एकताको विषयलाई अन्तिम रुप दिन एमाले-माओवादी असफल, भोलि पुन: बैठक

ललितपुरको मानभवनमा बसेको पार्टी एकता संयोजन समिति बैठक बिहीबार पुन: बस्ने गरी टुंगिएको माओवादी केन्द्रका नेता नारायणकाजी श्रेष्ठले जानकारी दिए । उनका अनुसार शीर्ष नेताले प्रस्तुत गरेको एजेन्डामा गम्भीर र सकारात्मक छलफल भएको छ । उनले भोलि थप छलफल गरेर अन्तिम रुप दिइने बताए ।

एकता संयोजन समितिको बैठक अघि एमाले अध्यक्ष केपी ओली र माओवादी केन्द्रका अध्यक्ष पुष्पकमल दाहालबीच छलफल भएको थियो ।

श्रेष्ठका अनुसार एकीकृत पार्टीको वैचारिक राजनीति विषय, संगठनात्मक संरचना र सरकार गठनलगायत विषय छलफल भएको थियो । निर्वाचन आयोगले राष्ट्रियसभाको सभानुपातिकतर्फको परिणाम राष्ट्रपतिसमक्ष बुझाएकोले नयाँ सरकार गठनको बाटो खुलेको छ । नेता श्रेष्ठले भोलिको बैठकमा सरकार गठनबारे पनि छलफल हुने जानकारी दिए ।

मानभवनमा रहेको शारदा अधिकारीको घरमा अपराह्न करिब ५ बजेदेखि संयोजन समिति बैठक बसेको थियो । एकीकृत पार्टी संयुक्त नेतृत्व प्रणालीमा अगाडि लैजानेमा दुवै पार्टीका नेताहरु करिब सहमत भइसकेका छन् ।

सरकार गठनअघि नै पार्टी एकता घोषणाको तयारीमा रहेका एमाले-माओवादीले बुधबार दिउँसो पनि आन्तरिक गृहकार्य गरेका थिए । एमाले स्थायी कमिटी बैठकले अध्यक्ष ओलीलाई भावी प्रधानमन्त्रीको उम्मेदवार बनाउने निर्णय गरेको थियो । साथै बैठकमा पार्टी एकताको प्रगतिबारे ओलीले ब्रिफिङ गरेका थिए । माओवादीको पनि केन्द्रीय कार्यालय बैठक बसेको थियो ।