चुनावपछि राजपा–फोरम पार्टी एकता : यादव

कान्तिपुर संवाददाता

सप्तरी — संघीय समाजवादी फोरम नेपालका अध्यक्ष उपेन्द्र यादवले राष्ट्रिय जनता पार्टी (राजपा) नेपालसँगको चुनावी तालमेल मधेसी जनताको अधिकार प्राप्तिका लागि भएको र यो सफलतापश्चात् पार्टीगत एकताप्रति अगाडि बढ्ने बताएका छन् । यो चुनावी तालमेलको सुरुआत हो, यसले राम्रो संकेत दिएको छ र यो विस्तारै मधेसी एकताका लागि उदाहरणीय थालनी बन्ने समेत उनले तर्क दिए ।

अध्यक्ष यादवले मंगलबार राजविराजमा कुाराकानी गर्दै संविधान संशोधन, मधेसीको पहिचान, अधिकार र राज्यमा मधेसीको सहभागिताका लागि प्रतिनिधिसभा र प्रदेशसभा सदस्य निर्वाचनमा आफ्नो पार्टीले चुनावी तालमेल गरेको र यो सफल हुने दाबीसमेत गरे । साथै उनले मधेसीको अधिकार प्राप्ति नभएसम्म मधेसीको लडाइँ समाप्त नहुने बताउँदै मधेसी गठबन्धनले बहुमत प्राप्त गरेमा मधेसीको अधिकार सुनिश्चित हुने विश्वास व्यक्त गरे । उनले कांग्रेस, एमाले र माओवादीले जति मीठो भाषण र आश्वासन दिए पनि मधेसी हितमा नभएको आरोप लगाए ।

राज्यमा सबैभन्दा बढी कर तिर्ने मधेशमा सरकारी लगानी अत्यन्त कम भएको र भेदभाव रहेकाले आफ्नो बहुमत आए राज्यको लगानी बढाउने शिक्षा, स्वास्थ्य र रोजगारीको वातावरण बनाउने दाबी गरे । साथै, उद्योगधन्दाका लागि स्वदेशी तथा विदेशी लगानी वृद्धि गर्ने र कृषि उद्योगमा जोड दिने उनले उल्लेख गरे ।

- रासस

प्रकाशित : मंसिर ५, २०७४ १८:४१
ADVERTISEMENT
प्रतिक्रिया
पठाउनुहोस्
ADVERTISEMENT

यसरी हुँदैछ धादिङमा चुनाव तयारी [फोटोफिचर]

तस्बिर : हरिहरसिंह राठौर

धादिङ — मंसिर १० गते हुने प्रतिनिधि तथा प्रदेशसभा चुनावको तयारी पूरा भएको छ । चुनावका लागि मंगलबार १ हजार ९ सय २१ जना कर्मचारी खटाइएका छन् ।

मतदान अधिकृत र सुरक्षाकर्मीलाई केन्द्र तोकेर मतदान सामग्री हस्तान्तरण गरिएको प्रमुख निर्वाचन अधिकृत उमेश कोइरालाले जानकारी दिए । जिल्लाका २ निर्वाचन क्षेत्रमा २ सय ७५ मतदान केन्द्र छन् । प्रत्येक केन्द्रमा मतदान अधिकृत, सहायक मतदान अधिकृत, सहायक र सहयोगी कर्मचारी खटाइने कार्यालयले जनाएको छ । 


जिल्लाकै विकट उत्तरी भेगको रुवीभ्यालीमा खटाइएका मतदान अधिकृतलाई मंगलबारै निर्वाचन सामग्री बुझाइएको छ । मतदान अधिकृतसहितको सुरक्षा टोली बिहीबार साँझसम्म कार्यक्षेत्र पुगी मतदानस्थलको तयारी, निषेध क्षेत्र, मतदाता परिचयपत्र, सर्वदलीय बैठकलगायत काम थाल्नेछन् । 

जिल्लामा निर्वाचन सुरक्षाका लागि नेपाली सेनासँगै सशस्त्र प्रहरीका ४ सय ९३, नेपाल प्रहरीका १ हजार ३ सय ९८ र म्यादी प्रहरीको १ हजार ३ सय ५९ जनशक्ति खटिनेछन् । हरेक बुथमा १७ सुरक्षाकर्मी र एक गाउँपालिकामा प्रहरी निरीक्षकको कमान्डमा २ ‘स्ट्राकिङ’फोर्स परिचालन हुने प्रजिअ श्यामप्रसाद भण्डारीले बताए ।

 

प्रकाशित : मंसिर ५, २०७४ १८:४१
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT