फोर्स कमाण्डर रहँदासम्मका लागि ‘स्थानीय रथी’
काठमाडौँ — सरकारले कंगोस्थित संयुक्त राष्ट्रसंघीय शान्ति मिसन ‘मोनुक’ मा ‘फोर्स कमाण्डर’ पदमा प्रतिस्पर्धाका लागि नेपाली सेनामा एक ‘स्थानिय रथी’ पद सिर्जना गरेको छ ।
राष्ट्रसंघले नेपाललाई कंगोको मनुकमा प्रतिस्पर्धा गर्ने अवसर दिएपछि मन्त्रिपरिषदको शुक्रबार बसेको बैठकले उपरथी गौरव तण्डुललाई स्थानीय रथीमा पदोन्नति गरी प्रतिस्पर्धा गर्न पठाउने निर्णय गरेको हो । नेपाली सेनामा रथी (तीन तारे जर्नेल) दुई जनामात्र रहेको र उनीहरू दुवैले त्यहाँ जान अनिच्छा देखाएपछि सरकारले उपरथी (दुईतारे जर्नेल) मध्येबाट एकलाई चयन गरी प्रतिस्पर्धामा पठाउन निर्णय गरेको हो ।
उक्त प्रतिस्पर्धामा सफल भएको खण्डमा उपरथी गौरब तण्डुल त्यहाँ रहदासम्म रथी हुनेछन् । कंगोमा फोर्स कमाण्डर रथी हुने अभ्यास छ । त्यसको लागि प्रधानसेनापति राजेन्द्र क्षत्रीले तण्डुलको नाम चयन गरेका कारण त्यसमा सशर्त बढुवा गरिएको नेपाली सेना उच्च स्रोतले बतायो । टण्डुल हाल पूर्वी पृतना इटहरीमा पृतनापतिका रुपमा कार्यरत छन् ।
नेपाली सेनाले शान्ति मिसनमा उच्च तहमा दाबी गर्दै आएकाले राष्ट्रसंघीय शान्ति मिसनले प्रतिस्पर्दाको अवसर दिएको हो । शान्ति मिसनमा गएका केही मुलुकलाई मात्र चयन गरेर त्यस्तो प्रतिस्पर्धामा अवसर दिइएको हो । नेपालबाट अहिलेसम्म पाँच जनाले मात्र फोर्स कमाण्डरको अवसर पाएका छन् । त्यसमा पछिल्लो फोर्स कमाण्डर सकेर आएका हुन वर्तमान रथी पुर्णचन्द्र थापा । गत साता दक्षिण सुडानमा फोर्स कमाण्डर पदमा यसअघिका प्रवक्ता सहायक रथी नयनराज दाहाल छनिएर गइसकेका छन् । उनी पनि प्रतिस्पर्धाबाट गएका हुन् ।
नेपालले शान्ति मिसनको उच्च पदमा दाबी गर्दै आएको छ । यसैबीच शुक्रबार बसेको मन्त्रिपरिषदको बैठकले सेनाका प्राविधिक महासेनानी गजेन्द्रराज शर्मालाई प्राविधिक सहायक रथीमा बढुवा गरेको छ ।
प्रकाशित : पुस २८, २०७४ १८:५७