संहिता सच्याउन जनजाति महासंघको माग
काठमाडौँ — नेपाल आदिवासी जनजाति महासंघले भदौ १ गतेबाट लागू भएका अपराध र देवानी संहिता एकल जातिवादी र नश्लवादी भएको भन्दै सच्याउन माग गरेको छ ।
महासंघले गृहमन्त्री रामबहादुर थापालाई ज्ञापनपत्र बुझाउँदै यस्तो माग गरेको हो । महासंघले राष्ट्रिय जनावरबाट गाईलाई हटाउनुपर्नेलगायत माग राखेर नाङ्गो प्रदर्शन गर्दा पक्राउ परेका बिकेन लिम्बुलाई रिहा गर्न आग्रह गरेको छ ।
साथै महासंघले गोबधको झूटो आरोपमा पक्राउ गरिएकालाई रिहा गर्न गृहमन्त्रीसमक्ष माग गरेको छ ।
‘लोकतन्त्र र धर्मनिरपेक्षताको मूल्यमान्यता र प्रचलित सिद्धान्तबमोजिम मानव अधिकारको रक्षा गर्दै अनाहकमा पीडित बनाइएका, विभिन्न जेल र हिरासतमा राखिएकालाई बिनासर्त रिहा गर्न सरकारसँग जोडदार माग गर्दछौं,’ महासंघकी कार्यवाहक अध्यक्ष कृष्णकुमारी शेरचनले बुझाएको ज्ञापनपत्रमा भनिएको छ ।
पढ्नुहोस्, ज्ञापन पत्र
प्रकाशित : भाद्र ५, २०७५ २०:०२