भरुवा बन्दुकसहित ३ पक्राउ
लमजुङ — राइनास नगरपालिका-१० बोराङबाट भरुवा बन्दुकसहित ३ जना पक्राउ परेका छन् ।
घरमा अवैध रुपमा भरुवा बन्दुक लुकाएर राखेको सूचना पाएपछि ४६ वर्षीय गाइने सुनार, २६ वर्षीय सन्तोष विक र ३९ वर्षीय गजेन्द्र विकलाई पक्राउ गरेको प्रहरी नायव उपरीक्षक यादव ढकालले बताए ।
प्रहरीले बुधबार गाइने सुनार र गजेन्द्र विकको घरबाट २ थान भरुवा बन्दुक बरामद गरेको थियो । यस्तै सन्तोष विकले छिमेकीको खेतबाट लुकाएर राखेको १ नाले भरुवा बन्दुक बरामद गरिएको छ ।
उनीहरुलाई हातहतियार खरखजाना मुद्दामा म्याद थप गरी अनुसन्धान थालिएको प्रहरीले जनाएको छ ।
यस्तै, प्रहरीले बेंसीसहर नगरपालिका-८ शेराबजारमाको खाजा पसलमा तास खेल्दै गरेका ५ जनालाई बुधबार पक्राउ गरेको थियो । उनीहरुको साथबाट नगद ४८ हजार ७ सय ५५ र १ सय ६० तासका पत्ति बरामद गरेको प्रहरीले जनाएको छ ।