गाउँपालिका प्रविधिमैत्री

भौगोलिक विकटताका बाबजुद आव ०७४/७५ मा नै ६ वटै वडा कार्यालयमा इन्टरनेट जडान गरिएको प्रमुख प्रशासकीय अधिकृत प्रकाश पौडेलले बताए । इन्टरनेटको विस्तारसँगै सम्पूर्ण वडा कार्यालयहरुमा अनलाइन पद्धतिबाट काम सुरु भएको उनको भनाइ छ । स्थानीय जनतालाई छिटो, छरितो र भरपर्दो सेवा प्रवाह गर्न, संस्थागत स्मरणलाई चुस्त राख्न पेपरलेस र अनलाइन पद्धतिमा काम सुरु गरिएको अधिकृत पौडेलले बताए ।

सूचना प्रविधि अधिकृत सुशील केसीका अनुसार अहिले गाउँपालिका र प्रत्येक वडा कार्यालयमा फाइबर इन्टरनेट जडान, सामूहिक एस.एम.एस, डिजिटल नोटिस बोर्ड, सम्पत्ति कर, भूमिकरलगायत राजस्वको नगदी सफ्टवेयर र अन्य सूचना प्रवधिका पूर्वाधार विकास भएका छन् । कर्मचारीहरुलाई ३ दिने तालिम सञ्चालन गरी कम्प्युटरकृत र अनलाइन पद्धतिबाट काम गर्न सहज गराइएको अधिकृत पौडेलले बताए । ‘यसरी अनलाइनमार्फत काम गर्न कर्मचारीमा दक्षता हासिल भएको छ’ उनले भने । उनले अब केही दिनमा मोबाइल एप्स पनि सञ्चालनमा ल्याइने जानकारी दिए ।

हातले लेख्नु नपर्ने, फाइल पनि दराजमा राख्न/निकाल्न नपर्ने साथै सबै डकुमेण्ट कम्प्युटरमा हुने भएपछि सेवाप्रवाह सरल भएको उनले अनुभव सुनाए ।