प्रधानमन्त्री देउवा राष्ट्रियसभाको निर्वाचन मिति र प्रदेश प्रमुख तोक्ने तयारीमा

केन्द्रीय कार्यसमिति बैठक बोलाउने तयारी
कुलचन्द्र न्यौपाने

काठमाडौँ — प्रधानमन्त्री शेरबहादुर देउवाले पाँच राजनीतिक दलको परामर्शमा राष्ट्रियसभा निर्वाचनको तिथि र प्रदेश प्रमुख नियुक्ति गर्ने भएका छन् ।

पार्टीको पदाधिकारी र केही केन्द्रीय सदस्यको उपस्थितिमा म‌ंगलबार बिहान बसेको बैठकले यी दुवै काम राष्ट्रिय हैसियत प्राप्त पाँच राजनीतिक दलबीच परामर्श गरेर अघि बढ्नुपर्ने सुझाव दिएको थियो । पार्टीको सुझाव अनुसार प्रधानमन्त्री देउवाले आजैदेखि पाँच दलबीच छुट्टाछुट्टै र संयुक्त बैठक बोलाउने भएको नेता विमलेन्द्र निधिले कान्तिपुरलाई बताए । ‘प्रधानमन्त्रीले पाँच दलबीच छुट्टाछुट्टै र संयुक्त बैठक बोलाएर छलफल गरेपछि प्रदेश प्रमुखको नियुक्ति र राष्ट्रियसभा निर्वाचनको तिथि तोक्ने कुरा भएको छ’ निधिले भने,‘वाम गठबन्धनले प्रदेश प्रमुख नियुक्ति नगर्न भन्दै आएका कारणले पनि एकपटक सर्वदलीय छलफल गर्नुपर्छ भन्ने कांग्रेस बैठकको निष्कर्ष हो ।’

Yamaha


प्रधानमन्त्री देउवाले आजै माओवादी केन्द्रका अध्यक्ष पुष्पकमल दाहालसँग यी विषयमा छलफल गर्ने भएका छन् । दाहाललगतै एमाले अध्यक्ष केपी ओली, राष्ट्रिय जनता पार्टी र संघीय समाजवादी फोरमका शीर्षस्थ नेताहरुसँग छलफल गर्ने भएका छन् । निधिका अनुसार दुई दिनभित्र सबैसँग परामर्श गरेपछि सरकार निर्वाचनको तिथि र प्रदेश प्रमुख नियुक्ति गर्ने तयारीमा छ ।
सरकारले स्वतन्त्र र समाजमा प्रतिष्ठित व्यक्तिहरुलाई प्रदेश प्रमुख नियुक्ति गर्ने भन्दै नामहरुका विषयमा दलहरुबीच छलफल गर्न प्रयासमा लागेको हो । कांग्रेस बैठकमा भने प्रदेश प्रमुख हुने नामहरुको विषयमा छलफल भएन । राष्ट्रियसभा निर्वाचन मिति घोषणा गर्न भने प्रधानमन्त्री देउवाले निर्वाचन आयोगका पदाधिकारीसँग समेत छलफल गर्ने तयारीमा छन् । आयोगले यसअघि नै प्रधानमन्त्रीलाई भेटेर तत्कालै मिति तोक्ने आग्रह गरिसकेको छ ।

प्रदेश प्रमुख नियुक्ति भएपछि मात्रै निर्वाचन आयोगले प्रदेशसभा सदस्यको निर्वाचन परिणाम बुझाउन सक्छ । कानुन अनुसार प्रदेशको निर्वाचन परिणाम प्रदेश प्रमुख र प्रतिनिधिसभा निर्वाचन परिणाम राष्ट्रपतिलाई बुझाउने प्रावधान छ । आयोगले प्रदेशको समानुपातिकतर्फको सदस्यको निर्वाचन परिणाम यसै साता टुंग्याउने तयारी गरेको छ । त्यसअघि नै सरकारले प्रदेश प्रमुख नियुक्तिको तयारी अघि बढाउने भएको हो ।
प्रदेशसभा सदस्यसमेतको निर्वाचन मण्डलबाट राष्ट्रियसभा निर्वाचन हुने भएकाले सरकारले प्रदेश प्रमुख नियुक्तिलाई पहिलो प्राथमिकतामा राखेको निधिले बताए ।

केन्द्रीय कार्यसमिति बैठक बोलाउने तयारी
बैठकमा प्रधानमन्त्री समेत रहेका कांग्रेस सभापति शेरबहादुर देउवाले तत्काल केन्द्रीय कार्यसमितिको बैठक बोलाइने आस्वस्त पारेका छन् । निर्वाचनको समीक्षाका लागि युवा नेताहरुले तत्काल केन्द्रीय कार्यसमिति र महासमिति बैठक बोलाउन दबाव दिइरहेका छन् । देउवाले तत्काल केन्द्रीय कार्यसमितिको बैठक र फागुन/चैततिर महासमिति बैठक बोलाउने तयार भएका हुन् ।

कांग्रेस नेता विमलेन्द्र निधिलगायत केही नेताले निर्वाचनको समीक्षाका लागि केन्द्रीय कार्यसमितिको बैठक बोलाउँदा राष्ट्रियसभा निर्वाचनका लागि वातवरण बिग्रन सक्ने भन्दै निर्वाचनको समीक्षा फागुन दोस्रो सातापछि मात्रै गर्नुपर्ने धारणा राखेका थिए । ‘राष्ट्रियसभा निर्वाचन, प्रतिनिधिसभाका लागि समानुपातिक उम्मेदवारको टुंगो लगाउने र सरकार गठनका विषयमा छलफल गर्ने हो भने ठीकै छ’निधिको भनाइ थियो,‘निर्वाचनको समीक्षाका लागि तत्काल बैठक बोलाउँदा राष्ट्रियसभा निर्वाचनको वातावरण बिग्रन सक्छ । त्यसलाई समेत ख्याल गरौं भन्ने हो ।’ सभापति देउवाले निर्वाचनमा पार्टीबाटै धेरै अन्तर्घातको घटना भएकाले त्यसको छानबिन र कारबाहीका लागि प्रक्रिया अघि बढाउन पनि तत्काल केन्द्रीय कार्यसमिति बोलाउन आफू तयार भएको बताएका थिए ।

बैठकमा वरिष्ठ नेता रामचन्द्र पौडेल, महामन्त्री सशांक कोइराला, कोषाध्यक्ष सीतादेवी यादव, पूर्वमहामन्त्री कृष्णप्रसाद सिटौला, निधि, केन्द्रीय सदस्यहरु गोपालमान श्रेष्ठ, रामशरण महत, पूर्णबहादुर खड्का, महेश आचार्य, ज्ञानेन्द्रबहादुर कार्की, बालकृष्ण खाँड, प्रकाशशरण महतको उपस्थिति थियो ।

प्रकाशित : पुस १८, २०७४ १४:४३
ADVERTISEMENT
प्रतिक्रिया
पठाउनुहोस्
ADVERTISEMENT

नागरिक उड्डयन प्राधिकरण टुक्रिने

रासस

काठमाडौँ — मुलुकको हवाई सेवा क्षेत्र व्यवस्थापनको जिम्मेवारी पाएको नेपाल नागरिक उड्डयन प्राधिकरण (क्यान) लाई अब दुई स्वायत्त निकाय बनाइने भएको छ ।



वायुयान सञ्चालन नियमनकारी निकायका रुपमा रहेको हालको क्यानलाई नियमन गर्ने र पूर्वाधार विकास गर्ने छुट्टै निकाय बनाउने तयारी भएको छ । क्यानको यही पुस १६ गते सम्पन्न १९ औँ वार्षिकोत्सवका अवसरमा संस्कृति, पर्यटन तथा नागरिक उड्डयन मन्त्रालयका सचिव महेश्वर न्यौपानेले क्यानलाई थप व्यावसायिक र प्रभावकारी नियामक निकायका रुपमा अघि बढाउन भिन्न स्वायत्त निकाय बनाउन लागिएको जानकारी दिए ।

उन्नाइस वर्षअघि स्थापित क्यानले प्राधिकरण ऐन, २०५३ बमोजिम राज्यद्वारा प्रदत्त उडान र हवाई सुरक्षा, उड्डयन सञ्चार, परिवहन–निगरानी तथा विमानस्थल पूर्वाधार विकास, विस्तारका साथै जहाज परिवहन सेवा सञ्चालनको जिम्मेवारी बहन गर्दै आएको छ ।

“क्यानको संस्थागत व्यवसायीकरण र नियमनमा सुधार गर्ने कुरा पहिलादेखि उठेको विषय हो । अन्तर्राष्ट्रिय नागरिक उड्डयन संगठन (आइकाओ) को नीति र सिद्वान्तअनुसार नियमन गर्ने संस्थालाई थप व्यावसायिक र प्रभावकारी बनाउन खोजिएको हो, यसले थप व्यावसायिक, दक्ष जनशक्ति र उच्च प्रविधिमैत्री बनाउन सहयोग पुग्छ,” उनले भने ।

सचिव न्यौपानेका अनुसार क्यानलाई नयाँ विमानस्थल बनाउने र स्तरोन्नति गर्ने काम प्रभावकारी बनाउन केन्द्रित गर्ने छुट्टै संस्था बनाइने र वायुसेवा कम्पनीलाई प्रभावकारी अनुगमन र नियमन गर्ने अर्को संस्था बनाइने कार्यलाई पूर्णता दिनैपर्नेछ । क्यान कर्मचारी ट्रेड युनियनका प्रतिनिधि श्रवणकुमार यादवले क्यानलाई फुटाएर संस्था समाप्त गर्न खोजिएको हो कि भन्ने गुनासो सार्वजनिक कार्यक्रममै गरेपछि जवाफमा सचिव न्यौपानेले आइकाओको मापदण्डअनुसार काम अघि बढाउनैपर्ने भएकाले कर्मचारीको हितलाई ध्यानमा राखी संस्थालाई व्यावसायिक बनाउने उद्देश्यका साथ यसको विधेयक प्रक्रियालाई चाँडो अघि बढाउन क्यान पदाधिकारीलाई आग्रह गरे ।

प्रकाशित : पुस १८, २०७४ १४:३४
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT