वामपन्थी समीकरणको विकल्प छैन : दाहाल

पूर्वी नवलपरासीको कावासोतीस्थित पार्टी कार्यालयमा शनिबार कार्यकर्तामाझ उनले भने, ‘निर्वाचन परिणाम आउने क्रममा केही साथीले मधेसवादी दलसँग मिलेर सरकार बनाउन खोजे पनि अन्तिममा वामपन्थीकै पक्षमा जनमत देखिएकाले उनीहरू विफल भए ।’ एमालेकै केही व्यक्ति मधेसवादी दलसँग मिलेर सरकार बनाउने प्रयासमा लागेको खुलाउँदै उनले त्यसले सार्थकता पाउन नहुनेमा दुवै पार्टीको नेतृत्व सजग रहेको बताए । वाम गठबन्धन सरकारको विकल्प नरहेको उनले दोहोर्‍याए ।

आफ्नै प्रस्तावमा वाम गठबन्धन बनेकाले त्यसैअनुसार पार्टी एकता हुनेमा ढुक्क हुन दाहालले कार्यकर्तालाई आश्वस्त पारे । उनले माओवादी केन्द्र जता गयो त्यतै सरकारका लागि बहुमत पुग्ने भएकाले आफूहरू नै अहिलेको शक्ति रहेको दाबी गरे । ‘अरूको सहयोगमा सरकार गठन गर्न खोज्नु जनादेशविपरीत हुनेछ,’ दाहालले भने, ‘केही साथीहरूले त्यस्तो असफल प्रयास गरे पनि अन्ततोगत्वा वाम गठबन्धनकै सरकार बन्नेमा ढुक्क छु ।’