किशुनजीलाई सम्झिंदै ओलीले भने,‘जीवन रहेसम्म इमानका साथ काम गर्छु’
ललितपुर — एमाले अध्यक्ष केपी शर्मा ओलीले सीमित रहे पनि आफ्नो आयुको चिन्ता कहिल्यै नलिने बताएका छन् ।
पूर्वप्रधानमन्त्री कृष्णप्रसाद भट्टराईको ९४ औं जन्मजयन्तीलाई ललितपुरमा शनिबार सम्बोधन गर्दै ओलीले जीवन रहेसम्म इमानका साथ काम गर्ने उल्लेख गरे ।
‘११ वर्षअघि किड्नी फेरेको, कहिले निमोनिया, कहिले मेनेन्जाइटिस भएर गयो–गयो भन्नेजस्तो भए पनि,’ उनले भने, ‘सबैको आयुको सिमा हुन्छ, असीमित आयु कसैको छैन, मेरो पनि आयुको सीमा छ, तर आयुको विषयमा म चिन्ता गर्दिन ।’
अध्यक्ष ओलीले आयु, ज्ञान, सामर्थ्य सीमित भए पनि आफू इमानको सीमा राख्नुपर्छ भन्ने पक्षमा नरहेको बताए । ‘सम्पूर्ण इमानका साथ काम गर्नुपर्छ, इमानको सीमा हुँदैन,’ उनले भने, ‘राजनीतिमा यतिसम्म चल्छ, राजनीतिमा यति बेइमानी गर्न मिल्छ भनेर ठाउँ राख्दिनँ ।’ विकास भनेको बाटो, बिजुली, सञ्चार र शिक्षामात्र नभई इतिहासको संरक्षण पनि रहेको उनको भनाइ थियो ।
ओलीले चुनावका बेलामा दलहरुबीच मनमुटाव रहनु स्वभाविक रहेको भन्दै विकासका लागि सबै दल एक हुनुपर्नेमा जोड दिए । ‘म गाउँमा गाईभैंसी चराएर हुर्किएको ठिटो, हलीको छोरो, गोठालाको छोरालाई शासकीय रवाफ छैन,’ उनले भने, ‘मैले के दम्भ देखाउने ?’