हचुवाको भरमा खोला थुन्ने बाँध, दुई सातामै भत्कियो

भरत जर्घामगर

सिरहा — लागत इष्टिमेट र प्राविधिक डिजाइनबिनै हचुवाको भरमा खोला थुन्न बनाइएको ‘बालुवा बाँध’ भत्किएको छ । 

लहान नगरपालिकाको मध्य भागबाट बग्ने खुट्टी खोलामा सिंचाईका लागि बनाइएको बाँध दुई हप्तामै भत्किएको हो । यसबाट पाँच लाख रुपैयाँभन्दा बढी लागत रकम खेर गएको छ ।

Yamaha

प्राविधिक डिजाइन र लागत इष्टिमेटबिना ३२ वर्षभन्दा अघिदेखि बन्द रहेको नहरमा पानी चढाउन नगरपालिकाले खुट्टी खोलामा साढे तिन मिटर अग्लो डेढ किलोमिटर लम्बाईको बालुवाको बाँध निर्माण गरेको थियो । एक्साभेटरबाट बालुवा तानेर सतहमा ५ देखि ६ र टुप्पोमा डेढदेखि साढे दुई मिटर चौडाईको बाँध निर्माण गरिएको थियो ।

नगरपालिकाले बालुवाले भरेर बाँध निर्माणका लागि प्रतिघण्टा ३ हजार ३ सय रुपैयाँ लागत दरमा एक्साभेटर भाडामा लिएको थियो । ‘बाँध निर्माणका लागि घण्टाको हिसावमा एक्साभेटर भाडामा ल्याइएको थियो,’ सव ईन्जिनियर शिवशंकर चौधरीले ‘नहर सफाई र बालुवा बाँध निर्माणका लागि डेढ सय घण्टा जति एक्साभेटर चलेको छ ।’

उनले भने, ‘खोला र नहरको सतह हेर्दा पनि पानी चढने कुनै सम्भावना थिएन ।’

बाँध निर्माणका लागि कुनै प्राविधिक डिजाइन र इष्टिमेट नभएको उनले जनाए । स्थानीय सरकारको रुपमा क्रियाशील नगरपालिकामा प्राविधिक लगायत विषयगत फाँट छन् । बाँध निर्माण योजनाबारे प्राविधिक तथा योजना शाखाले जानकारी नभएको जनायो ।

लहान नगरपालिकाले हचुवाको भरमा खुट्टी खोलामा निर्माण गरेको बालुवाको बाँध र भत्केको बाँधस्थल । तस्बिर : भरत जर्घामगर/कान्तिपुर

प्रकाशित : पुस ९, २०७४ १८:४९
ADVERTISEMENT
प्रतिक्रिया
पठाउनुहोस्
ADVERTISEMENT

यूएईमा शुभयात्रा साँझ 

कान्तिपुर संवाददाता

युएई — मध्यपूर्वको दुवईमा तापक्रम घट्दोक्रममा थियो । हिउँदको मौसममा पनि दुबईलाई गरम बनाइदिने अरु कोही नभएर नायिका नम्रता सापकोटा थिइन् । नायिका सापकोटाको नृत्यले दुबईको माहोल एकाएक खपिनसक्नु गरम बनाइदियो । साथमा गायकद्वय हेमन्त राना र रामकृष्ण ढकाल, गायिका इन्दिरा जोशी र हाँस्य कलाकार सन्दिप क्षत्री थिए । 

गत शुक्रबार २२ तारिकका दिन सम्पन्न कार्यक्रम शुभयात्रा साँझमा हेमन्त रानाको ‘साँहिली’ गीतले दर्शकलाई निकै नै भाबुक बनायो। घरदेशमा श्रीमती छोडेर परदेशमा पैसा कमाउन हिडेको परदेशीको काहानीमा लेखिएको गीत गाउँदै गर्दा अधिकांश परदेशी दर्शकमा मौनता छाएको थियो। आफ्नो जवानी बिदेशमा कटाएर ४० बर्ष उमेर कटेपछि पैसा कमाएर सँगै रमाउला है भन्ने गीतको भाबले परदेशीको यथार्थता झल्काउछ। गीतकार काली प्रसाद बास्कोटाको शब्द रहेको ‘साँहिली’ गीत रानाले गाँउदै गर्दा दर्शकले खचाखच भरिएको हल सुनशान भयो।

कान्तिपुर टेलिभिजनमा वट्स द फ्लप कार्यक्रम चलाएर नाम कमाएका अर्का चर्चित कलाकार हाँस्यब्यङ्यकार सन्दीप क्षेत्रीले हेमन्त रानाको गीतले छाएको मौनतालाई भङग गरिदिए।दर्शक सरोज बिष्ट भन्छन, ‘सन्दीपले केही पनि गरेनन् तर हामीले नहाँसेको क्षण थिएन।’ सन्दीप क्षेत्रीको हाँस्यब्यङ्यमा कुनै काहानी थिएन तर पनि उनको प्रस्तुतीभर दर्शकले पेट मिचीमिची नहाँसेको पल थिएन। उनको हाँस्यब्यङ्यका प्रत्येक पलमा दम दियो। उपस्थित दर्शकहरुले सबैभन्दा बढी मनोरन्जन उनकै प्रस्तुतीबाट लिए।

नेपाली सकिराकी पहिचान बनाएकी गायिका इन्दिरा जोशीको बेजोडको प्रस्तुतीले दर्शकलाई नचायो। सेतो पहिरनमा स्टेजमा उत्रेकी गायिका जोशी निकै नै हट देखिन्थिन्। शालिन र उमेरदार ‘भिआईपी’ दर्शकहरु दर्शक दिर्घाको पहिलो लाईनमा बसेकाले जोशीले जतिसुकै जोश देखाए पनि ती दर्शकले जोश नदेखाएको गायिका जोशीको भाबमा झल्किन्थ्यो। उनी दर्शकहरुलाई नाच्न भन्थिन् तर दर्शकहरु भने बसेरै मज्जा लिइरहे।

बिहानै उठ्ने बित्तिकै हिमाल देख्न पाईयोस भन्ने राष्ट्रप्रेम भाबले ओतप्रोत गीतले उपस्थित दर्शकलाई भाबुक बनाउदै स्टेजमा उत्रेका सुमधुर स्वरका धनी राम कृष्ण ढकालको प्रस्तुती दर्शकले सोचे भन्दा अब्बल रह्यो। यस्तो लाग्थ्यो उनी अहिलेको युवा पिढीमा पनि उत्तिकै लोकप्रिय छन्। १२ बर्ष पछि दोश्रो पटक दुबई आएका ढकालले दर्शकलाई भरपुर मनोरन्जन प्रदान गरे। दर्शक दिर्घामा गायक हेमन्त रानाले भनेजस्तै ४० बर्ष उमेर कटेका दर्शकहरु प्रशस्तै रहेकाले पनि गायक ढकालको गीतहरु सुनेर धेरै दर्शकले मनोरन्जन लिएको देखिन्थ्यो।

युएईमा हुनेगरेका अन्य कार्यक्रमहरु भन्दा भिन्दै र सफल कार्यक्रमबाट प्राप्त मुनाफा अनाथ बालबालिकाको लागि खर्च गरिने कार्यक्रम आयोजक मनोज श्रेष्ठ गोर्खालीले जानकारी दिए।

प्रकाशित : पुस ९, २०७४ १८:३४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT