भाइरलको प्रकोपबाट एक महिनामा १२ को मृत्यु

औषधिसहित स्वास्थ्यकर्मी परिचालन, प्रभावित क्षेत्रमा औषधि अभाव
राजबहादुर शाही

मुगु — जिल्लाभर भाइरल ज्वरोको प्रकोप बढ्दै गएको छ । भाइरल ज्वरोका कारण एक महिनाको अबधिमा १२ जनाको मृत्यु भएको जिल्ला जनस्वास्थ्य कार्यालयले जनाएको छ । छायाँनाथ नगरपालिका, खत्याड र सोरु गाउँपालिकाका केही बस्तीमा कडा भाइरल ज्वरो फैलिएको छ । घरघरै बिरामी थला परेका छन् ।

भाइरल ज्वरोबाटै यो साता रिघा गाउँका ६५ बर्षीय बिउरासर पाण्डे, ४४ बर्षीय बिष्णु जैसी र ७५ बर्षीय ऋषिसन्न उपाध्याय र सुकाढिक गाउँकी ५५ बर्षीय पूर्वा कार्कीको मृत्यु भएको छ । कार्तिक दोस्रो सातादेखि अन्तिमसम्म सेरी साटबाड गाउँका ५९ बर्षीय सिहबहादुर बुढा, खमाले कवाकी ४२ बर्षीय मागी रोकाया, पैखुगाउँका ५६ बर्षीय धनसिंह थापा र ६५ बर्षीय दलसुर थापाको मृत्यु भएको थियो । मंसिर पहिलो साता छायाँनाथ रारा नगरपालिकास्थित श्रीनगर गाउँकी ६५ बर्षीया कलादेबि मल्ल, इमा गाउँका ७५ बर्षीय बउदे खडा, ढुम गाउँकी ७२ बर्षीय लालशोभा बुढा र जउमति सेजुवालको मृत्यु भएको जिल्ला जनस्वास्थ्य कार्यालयले पुष्टि गरेको छ । कार्यालयका अनुसार सोरु गाउँपालिकाको नार्थपु जडेपानी गाउँका ६२ बर्षीय छत्तबहादुर मल्ल, फोतु लिब्रु गाउँकी ७० बर्षीय फुल्ती बुढा र ६० बर्षीय हरिनी दमाईको भाइरल ज्वरोले ज्यान गएको हो ।

जिल्लाभरी ज्वरोका कारण १२ जनाको मृत्यु भएको कार्यालयका एचए बलीबहादुर बुढाले बताए । मृत्यु हुनेहरुमा अधिकाश दमका रोगी भएको उनको भनाई छ । करिव डेढ सय घरधुरी रहेको रिघा गाउँमा भाइरल ज्वरो फैलिंदा गाउँका अधिकांश बिरामी छन् । बिरामीलाई स्यहारसुसार गर्ने समेत मान्छे नभएको रिघा गाउँकी कुसुमकली उपाध्यायले बताइन् । औषधि नपाउँदा ज्यान बचाउन मुश्किल भएको उनको भनाई छ ।

नगरपालिकाको करिव तीन सय घरधुरी रहेको भामबाडा गाउँमा पनि अधिकांश घरमा बिरामी छन् । कडा ज्वरो आउने, टाउको दुख्ने, घाँटी पाक्ने, पेट दुख्ने, रिगंटा लाग्ने, बान्ता आउने, खाना खान मन नलाग्ने जस्ता लक्षण बिरामीमा देखिने गरेका छन् । अधिकांशको उपचार अभावमा ज्यान गएको हो । भाइरल ज्वरो फैलिएका क्षेत्रमा स्वास्थ्य केन्द्र भएपनि औषधि नभएको स्वास्थ्यकर्मीको भनाइ छ । भाइरल ज्वरोले सबैभन्दा बृद्धबृद्धालाई असर गरेको कार्यालयले जनाएको छ ।

भाइरल ज्वरो नियन्त्रणका लागि जिल्ला अस्पतालबाट अहेव ज्ञानसिह बुढासहितको स्वास्थ्यकर्मीको टोली औषधिसहित प्रभावित क्षेत्रमा खटिएको निमित्त प्रमुख जिल्ला अधिकारी मोहन केसीले जानकारी दिए । मौसम परिर्वतनसंगैको चिसो, फोहर वातावरण, दुषित खाना र पानीका कारण भाइरल ज्वरो फैलिएको चिकित्सकको भनाई छ । जिल्लामा महामारी नियन्त्रणका लागि निकासा भएको दुई लाख रकमको औषधि खरिद गरि प्रभावित क्षेत्रमा पठाइएको निमित्त जिल्ला स्वास्थ्य अधिकृत धनप्रसाद शर्माले बताए ।

प्रकाशित : मंसिर १७, २०७४ १८:१३
प्रतिक्रिया
पठाउनुहोस्

प्रत्यक्ष राष्ट्रपतिको कुरा गर्नु संविधानको मर्मविपरीत : देउवा

मोहन बुढाऐर

जोगबुढा, डडेल्धुरा — प्रधानमन्त्री एव‌ं नेपाली कांग्रेसका सभापति शेरबहादुर देउवाले एमाले–माओवादीको वाम गठबन्धनले मुलुकमा प्रत्यक्ष राष्ट्रपतीय प्रणालीको कुरा गर्नु संविधानको मर्म विपरीत भएको बताएका छन् ।

‘यो संविधानले जनताका सबै अधिकार सुनिश्चित गरेको छ । यसलाई अहिले कार्यान्वयनको बाटोमा अगाडि बढाउनु छ ’उनले भने‘ यसबेला प्रत्यक्ष राष्ट्रपतिको कुरा गर्नु यो संविधान च्यात्नु हो । राष्ट्रपति शासन प्रणालीमार्फत पुन: मुलुकमा तानाशाह, निर्दलीय अधिनायकवाद जन्माउनु हो ।’ 

जिल्लाको भित्रि मधेस जोगबुढा क्षेत्रमा आइतबार आयोजित चुनावीसभालाई सम्बोधन गर्दै नेता देउवाले प्रत्यक्ष राष्ट्रपति प्रणालीबाट हाम्रो जस्तो मुलुकमा तानाशाही निर्दलीय पद्धति जन्मने दाबी गरे । ‘प्रत्यक्ष राष्ट्रपति शासन प्रणालीको कुरा गर्नु भनेको अहिले संविधानलाई समेत स्वीकार गर्न नसकेको हो’उनले भने । 

उनले आफ्नो चुनावी क्षेत्र तथा गृहजिल्ला डडेल्धुरामा शिक्षा, स्वास्थ्य, खानेपानी बिजुली, बाटोघाटो सडकलगायतमा उल्लेख प्रगति भएको उल्लेख गरे । ‘अझै गर्नु पर्ने थुप्रै विकासका कामलाई समेत म पुरा गर्ने छु । यो अवसर मलाई नै दिनु हुने छ’उनले भने 'अझै धुलाम्य सडकलाई कालोपत्रे गर्ने, महाकालीमा पक्की पुल निर्माण गरेर परशुराम धामलाई धार्मिक पर्यटकीय क्षेत्रको रुपमा विकास गर्ने योजना छ ।' 

प्रधानमन्त्री देउवा मनोनयन दर्तापछि दोस्रो पटक आफ्नो चुनावी क्षेत्रमा प्रवेश गरेका हुन् । 

प्रकाशित : मंसिर १७, २०७४ १८:१३
पूरा पढ्नुहोस्
प्रतिक्रिया
पठाउनुहोस्