२४.१२°C काठमाडौं
सल्यान — रुकुमबाट दाङको घोराही जाँदै गरेको ना ५ ख ५३१ नम्बरको यात्रुबाहक बस त्रिबेणी गाउँपालिकाको भान्टाखोलामा दुर्घटना हुँदा ४ यात्रुको मृत्यु भएको छ । दुर्घटनामा ३८ घाइते छन् ।
मृत्यु हुनेमा बाग्चौर नगरपालिका १० पिपलनेटाकी ७० वर्षीया छन्तरी बिक, रुकुम मुसिकोट नगरपालिकाकी पुष्पा खडका र रुकुम पेउघाका १७ वर्षीय खिमबहादुर खडका छन् ।
प्रहरीका अनुसार एक जनाको सनाखत भएको छैन ।
प्रहरी नायब उपरिक्षक भरतबहादुर बिकले तीब्र गतिका कारण पट्टा भाँचिएर अनियन्त्रित भई बस दुर्घटनामा परेको बताए । बस सडकबाट १ सय ५० मिटर खसेको थियो ।
घाइतेमध्ये रुकुम मुसिकोटका १८ वर्षीय विवेक हमाल, केदार केसी, ७ वर्षे अंकित केसी, बिमला रावत, रुकुम त्रिबेणीकी बिन्दु ओली, ६ वर्षका गौरव रावल, मदनकुमार ओली, आयुसी केसी, दाङ घोराहीकी धनसरा खडका, ढोडचौर गाउँपालिकाका डिल्लीराज लामीछाने, सीता कसेरा, उनकी छोरी अस्मिता, दार्मा गाउँपालिका १ का भद्रबहादुर केसी, त्रिबेणी गाउँपालिका ७ की दिपशिखा ओली गरी १४ जनालाई उपचारका लागि नेपालगन्ज रिफर गरिएको डीएसपी बिकले जानकारी दिए ।
उनका अनुसार सामान्य घाइतेको श्रीनगरस्थित कान्तिपुर सामुदायिक अस्पतालमा उपचार भइरहेको छ ।
चालकलाई इलाका प्रहरी कार्यालय, लुहामले नियन्त्रणमा लिएको छ । उक्त सडकमा केही वर्षअघि भएको बस दुर्घटनामा ४२ जनाको मृत्यु भएको थियो । घुम्ती र उकालो सडकमा तीव्र गतिले दुर्घटना हुने गरेको डीएसपी विकको भनाइ छ ।
प्रकाशित : माघ ८, २०७४ १५:२९
