पुनः मतदानको तयारी

हरि गौतम

रुकुम (पश्चिम) — जिल्लाका २ मतदान केन्द्रमा पुनः मतदान हुँदैछ । गत १० गते आइतबार मतदान कार्य स्थगित भएका बाँफिकोट गाउँपालिका र आठविसकोट नगरपालिकाका एक/एक मतदान केन्द्रमा मंसिर १५ गते शुक्रबार पुनः मतदान हुन लागेको हो ।

निर्वाचन स्थगित भएका दुई मतदान केन्द्रमा १५ गते पुर्न मतदान गराउनु भनि निर्वाचन आयोगले दिएको निर्देशन अनुसार जिल्ला स्थित मुख्य निर्वाचन अधिकृतको कार्यालयले पुनः मतदानको तयारी गरेको हो ।

१५ गते बाँफिकोट गाउँपालिका–५, को रत्न आधारभुत विद्यालय काँडाको क मतदान केन्द्रमा प्रतिनिधि सभा सदस्यको निर्वाचन हुने छ भने आठविसकोट नगरपालिका–११, को नेपाल राष्ट्रिय मावि गतसैनाको ख मतदान केन्द्रमा समानुपातिक तर्फको मात्रै मतदान हुनेछ ।

दुवै मतदान केन्द्रमा एसिड हालिएपछि उक्त दिन मतदान कार्य स्थगित गरिएको थियो । मतदान गर्ने मतदाताले नै आफ्नो मतपत्र सहित मतपेटिकामा एसिड हालिएको अनुमान छ ।

बाँफिकोटको मतदान केन्द्रको मतपेटिकामा २ सय ४६ मत खसेको थियो भने आठविसकोटको मतपेटिकामा ३ सय ३ मत खसेको थियो । दुवै मतपेटिकामा आगो देखिएपछि पानी हालेर निभाइएको थियो । एसिड हालेको आशंकमा प्रहरीले बाँफिकोटबाट कल्पना केसी र आठविसकोटबाट केशव खड्कालाई पक्राउ गरी अनुसन्धान गरिरहेको छ ।

पुनः मतदानका लागि आज कमर्चाहरु त्यसतर्फ जाँदैछन् । बाँफिकोटको मतदान अधिकृतमा जिल्लाका सहायक निर्वाचन अधिकृत समेत रहेका तेजप्रसाद पौडेललाई मतदान अधिकृत बनाएर खटाइएको छ भने आठविसकोटको मतदान केन्द्रमा जिल्ला शिक्षा अधिकारी कर्णबहादुर कुँवर मतदान अधिकृत भएर जाँदैछन् ।

मुख्य निर्वाचन अधिकृत संयोजक तथा प्रमुख जिल्ला अधिकारी र जिल्ला निर्वाचन अधिकारी सदस्य रहेको जनशक्ति व्यवस्थापन समितिले पौडेल र कुँवरलाई मतदान अधिकृतको रुपमा खटाउने निर्णय गरेको हो । दुवै मतदान केन्द्रमा मतदान र सहायक मतदान अधिकृत सहित ६/६ जना कर्मचारी हुनेछन् ।

बाँफिकोट गाउँपालिका–५, को रत्न आधारभुत विद्यालय काँडाको क मतदान केन्द्रमा ६ सय ७२ मतदाता रहेका छन् भने, आठविसकोट नगरपालिका–११, को नेपाल राष्ट्रिय मावि गतसैनाको ख मतदान केन्द्रमा ७ सय ५६ जना मतदाता रहेका छन् ।

प्रकाशित : मंसिर १३, २०७४ ११:४७
प्रतिक्रिया
पठाउनुहोस्

एम्बुसमा परी कांग्रेस उम्मेदवार कार्कीसहित ४ जना गम्भीर घाइते

•हेलिकप्टरबाट राजधानी लैजाने तयारी •सडकमुनी विष्फोट हुँदा गाडी १० मिटर माथि उफ्रियो
डिल्लीराम खतिवडा

उदयपुर — निर्वाचन क्षेत्र नम्बर २ बाट प्रतिनिधिसभा सदस्यका लागि नेपाली कांग्रेसका उम्मेदवार नारायणबहादुर कार्की चढेको गाडी एम्बुसमा परेको छ । सडकमुनी राखिएको बम विष्फोट विष्फोट हुँदा कार्कीसहित चारजना गम्भीर घाइते भएका छन् ।

चुनावी प्रचारका सिलसिलामा कार्कीसहितको टोली जाँदै गर्दा करिब साढे १० बजेतिर घटना भएको हो । कटारीबाट उदयपुरगढीको नेपालटार बजारमा आयोजित आमसभामा सहभागी हुन टोली आउँदै थियो ।

प्रहरी उपरीक्षक नवराज भट्टका अनुसार उदयपुरगढी गाउँपालिकाको वडा ५ र ६ को बीचमा पर्ने दनुवार बेंसी पुग्दा कार्की चढेको बा १५ च ७८०६ नम्बर गाडी एम्बुसमा परेको थियो । प्रत्यक्षदर्शीका अनुसार विष्फोट हुँदा गाडी करिब १० मिटर माथिसम्म उफ्रिएको थियो । गाडी क्ष्ँतिगस्त बनेको छ ।

घटनामा परी उम्मेदवार कार्की र उनका सहयोगी कार्यकर्ताहरु मीरा कटुवाल, धनमाया धौलाकोटी र चालक राजन कार्की गम्भीर घाइते भएका छन् । जिल्ला प्रहरी कार्यालयका अनुसार उपचारका लागि लैजान राजधानीबाट हेलिकप्टर आइरहेको छ । आउनासाथ सबैलाई राजधानी पठाइने प्रहरीले जनाएको छ ।

विष्फोट कसले गराएको भन्ने खुलेको छैन । घटनास्थलमा प्रहरीको टोली गएर घाइतेहरुको उद्धार गर्ने काम भइरहेको छ ।

प्रकाशित : मंसिर १३, २०७४ ११:४७
पूरा पढ्नुहोस्
प्रतिक्रिया
पठाउनुहोस्