अस्पताल जाँदा साँघुबाट खसेर मृत्यु
बझाङ — उपचारको लागि जिल्ला अस्पताल हिडेका एक जना बृद्धको साँघुबाट खसेर मृत्यु भएको छ । छविस पाथिभेरा गाउँपालिका–६ बगडाका ७९ वर्षीय भन्टुरे चलाउनेको साँघुबाट खसेर ज्यान गएको हो ।
सोमबार साँझ स्थानीय तिलगंगा भन्ने खोलामा रहेको काठको साँघुबाट चिप्लिएर उनि खोलामा खसेका थिए । साँघु रहेको ठाउँ भन्दा करिब दुई सय मिटर तल उनको शव फेला परेको प्रहरीले जनाएको छ ।
दमका बिरामी चलाउने उपचारका लागि सदरमुकाम चैनपुरमा रहेको जिल्ला अस्पताल जान घरबाट हिडेका थिए । उनको शव पोष्टमार्टम पछि आफन्तको जिम्मा लगाइएको प्रहरीले जनाएको छ ।
यहाँका नदी तथा खोलामा झोलुङ्गे पुल नहुदा बर्षेनी धेरै मानिसहरुले ज्यान गुमाउदै आएका छन । गत साउनमा स्कुलबाट घर फर्कदै गरेका दुई बालिकाको बाहुलीगाड खोलामा रहेको साँघु तर्ने क्रममा खसेर मृत्यु भएको थियो ।
प्रकाशित : आश्विन ९, २०७५ १३:५९