डा. केसीको बयान सकियाे, सुनुवाई भाेलि

उनले अदालतमा दिएको बयानमा प्रधानन्यायाधीश पराजुलीले उमेर सच्याएर नागरिकता लिएको, उनको एसएलसी उत्तीर्ण सर्टिफिकेट नभेटिएको जस्ता विषय अनुसन्धान हुनुपर्ने बताएका छन् ।

प्रधानन्यायाधीश पराजुलीलाई पदबाट हटाउनु पर्ने माग राख्दै अनसन बसेका केसीलाई अदालतको अवहेलना मुद्दामा सोमबार प्रहरीले पक्राउ गरी आज अदालतमा पेस गरेको हो ।

दिउँसो २ बजेबाट सुरु भएको बयानमा केसीले दाबी गरेका छन्– प्रधानन्यायाधीश पराजुलीले अख्तियार दुरुपयोग अनुसन्धान आयोगका पूर्वप्रमुख लोकमानसिंह कार्कीको पक्षमा फैसला गरेलगत्तै आफ्ना भानिजलाई अख्तियारको कानुनी सल्लाहकारको रुपमा जागिर खुवाएका थिए ।

अदालतलाई बुझाइएकाे आफ्नो लिखित बयानमा केसीले प्रधानन्यायाधीश पराजुलीले जग्गा प्लटिङ गर्ने सरकारी नीतिविरुद्ध फैसला गरेको, कर तिर्न बाँकी भएको संस्थाको पक्षमा फैसला गरेको जस्ता विषयमा अनुसन्धान हुनुपर्ने माग राखेका छन् ।

केसीले बयान सकिएपछि पक्ष र विपक्षमा बहस सुरु भएको छ । न्यायाधीशद्वय ओमप्रकाश मिश्र र केदार चालिसेको इजलासमा केसीको मुद्दा बहस भएको थियो।

आज बयान सकिएको छ । मुद्दाको सुनुवाइ भोलि हुनेछ । उनी अझै थुनामा नै रहेका छन् ।