रेशमको रिटमाथि सर्वोच्चको दरपिठ
काठमाडौँ — फौजदारी अभियोगमा फरार आरोपी एवं कैलाली क्षेत्र १ बाट निर्वाचित सांसद रेशम चौधरीलाई आफैं उपस्थित भएर निर्वाचित भएको प्रमाणपत्र बुझाउनुपर्ने सर्वोच्च अदालतले आइतबार आदेश दिएको छ । वारेसमार्फत प्रमाणपत्र बुझी पाऊँ भन्ने उनको निवेदन अस्वीकृत गरेको प्रशासनको निर्णयलाई सर्वोच्चले सदर गरेको छ ।
आफूलाई साधारण तारेखमा छाड्नुपर्ने चौधरीको दाबीसहितको निवेदन न्यायाधीश टंक मोक्तानको एकल इजलासले अस्वीकृत गर्ने दरपिठ आदेशसमेत सदर गरेको छ । ‘आफू निर्दोष भए वा आफूमाथिको आरोप झुटो भए प्रक्रियाबाटै सफाइ लिनुपर्ने,’ आदेशमा उल्लेख छ । अभियोग लागेको अवस्थामा त्यसलाई बेवास्ता गरी अरू सुविधा दिन नमिल्ने सर्वोच्चले रायसमेत दिएको छ ।