दीपक मनाङे डिल्लीबजार कारगार चलान
काठमाडौँ — हिजो राति पक्राउ परेका गुण्डा नाईके दीपक मनाङेको बाँकी कैद भुक्तान गर्नका लागि प्रहरीले डिल्लीबजार कारगार चलान गरेको छ ।
प्रहरी परिसर काठमाडौंले फरार रहँदै आएका मनाङेलाई बिहिबार राति स्वयम्भु क्षेत्रबाट पक्राउ गरेको थियो ।
प्रदेश सभामा मनाङबाट स्वतन्त्र उम्मेदवारका रुपमा विजयी भएका उनी १२ वर्ष अघिको एक ज्यान मार्ने उद्योगका फरार अभियुक्त हुन् । २०६१ बैशाख ३१ गते महाराजगंजको एक चिनियाँ रेस्टुरेन्टमा अर्का गुन्डा नाईके चक्रे मिलनको बायाँ हातमा धारिलो हतियार प्रहार गरेको मुद्दामा उनलाई पुनरावेदन अदालत पाटनले ५ वर्षको कैद सजाय सुनाएको थियो ।
मनाङेले यसअघि नै दुई वर्ष जेल बसिसकेका हुनाले अब बाँकी तीन वर्ष (२०७८ बैशाख ६ गतेसम्म) कैद सजाय भुक्तान गर्नुपर्ने प्रहरी परिसरका प्रवक्ता डिएसपी मोहन थापाले बताए ।
प्रहरी स्रोतका अनुसार पछिल्लो केही साता यता मनाङे प्रहरीलाई छक्काउँदै हेटौंडा, नुवाकोट र धादिङमा लुक्दै हिँडिरहेका थिए । स्रोतका अनुसार प्रहरी परिसर काठमाडौंले केही दिन अघि पाँचजनाको टोली मनाङेलाई पक्राउ गर्न नुवाकोट खटाएको थियो ।
तीन दिन नुवाकोट बसेर प्रहरीको टोली रित्तो फर्केको थियो भने मनाङे प्रहरीलाई छक्काएर काठमाडौं छिरेका थिए ।
प्रकाशित : वैशाख ७, २०७५ ११:४०