विप्लबका कार्यकर्ता खोज्दै प्रहरी, दुईजना पक्राउ

बसन्तप्रताप सिंह

बझाङ — देशका विभिन्न ठाउँमा उम्मेदवार लक्षित आक्रमणका घटनाहरु बढेसंगै बझाङ प्रहरीले पनि नेत्रविक्रम चन्द नेतृत्वको नेपाल कम्युनिष्ट पार्टीका कार्यकर्ताको खोजी कार्य तिव्र पारेको छ ।

प्रहरीले बझाङमा रहेका विप्लवका नेता कार्यकर्ताका घर तथा डेरामा खानतलासी समेत गरेको छ । यसै क्रममा वित्थड चिर गाउँपालिकाका एक जना विप्लव समर्थक कार्यकर्ता हरिदत्त अवस्थीलाई गिरफ्तार समेत गरेको छ । दुई दिन अघि बझाङ प्रहरीले चन्द नेतृत्वको नेपाल कम्युनिष्ट पार्टीका जिल्ला कमिटी सदस्य जोग कठायतलाई गिरफ्तार गरी हिरासतमा राखेको छ ।

सोमबार विहान र दिउसो जिल्लाभर पहिचान भएका विप्लवका कार्यकर्ताको घर र डेरामा खानतलासी गरेपनि कसैलाई पक्राउ गर्न सकेन । प्रहरीले नेकपाका केन्द्रीय सदस्य एवं पूर्व सभासद शंकर खड्का, केन्द्रीय जनपरिषद् सल्लाहकार सदस्य धनबहादुर मल्ल, जिल्ला जनपरिषद् बझाङका अध्यक्ष चन्द्रजंगबहादुर सिंह, अनेरास्ववियुका पूर्व केन्द्रीय सचिवालय सदस्य भरत मल्लको घरमा पनि खानतलासी गरेको थियो ।

प्रहरी आउनु पूर्व नै सुचना पाएका उनीहरु भागिसकेका कारण गिरफ्तार गर्न नसकिएको प्रहरी स्रोतले बताएको छ । विना कुनै अपराध प्रहरीले धरपकड सुरु गरेको भन्दै नेकपाका नेता कार्यकर्ताले आक्रोश पोखेका छन् । ‘बझाङमा न कुनै घटना भएको छ न हाम्रो त्यस्तो केही योजना छ ’ जिल्ला जनपरिषद् अध्यक्ष चन्द्रजंगबहादुर सिंहले भने, ‘राज्यले हतास मानसिकताका साथ हामी माथी दमन गरिरहेको छ’

यस्तै विद्यार्थी नेता भरत मल्लले पनि राज्यले विनाकारण दमन गरे आफुहरु प्रतिकारमा उत्रिन बाध्य हुने बताए । उनले भने, ‘घर भित्र पसेर विना कारण प्रहरीले ज्यादती सुरु गरेको छ । यस्तो हर्कत जारी रहे हामी प्रतिकार गर्न बाध्य हुनेछौं ।’

यता प्रहरी नायब उपरीक्षक ऋषिराम कंडेलले केन्द्रीय निर्देशन बमोजिम नै विप्लव कार्यकर्ताको खोजी प्रहरीले गरिरहेको बताए । ‘निर्वाचनमा सुरक्षा खतरा देखिएका कारण हामीले जिल्ला भर खोजी अभियान सुरु गरेका छौं । यो केन्द्रको निर्देशन अनुसार गरिएको कारवाही हो’ उनले भने ।

प्रकाशित : मंसिर ४, २०७४ १७:३८
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

आयोगको कल सेन्टरमा धेरै जिज्ञासा मतपत्रबारे

कान्तिपुर संवाददाता

काठमाडौं — सही तरिकाले मतदान कसरी गर्ने विषयमा आम मतदाताको चासो बढी देखिएको छ । निर्वाचन आयोगले सञ्चालनमा ल्याएको कल सेन्टरमा सबैभन्दा बढी जिज्ञासा मतपत्र र मतदानको तरिकाकै बारेमा आउने गरेको छ ।

आयोगले निर्वाचन लक्षित प्रश्नहरुको उत्तर दिन सञ्चालनमा ल्याएको कल सेन्टरमा दैनक जसो ५० देखि ६० हाराहारीमा जिज्ञासा सहितका फोनहरु आउने गर्छन् । ‘फोनकर्ता मध्येक अधिकांशको चासो मतपत्र र मतदानकै तरीका बारे हुने गर्छ,’ कल सेन्टरका कम्प्युटर अधिकृत श्रीराम क्षेत्रीले भने, ‘त्यसवाहेक मतदाता नामावलीमा आफ्नो नाम भए/नभएको र त्यसका त्रुटीहरुबारे प्रश्न आउँछन् ।’

कल सेन्टरमा खटिएका कर्मचारीले तत्कालै मतपत्र र मतदान गर्ने तरिकाबारे फोनकर्तालाई बताउँछन् भने मतदाता नामावलीमा नाम भए/नभएको जानकारी समेत दिन्छन् ।

प्रतिनिधिसभा र प्रदेशसभाको निर्वाचन एकैसाथ दुई निर्वाचन प्रणाली मार्फत हुने भएपछि मतदातामा अन्यौलता देखिएको छ । आगामी निर्वाचनमा मतदाताको हातमा तीनवटा मतपत्र पर्नेछ । आयोगका अनुसार प्रत्यक्ष तर्फ प्रतिनिधिसभाको हरियो र प्रदेशसभाको कालो रंगको छुट्टाछुट्टै मतपत्र छन् ।

त्यस्तै समानुपातिक निर्वाचन प्रणाली तर्फ दुवै सभाको रातो रंगको एउटै पानाको मतपत्र हुनेछ । त्यही पानामा माथि प्रतिनिधिसभा र तल प्रदेशसभाका लागि निर्वाचन चिन्हरु रहनेछन् । हरियो र कालो रंगको मतपत्रमा १/१ ठाउँमा र मतदाताले समानुपातिक तर्फको रातो रंगको मतपत्रमा मतपत्र १ माथिल्लो खण्डमा र मतपत्र २ तल्लो खण्डमा १/१ गरी जम्मा २ चिन्हमा छाप लगाउन पाउँछन् । कल सेन्टरमा खटिएका कर्मचारीले फोनकर्तालाई सविस्तार मतपत्र र मतदान गर्ने तरिकाबारे जानकारी दिन्छन् ।

आचारसंहिता उल्लंघनका गुनासो, कति दिन विद्यालय बन्द हुने बारेका जिज्ञासा, सवारी पास लिने तरीका देखि निर्वाचन ऐन, नियम कानुनबारे पनि प्रश्नहरु कल सेन्टरमा आउँछन् । आयोगले फोनकर्तालाई शुल्क नलाग्ने गरी कल सेन्टरमा १६६००१४४२२२ नम्बरको फोन राखेको छ । स्थानीय निर्वाचनको तुलनामा यसपटक भने फोन कम आएका छन् । त्यतिबेला एकैदिन ३८४ सम्म कल आएको रेकर्ड छ । बिहान ८ देखि बेलुकी ८ बजेसम्म सञ्चालन हुने कल सेन्टरमा प्रत्येक सिफ्टमा एकैपटकमा ६ जनाको कल उठाएर जवाफ दिने व्यवस्था मिलाइएको छ ।

सूचना प्रविधि महाशाखाका वरिष्ठ कम्प्युटर अधिकृत (उप-सचिव) श्रीचन्द्र साहले कल सेन्टरमा आएका प्रश्नहरुको उत्तर तत्कालै दिन नसकिए सम्बन्धित महाशाखामा पठाएर उत्तर संकलन गरिने गरिएको बताए । ‘प्रश्नहरुलाई विषयत रुपमा विभाजन गरी सम्बन्धित महाशाखामा पठाउँछौं,’ उनले भने ‘उत्तर प्राप्त हुनसाथा प्रश्नकर्तालाई कल ब्याक गरेर जानकारी दिन्छौं ।’

प्रकाशित : मंसिर ४, २०७४ १७:३८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT