सामूहिक बलात्कार आरोपमा जनकपुरका चार पक्राउ
धनुषा — जनकपुरमा एक किशोरीलाई सामूहिक बलात्कार गरेको आरोपमा चार जनालाई प्रहरीले पक्राउ गरेको छ । उनीहरुमाथि किशोरीको मुख बाँधेर नहरमा लगि बलात्कार गरेको आरोप छ ।
घटनाको लामो समयपछि प्रहरी कार्यालयमा पीडितले उजुरी गरेपछि जनकपुर उप महानगरपालिका १८ स्थित जलाश्यमा छठ घाटमा बसिरहेकी १६ वर्षीया किशोरीलाई सामूहिक बलात्कार भएको घटना सार्वजनिक भएको हो ।
पीडितको उजुरीको अधारमा आरोपीहरुलाई पक्राउ गरी अनुसन्धान थालिएको जिल्ला प्रहरी कार्यालय धनुषाका प्रहरी उपरीक्षक चक्रबहादुर सिंहले बताए ।
कार्तिक ९ गते राति ११ बजे छठ घाटमा बसेकी किशोरीलाई मदिरा सेवना गरी आएका चार युवाहरुको समूहले मुख थुनेर एकान्तमा लगेर सामूहिक बलात्कार गरेको उजुरीमा उल्लेख छ ।
पक्राउ पर्नेमा जनकपुर उपमहानगरपालिका १८ का २० वर्षीय मनिष कुमार मण्डल, १९ वर्षीय राजु मण्डल, १९ वर्षीय गुडु मण्डल र १८ वर्षीय सुनिल मण्डल छन् ।
पक्राउ परेका चारै जनालाई कार्तिक २८ गते जवर्जस्ती करणी मुद्दामा जिल्ला अदालत धनुषाबाट म्याद थप गराएर अनुसन्धान भइरहेको प्रहरीले जनाएको छ ।
बलात्कार पछि उनीहरुले कसैलाई बताए मारिदिने धम्की दिएका थिए । पीडित किशोरीलाई आरोपीहरुले धम्की र ब्ल्याकमेल गर्न थालेपछि पीडितले उजुरी गरेको प्रहरीको भनाई छ ।
प्रकाशित : कार्तिक ३०, २०७४ १५:२८
