कुवेतमा अलपत्र ३ सय नेपालीलाई तत्काल उद्धार गर्न निर्देशन

कान्तिपुर संवाददाता

काठमाडौं — कुवेतमा अलपत्र परेका नेपालीलाई उद्धार गर्न र त्यहाँ रहँदा खानाबस्न व्यवस्था मिलाउन त्यहाँस्थित दूतावासलाई प्रधानमन्त्री कार्यालयले निर्देशन दिएको छ ।

प्रधानमन्त्री कार्यालयका सचिवको समन्वयमा बसेको बैठकले परराष्ट्र र श्रम मन्त्रालयाललाई समन्वय गरेर तत्काल समस्या समाधान गर्न निर्देशन दिएको हो । यसरी अलपत्र परेको विषयमा सरकारी निकायको पटकपटक बैठक बसे पनि उद्धारको संयन्त्र अझै बन्न सकेको छैन ।

कुवेतको खराफी नेसनल कम्पनीले लामो समयदेखि विदेशी श्रमिकहरुलाई तलब तथा अन्य सुविधाहरु नदिएको र कुवेतमा बस्ने परमिट समेतको म्याद थप नगरेपछि ३ सय नेपाली अलपत्र छन् । यो सम्बन्धी समाचार आएपछि उद्धार प्रक्रिया अघि बढेको हो ।

प्रधानमन्त्री तथा मन्त्रिपरिषद् कार्यालयका सचिव महेन्द्रमान गुरुङको अध्यक्षतामा बसेको बैठकले परराष्ट्र मन्त्रालयले अलपत्र परेका नागरिकहरुको तत्काल तथ्यांक संकलन गर्ने, के कति संख्या, नाम, पासपोर्ट विवरण, उनीहरुको भिसाको, लाग्ने जरिवाना सबैको विवरण उपलब्ध गराउने बताइएको छ । बैठकको निर्णय अनुसार उक्त विवरण वैदेशिक रोजगार विभागलाई बुझाउने र वैदेशिक रोजगार विभागले प्राप्त तथ्यांकका आधारमा नोटिसमा आएका अलपत्र नागरिकको नियमानुसार सम्बन्धित म्यानपावर कम्पनीहरूसँग समन्वय गरी उद्धार गर्ने निर्णय बैठकले गरेको छ ।

ती श्रमिक पठाउने नेपाली कम्पनीहरु एसओएस, गल्फ, लोटस पास र अलकरिम रहेको जानकारी परराष्ट्र मन्त्रालयले गराएको पनि प्रधानमन्त्री कार्यालयको विज्ञप्तिमा उल्लेख छ ।

प्रकाशित : मंसिर २०, २०७४ १८:२०
ADVERTISEMENT
प्रतिक्रिया
पठाउनुहोस्

खुकुरीसहित ४ युवा पक्राउ

आश गुरुङ

लमजुङ — कास्की र लमजुङको सीमाक्षेत्र मध्यनेपालको रामबजारबाट प्रहरीले घरेलु हतियार सानो खुकुरीसहित ४ युवालाई पक्राउ गरेको छ ।

मध्यनेपाल नगरपालिका ७, रामबजारबाट कास्कीको पिप्लेबजार हुँदै फलाङकोट जाँदै गरेका युवालाई पक्राउ गरिएको इलाका प्रहरी कार्यालय भोर्लेटारका इन्सपेक्टर जयराम वन्तले बताए । पक्राउ पर्नेहरुमा लमजुङको सुन्दरबजार नगरपालिका ९, भोटेओडारका २२ वर्षीय रमेश कार्की, कास्की रुपा गाउँपालिका १, फलाङकोटका ३९ वर्षीय उमाकान्त खनाल, २० वर्षका किसन श्रेष्ठ र २२ वर्षकै प्रताप खनाल रहेका छन् । उनीहरुलाई नियन्त्रणमा लिएर आवश्यक छानबिन गरिरहेको प्रहरीले जनाएको छ । प्रहरीले उनीहरुको साथबाट ग६प ८४९६ र बा२७प ९४३३ नम्बरको मोटरसाइकल पनि नियन्त्रणमा लिएको छ ।

इन्सपेक्टर वन्तका अनुसार कास्की र तनहुँमा बिहीबार हुने दोस्रो चरणको निर्वाचन विथोल्न जान लागेको आशंकामा खानतलासी गर्दा घरेलु हातियार सानो खालेको खुकुरीसहित फेला परेको हो । बुधबार दिउँसो साँढे १ बजेतिर २ वटा मोटरसाइकलमार्फत जाँदै गरेका उनीहरुले बोकेको झोलाबाट सानो खालको खुकुरी, २ लिटर पेट्रोल साथै कांग्रेस, एमाले र माओवादी केन्द्रका झन्डासमेत बरामद गरेको इन्पसेक्टर वन्तले बताए ।

कास्की र तनहुँमा बिहीबार हुने दोस्रो चरणको प्रतिनिधिसभा र प्रदेशसभा निर्वाचनलाई मध्यनजर राखेर स्थानीय प्रशासनले सीमा सुरक्षा र चेकजाँचमा कडाई गरेको छ । डीएसपी पदमबहादुर विष्टले घरेलु हतियारसहित उनीहरु पक्राउ परेपछि सीमा सुरक्षालाई थप व्यवस्थित र चेकजाँच झन कडाई गरिएको बताए । डीएसपी विष्ट र प्रमुख जिल्ला अधिकारी युवराज मैनालीसहितको टोलीले बुधबार सीमा सुरक्षा जाँचबारे अवलोकन गरेको छ । उनीहरुले भोर्लेटारबाट सीमा क्षेत्र लमजुङका दुइपिप्ले हुँदै तनहुँको दमौलीसम्मका सुरक्षास्थितबारे जानकारी लिएका विष्टले बताए ।

प्रकाशित : मंसिर २०, २०७४ १८:०९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT