउन्टेन्ट, सिनियर एकाउन्टेन्ट, अफिस म्यानेजर, सेल्स एसिस्टेन्ट, एड्मिनिस्ट्रेसन म्यानेजर, अफिस ब्वाई, ड्राइभर, रिसेप्सनिस्ट, वेरहाउस म्यानेजर, फोरकिल्प म्यानेजर, लजिस्टिक सुपरभाइजर र ह्युमान रिसोर्स म्यानेजरको पदमा विदेशीलाई काममा लगाउन नपाउने नीति ल्याएको हो ।


साउदीको यो निर्णयबाट नेपालीको समेत रोजगार खोसिने भएको छ । यी पद मध्ये नेपालीहरु एकाउन्टेन्ट, सेल्सम्यान, सेल्स सुपरभाइजर, म्यानेजर, अफिस ब्वाई र ड्राइभरमा कार्यरत छन् । आफ्नो अर्थतन्त्र कमजोर हुँदै गएको र विरोजगारको संख्या बढिरहेकोले साउदीले यस्तो निर्णय गरेको हो । ‘साउदी सरकारको लेवरमा मात्रै विदेशी कामदार ल्याउने योजना देखिन्छ,’ इन्जिनियर धरम केसीले भने, ‘यो निर्णयले विदेशी कामदारको माथिल्लो तहमा हुने रोजगारीको अवसर कटौती हुने देखिन्छ ।’
झन्डै दुई दशकदेखि साउदीमा कार्यरत केसीले आप्रबासी घटाउँदै र साउदी बढाउँदै साउदीको भिजन २०३० अन्तर्गत साउदी अरबलाई आप्रबासी कामदार बिहीन मुलुक बनाउने लक्ष्य अनुरूप तिब्र गतिमा त्यसतर्फ साउदी अगाडि बढेको देखिएको वताए ।


साउदी अरबमा ८५ लाख आप्रबासी कामदारहरू रहेकोमा सन् २०१७ को सेप्टेम्वरसम्म ३ लाख दुई हजार ४ सय ७३ जना घटेर ८२ लाख कायम भएको छ । साउदीले बिशेष गरी साउदी महिलालाई काम गर्न प्रोत्साहन गरेको छ । हालै मात्रै उनीहरुले गाडी चलाउन पाउने नियम ल्याएको थियो । यो बर्षमात्रै ९ लाख २३ हजार साउदी युवा श्रम बजारमा आएका छन् ।


आप्रवासी कामदारको बिमा गर्ने सरकारी निकाय गोसोका अनुसार हरेक दिन ३ हजार एक जनाको रोजगार कटौती भइरहेको छ । जसमा एक हजार एकसय २० जना विदेशी र १८ सय ८१ जना साउदी नागरीक पर्छन् ।



प्रकाशित : कार्तिक २८, २०७४ १५:२२
पूरा पढ्नुहोस्
प्रतिक्रिया
पठाउनुहोस्