मैले हारे पनि गठबन्धनले जितेकामा उत्साहित छुः एमाले उपाध्यक्ष गौतम

काठमाडौं — नेकपा (एमाले)का उपाध्यक्ष वामदेव गौतमले आफू हारे पनि गठबन्धनले जितेकामा खुशी व्यक्त गर्दै काँधमा काँध मिलाएर अघि बढ्ने बताएका छन् ।

बर्दिया प्रतिनिधिसभा क्षेत्र नं १ बाट पराजीत भएपछि उपाध्यक्ष गौतमले आइतबार एक विज्ञप्ति जारी गरी गठबन्धनको एउटा प्रमुख सूत्रधारको हैसियतले गठबन्धनले प्राप्त गरेको अपार सफलताबाट ज्यादै हर्षित भएको उल्लेख गरे ।

आफू व्यक्तिगत रुपमा पराजीत हुन परे पनि पार्टी र समग्र वाम गठबन्धनले हासिल गरेको अद्वितीय विजयले आफ्नो पराजयबाट रत्तिभर पनि निराशाबोध भएको छैन भन्दै उनले जनताले वाम गठबन्धनप्रति देखाएको यो अगाढ प्यार र विश्वासले अत्यन्त उत्साहित बनाएको बताए ।

'यो गठबन्धन क्रमशः पार्टी एकतामा रुपान्तरण हुँदै समाजवाद निर्माणको महत्वपूर्ण अध्यायमा मुलुक प्रवेश गर्ने कुरामा म विश्वस्त छु । यस विषयमा आफूले प्रस्तुत गर्नुपर्ने भूमिका र जिम्मेवारीमा म सधैँ, उत्तिकै र अझ ऊर्जाका साथ लागिपर्ने विश्वास पनि दिलाउन चाहन्छु,' विज्ञप्तिमा भनिएको छ । 

एमाले उपाध्यक्ष गौतमले आगामी दिनमा राष्ट्र, राष्ट्रियता र जनताको हितमा सक्रिय रहने प्रतिबद्धता जनाउँदै बर्दिया क्षेत्र नं १ का मतदाता एवं सम्पूर्ण जनतालाई मत दिएकामा आभार व्यक्त गरेका छन् ।

गठबन्धनले प्राप्त गरेको अपार विजयले हामी सबैको काँधमा धेरै जिम्मेवारी र चुनौती थपेको उल्लेख गर्दै उपाध्यक्ष गौतमले नेपाली जनताले वाम गठबन्धनप्रति देखाएको अतुलनीय विश्वासलाई रत्तिभर पनि निराश हुन नदिने बताए ।

प्रकाशित : मंसिर २४, २०७४ २१:११
ADVERTISEMENT
प्रतिक्रिया
पठाउनुहोस्
ADVERTISEMENT

कोइरालाको क्षेत्रमा फोरमको झन्डा

ठाकुरसिंह थारू

नेपालगन्ज — कांग्रेसको ऐतिहासिक क्षेत्र मानिने बाँकेको प्रतिनिधिसभा क्षेत्र २ मा संघीय समाजवादी फोरम नेपालका इस्तियाक राई विजयी भएका छन् । उनले वाम र लोकतान्त्रिक दुवै गठबन्धनका उम्मेदवारलाई पछि पारे ।

 
मुख्य निर्वाचन अधिकृतको कार्यालयका अनुसार राईले २१ हजार ५ सय ७५ मत पाए । निकटतम प्रतिस्पर्धी वाम गठबन्धनका पशुपतिदयाल मिश्राले १५ हजार ९ सय ५१ र लोकतान्त्रिकका ओमप्रकाश आजादले ११ हजार ६ सय ५१ मत पाए । मिश्रा स्वतन्त्र राजनीतिक समूहको तर्फबाट सूर्य चिह्न लिएर प्रतिस्पर्धामा उत्रेका थिए । राप्रपाका आजादलाई कांग्रेसले समर्थन गरेको थियो ।
 
कांग्रेस सभापति तथा पूर्वप्रधानमन्त्री स्वर्गीय सुशील कोइराला यही क्षेत्रबाट चुनाव लड्ने भएकाले यहाँको प्रतिस्पर्धालाई रोचक मानिएको थियो । तर, दुवै गठबन्धन पराजित हुँदा राई दोस्रो पटक संसद् सदस्य चुनिए । २०६४ को पहिलो संविधानसभा चुनावमा विजयी भएपछि राई २६ वर्षकै उमेरमा श्रम तथा यातायात मन्त्री भएका थिए । 
 
विजयपछि उनले नेपालगन्जको विकासलाई गति दिने बताए । ‘नेपालगन्जको मुहार फेर्ने मेरो प्रतिबद्धता छ । त्यससँगै यहाँको समग्र विकासका लागि निरन्तर लडिरहनेछु,’ उनले भने, ‘पहिचानको मुद्दालाई पनि सदनमा उठाउनेछु ।’
 
क्षेत्र ३ मा रोकाया
बाँके प्रतिनिधिसभा क्षेत्र ३ मा भने एमालेका नन्दलाल रोकाय ३१ हजार ६ सय १ मत ल्याएर विजयी भएका छन् । उनका प्रतिस्पर्धी बादशाह कुर्मीले २६ हजार ६ सय १७ मत पाए । 
 
रोकाय २०२८ देखि वामपन्थी आन्दोलनमा लागेका थिए । एमाले बाँकेको जिल्ला अध्यक्षसमेत भइसकेका रोकायले विजयपछि जनताको भावना सम्बोधन हुने गरी काम गर्ने प्रतिबद्धता जनाए । ‘जिल्लाको विकासका काममा निरन्तर खटिने मेरो प्रतिबद्धता हो,’ उनले भने । प्रतिनिधिसभा क्षेत्र १ मा भने गणना जारी छ । 
 
प्रदेशमा वाम
अधिकांश प्रदेशसभा क्षेत्रमा भने वाम गठबन्धनका उम्मेदवार विजयी भएका छन् । प्रतिनिधिसभा १ को प्रदेश ‘क’ मा माओवादी केन्द्रकी उम्मेदवार कृष्णा केसी १३ हजार ४ सय ३६ मत ल्याएर विजयी भइन् । 
 
प्रतिनिधिसभा २ को प्रदेश ‘क’ मा संघीय समाजवादी फोरमका विजय यादव ११ हजार ५ सय ७४ मत पाएर विजयी भए । प्रदेश ‘ख’ मा लोकतान्त्रिक गठबन्धनका तर्फबाट कांग्रेसका सुरेन्द्र हमाल ९ हजार २ सय ११ मत पाएर विजयी भएका छन् ।
 
प्रतिनिधिसभा १ को प्रदेश ‘ख’ मा एमालेका बाबुराम गौतमले ११ हजार ८ सय ७७ मत ल्याएर विजय हासिल गरेका छन् । प्रतिनिधिसभा क्षेत्र ३ को प्रदेश ‘क’ मा माओवादी केन्द्रका इन्द्रप्रसाद खरेल १६ हजार ६ सय ७५ मत पाएर विजयी भएको मुख्य निर्वाचन अधिकृतको कार्यालयले जनाएको छ । 

प्रकाशित : मंसिर २४, २०७४ २१:०१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT