रुख कटान सुरु

राप्ती पीडित सामुदायिक वनको टाँचा नं १३५ रुखलाई संघीय सांसद महेश्वर गहतराज र प्रदेशसभा सदस्य कृष्णा केसीले आरा चलाएर रुख काट्न सुरु गरेका थिए ।

राप्तीपारि क्षेत्र बघौडामा विद्युत पुर्याउने उद्देश्यले राप्तीसोनारी गाउँपालिकाको धामपुरमा विद्युतको सबस्टेशन निर्माण गरिए पनि कोहलपुरदेखि धामपुरसम्म विद्युतको लाइन विस्तारका लागि वन क्षेत्रले अवरोध पुर्याउँदै आएको थियो ।

नरैनापुर गाउँपालिकाका ६ वटै वडा र राप्तीसोनारी गाउँपालिकाका केही वडामा विद्युतीकरणका लागि सबस्टेशन धामपुरसम्म ४५ मध्ये ५.३ किलोमिटर वन क्षेत्र पर्ने भएकाले अवरोध हुँदै आएको थियो ।

कोहलपुर-धामपुर ३३ केभिए प्रसारण लाइनका लागि कोहलपुरबाट सबस्टेशन धामपुरसम्म लैजाने बाटामा राप्ती पीडित सामुदायिक वन र समय भवानी सामुदायिक वनको २.२ हेक्टर वन क्षेत्रमा भएका सबै बाधाअड्काउ फुकुवा गरी ५ दशमलव ३ किमी रहेका २१४ रुख काट्न स्वीकृतिसँगै टाँचा लगाई रुख काट्न सुरु गरेपछि २०७५ चैतसम्म सो क्षेत्रमा विद्युतीकरण हुने भएको हो ।

बघौडा क्षेत्रमा विद्युतीकरणका लागि भएको लामो समयदेखिको प्रयासले मूर्तरूप पाएको र आउँदो चैतसम्ममा जुनसुकै अवस्थामा पनि बघौडा क्षेत्र विद्युतीकरण भएरै छाड्ने सांसद गहतराजले बताए ।