सरकार गठनका लागि मार्गप्रशस्त गर्न वाम गठबन्धनको आग्रह

स्वतन्त्र परराष्ट्रनीतिको अनुशरण गरिने
शेखर अधिकारी

काठमाडौं — नेकपा एमाले र माओवादी केन्द्रले सरकार गठनका लागि मार्गप्रशस्त गर्न आग्रह गरेका छन् । काठमाडौंमा आइतबार संयुक्त पत्रकार सम्मेलन गर्दै दुवै पार्टीले प्रतिनिधिसभा र प्रदेशसभा निर्वाचनबाट प्राप्त नयाँ जनादेशलाई ध्यान दिएर सरकार गठनका लागि मार्गप्रशस्त गर्न शेरबहादुर देउवा नेतृत्वको सरकारलाई आग्रह गरेका हुन् ।

नेकपा एमाले र माओवादी केन्द्रले सरकार गठनका लागि मार्गप्रशस्त गर्न आग्रह गरेका छन् ।

काठमाडौंमा आइतबार संयुक्त पत्रकार सम्मेलन गर्दै दुवै पार्टीले प्रतिनिधिसभा र प्रदेशसभा निर्वाचनबाट प्राप्त नयाँ जनादेशलाई ध्यान दिएर सरकार गठनका लागि मार्गप्रशस्त गर्न शेरबहादुर देउवा नेतृत्वको सरकारलाई आग्रह गरेका हुन् । सरकार गठनका विषयमा सरकार र नेपाली कांग्रेसले संविधानको गलत व्याख्या गरिरहेको भन्दै त्यसले जनमतको अवमूल्यन भएको दुई पार्टीको निष्कर्ष छ । एमाले र माओवादी केन्द्र पार्टी एकतासम्म पुग्ने भन्दै वाम गठबन्धन बनाएर निर्वाचनमा गएका थिए ।

'सरकारलाई संविधानको गलत व्याख्या नगर्न, संविधान कार्यान्वयनमा अवरोध नगर्न र लोकतान्त्रिक प्रक्रियाबाट प्रकट भएको जनमतलाई अवमूल्यन र अनादर नगर्न आग्रह गर्छौं' विज्ञप्तिमा भनिएको छ, 'ताजा जनादेशअनुरुप नयाँ सरकार गठनका लागि मार्गप्रशस्त गर्न आह्वान गर्दछौं ।' पत्रकार सम्मेलनमा एमाले उपाध्यक्ष भीम रावलले संयुक्त विज्ञप्ति पढेर सुनाएका थिए । निर्वाचनको परिणाम आइसकेपछि सत्ता हस्तान्तरण गर्नुपर्नेमा कांग्रेस नेतृत्वको कामचलाउ सरकारले सरुवा, बढुवा र देशमा दूरगामी असर पर्ने निर्णय गरेको भन्दै गठबन्धनले आपत्ति जनाएको छ ।

देशमा स्थिरता, विकास र समृद्धिका लागि वामपन्थी नेतृत्वमा सरकार बनाउन आफूहरु प्रतिबद्ध रहेको भन्दै गठबन्धनले निर्वाचनका केन्द्रीय घोषणा पत्र र स्थानीय प्रतिबद्धता कार्यान्वयन गरी जनता र राष्ट्रको सेवामा समर्पित हुने संकल्प पनि गरेको छ । प्रतिपक्षी दलबाट रचनात्मक भूमिको अपेक्षा नयाँ सरकारको रहने उल्लेख गरिएको छ ।

नेपालको संविधानद्वारा निर्देशित स्वतन्त्र परराष्ट्रनीतिको अनुशरण गर्दै सबै मित्रराष्ट्र र विशेषत: छिमेकी देशहरु तथा अन्तर्राष्ट्रिय संघ संस्थाहरुसँग सुमधुर सम्बन्ध राख्ने पनि गठबन्धनले प्रतिबद्धता दोहोर्‍याएको छ ।

काठमाडौंको दरबारमार्गस्थित होटल अन्नपूर्णमा आयोजित पत्रकार सम्मेलनमा एमाले अध्यक्ष केपी ओली, माओवादी केन्द्रका अध्यक्ष पुष्पकमल दाहालसहित गठबन्धनका शीर्ष नेता सहभागी थिए ।

नेकपा (एमाले) र नेकपा (माओेवादी केन्द्र) को संयुक्त प्रेस वक्तव्य

२०७४ मंसीर १० र २१ गते सम्पन्न प्रतिनिधिसभा तथा प्रदेशसभा सदस्यको निर्वाचनमा नेकपा (एमाले), नेकपा (माओवादी केन्द्र) समेतका साझा वामपन्थी उम्मेद्वारहरुको पक्षमा मतदान गर्नुहुने र हामीलाई अत्याधिक वहुमतका साथ निर्वाचित गर्नुु हुने दिदिबहिनी तथा दाजुभाइहरुलाई हार्दिक धन्यवाद ज्ञापन गर्दछौं । निर्वाचन परिचालन एवं प्रचार–प्रसारमा सक्रियतापूर्वक लाग्नुहुने वामपन्थी दलहरुका सम्पूर्ण नेता, कार्यकर्ता तथा सदस्यहरु तथा हाम्रो निर्वाचन अभियानको पक्षमा विभिन्न ढंगले सरिक राजनीतिक दलहरु,उम्मेदवारहरु र प्रचारकहरुलाई धन्यवाद ज्ञापन गर्दछौं । जनताबाट निर्वाचित हुनुभएका प्रतिनिधिसभा तथा प्रदेशसभाका सदस्यहरुलाई हार्दिक वधाई दिंदै सफल कार्यकालका लागि शुभकामना व्यक्त गर्दछौं ।
त्यसैगरी आ–आफ्नो आस्था एवं विश्वासको आधारमा विभिन्न पार्टी एवं उम्मेदवारहरुको पक्षमा मतदान गरेर संविधानको कार्यान्वयन र लोकतन्त्रको सवलीकरणमा योगदान गर्नुहुने सम्पूर्ण मतदाताहरुलाई धन्यवाद ज्ञापन गर्दछौं । निर्वाचनको प्रभावकारिता अभिवृद्धि गर्न योगदान गर्नुहुने सञ्चारकर्मी एवं सञ्चार माध्यमहरुप्रति धन्यवाद व्यक्त गर्दछौं । स्वतन्त्र एवं निष्पक्ष निर्वाचनका लागि भूमिका निर्वाह गर्नुहुने निर्वाचन आयोग, राष्ट्रसेवक कर्मचारी एवं सुरक्षाकर्मीहरुलाई धन्यवाद ज्ञापन गर्दछौं ।
हामीले राजतन्त्रको अन्त्य, संविधानसभाको निर्वाचन र संघीय लोकतान्त्रिक गणतन्त्रको स्थापना गर्नमा नेतृत्वदायी भूमिका निर्वाह गरेका छौं । अनेक प्रकारका अवरोधहरुलाई पन्छाउँदै संविधानसभाबाट संविधान जारी गर्नमा निर्णायक भूमिका निर्वाह गरेका छौं । नेपाली समाजमा विद्यामान सबै प्रकारका विभेद, असमानता र शोषण, उत्पिडन विरुद्धको संघर्षमा नेतृत्वदायी भूमिका निर्वाह गरेका छौं । राष्ट्रिय स्वाधीनता, समृद्धि, समानता र सामाजिक न्यायको पक्षमा निर्णायक भूमिका निर्वाह गरेका छौं । सरकारको नेतृत्वमा रहँदा जनता र राष्ट्रको पक्षमा रचनात्मक र सकारात्मक भूमिका निर्वाह गरेका छौं । अब हामी संक्रमणकाललाई समाप्त गर्न, राजनीतिक स्थायीत्व कायम गर्न, संविधानको रक्षा र कार्यान्वयन गर्दै समृद्धि हासिल गर्न, लोकतन्त्रलाई सवल र सुदृढ तुल्याउँदै लोकतन्त्रलाई जीवन पद्धतीको रुपमा स्थापित गर्न, राष्ट्रिय स्वाधीनता,एकता र सामाजिक सद्भाव, सार्वभौमसत्तालाई सुदृढ तुल्याउन र सुखी जीवनको नेपाली चाहनालाई व्यवहारिक रुपमा सार्थक तुल्याउन प्रतिवद्ध छौं । नेपालको संविधानद्घारा निर्देशित स्वतन्त्र परराष्ट्र नीतिको अनुशरण गर्दै हामी सबै मित्र राष्ट्र,विशेषतः छिमेकी देशहरु त्था अन्तराष्ट्रिय संघ,संस्थाहरुसंग सुमधुर सम्बन्ध कायम गर्न कटिबद्ध छौं ।
यही उद्देश्यका साथ हामीले पार्टी एकता गर्ने घोषणा गरेका हौं र यस निर्वाचनमा आपसी तालमेल गरेका हौं । हामी नेकपा (एमाले), नेकपा (माओवादी केन्द्र) समेत वामपन्थी शक्तिको नेतृत्वमा स्थीर सरकार निर्माण गर्न र उपरोक्त वमोजिका उद्देश्य हासील गर्न प्रतिवद्ध छौं । निर्वाचनका क्रममा प्रस्तुत गरिएको केन्द्रीय घोषणा पत्र तथा स्थानीय प्रतिवद्धताको कार्यान्वयन गर्दै जनता र राष्ट्रको सेवामा समर्पित हुन संकल्पवद्ध छौं ।
हामीले प्रतिपक्षको संवैधानिक व्यवस्थालाई प्रभावकारी रुपमा कार्यान्वयन गर्नेछौं र प्रतिपक्षबाट पनि रचनात्मक भूमिकाको अपेक्षा गर्दछौं । त्यसैगरी सबै मतदाता, राष्ट्रसेवक कर्मचारी, सुरक्षाकर्मी र संचारकर्मीहरुबाट पनि साथ, समर्थन र सहयोगको अपेक्षा गर्दछौं ।
निर्वाचन परिणाम प्रकाशित भए पश्चात् सार्वजनिक भएका वर्तमान कामचलाउ सरकारका अभिव्यक्ति र कृयाकलापहरु नेपालको संविधान, अन्तराष्ट्रिय प्रचलन र हाम्रै विगतका अभ्यास विपरीत छन् । सरकारको यस किसिमको व्यवहारबाट सरकार गठन, संविधान कार्यान्वयन र लोकतन्त्रको सहज अभ्यासमा अवरोध सृजना हुनुका साथै जनमतको अवमूल्यन तथा अनादर समेत भएको छ । हामी सरकारलाई संविधानको गलत व्याख्या नगर्न, संविधानको सहज कार्यान्वयनमा अवरोध सृजना नगर्न र संविधान सम्मत एवं लोकतान्त्रिक विधिका साथ प्रकट भएको जनमतलाई अवमूल्यन तथा अनादर नगर्न र ताजा जनादेश अनुरुप नयाँ सरकार गठन गर्नका लागि मार्ग प्रशस्त गर्न आह्वान गर्दछौं ।

केपी शर्मा ओली
अध्यक्ष
नेकपा (एमाले)

पुष्पकमल दाहाल 'प्रचण्ड'

अध्यक्ष

नेकपा (माओवादी केन्द्र)

मिति : २०७४ पुष २ गते

प्रकाशित : पुस २, २०७४ १४:१४
प्रतिक्रिया
पठाउनुहोस्

नेपाललाई यू-१६ इस्टर्न रिजनको उपाधि

कान्तिपुर संवाददाता

काठमाडौं — नेपाल यू-१६ राष्ट्रिय क्रिकेट टोलीले सिंगापुरलाई पराजित गर्दै एसीसी यू-१६ इस्टर्न रिजन प्रतियोगिताको उपाधि जितेको छ । आइतबार भएको फाइनलमा नेपालले सिंगापुरलाई ७१ रनले पराजित गर्‍यो ।

टस जितेर ब्याटिङ रोजेको नेपालले निर्धारित ३५ ओभरमा ६ विकेट गुमाउँदै १ सय ८३ रन जोडेको थियो । नेपालका लागि नियमित कप्तान रीत गौतमको स्थानमा कप्तानी गरिरहेका विशाल केसीले ६३ रन जोडे । रीत चोटका कारण फाइनलमा उपस्थित रहेनन् । नारायण जोशीले २३ बलमा अविजित ४६ रन जोडेपछि नेपालले बलियो लक्ष्य प्रस्तुत गरेको थियो ।

जवाफी ब्याटिङमा उत्रिएको सिंगापुरले ३२ हौं ओभरमा सबै विकेट गुमाउँदै १ सय १२ रन मात्र जोड्न सक्यो । नेपालका लागि सूर्य तामाङ र अजय कुमार लुनियाले ३-३ विकेट लिए ।

नेपालले २०१४ मा मलेसियामा एसीसी यू-१६ प्रिमियरको नामले आयोजना गरेको पछिल्लो प्रतियोगिता पनि जितेको थियो। 

प्रकाशित : पुस २, २०७४ १४:१४
पूरा पढ्नुहोस्
प्रतिक्रिया
पठाउनुहोस्