यूएस-बंगला विमान दुर्घटना : मृतकको शव पहिचान हुन सकेन

यूएस यूएस बंगला विमान दुर्घटना
सुरज कुँवर

काठमाडौँ — अवतरणका क्रममा सोमबार त्रिभुवन विमानस्थलमा दुर्घटनामा परेको यूएस बंगला विमानमा ज्यान गुमाउने ४९ यात्रुको शव अझै पहिचान हुन सकेको छैन । सबै शव पोष्टमार्टमका लागि शिक्षण अस्पतालमा राखिएका छन् । त्यहाँका प्राध्यापक हरिहर वस्तीले बुधबार साँझसम्म २५ वटा शव हेसरसकिएको तर पहिचान गर्न नसकिएको बताए ।

‘पोकामा राखिएका शव जाँच गर्दैछौं। हेरेर पहिचान गर्न सकिने अवस्थामा शव छैनन्। एउटै शवलाई जाँच्न, मुचुल्का उठाउन दुई अढाई घन्टासम्म समय लागिरहेको छ,’ वरिष्ठ चिकित्सक वस्तीले कान्तिपुरसँग भने।

Yamaha

उनले अधिकांश शवको छालामात्र नभई हड्डीसम्म जलेको बताए। अनुहार वा बाहिरी संरचनाबाट पहिचान गर्न नसकिने भएपछि चिकित्सकहरुले दातको बनावट, फिलिङ्ग, आकार, शरिरका अंगमा लगाइएका गरगहना, अपांगता लगायतबाट पहिचान गर्न सक्छ। ‘यही तरिकाले एक हप्ता लाग्न सक्छ तर डिएनए परिक्षण नै गर्नुपर्ने अवस्था आइलागे एक महिनासम्म समय लाग्न सक्नेछ,’ फरेन्सीक विज्ञान विशेषज्ञ वस्तीले भने।

बंगलादेशको राजधानी ढाकाबाट ६७ जना यात्रु र चालक दलका चार सदस्यसहित ७१ जना सवार बोकेको क्यानेडियन बमबार्डियर डयास एट क्यू फोर हन्ड्रेड विमान दुर्घटनामा ४९ को मृत्यु भएको थियो। त्यसमा ३३ नेपाली, ३६ बंगलादेशी, एक/एक चिनियाँ र माल्दिभ्सका नागरिक थिए। घटनामा २२ जनाको उद्धार गरिएको थियो। उद्धार गरिएकामध्ये तीन जना उपचारपछि घर फर्केको प्रहरीका केन्द्रिय प्रवक्ता मनोज नेउपानेले बताए। ‘हालसम्म मृतकको संख्या ४९ हो। २२ जना अस्पतालमा भर्ना गरिएका थिए। यीमध्ये तीन जना उपचारपछि घर फर्किसकेका छन्,’ डिआइजी नेउपानेले भने। उनले शव हालसम्म आफन्तजनलाई नबुझाइएको बताए।

Esewa Pasal

प्रकाशित : फाल्गुन ३०, २०७४ २०:४६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

विवादित बन्दै जनप्रतिनिधि

कुम्भराज राई

ओखलढुंगा — जनप्रतिनिधिहरूले चुनावका बेला अनेक आश्वासन बाँडे । पूरा गर्न सकिने नसकिने सबै आश्वासन बाँडेका उनीहरूले चुनाव जित्न करोडौं खर्च पनि गरे । तर त्यत्रो खर्च गर्ने रकम कहाँबाट आयो भन्ने भने कसैले देखाएनन् ।

यही कारण निर्वाचित भएको केही महिनादेखि विवादमा आउन थालेका छन् । पहिलो गाउँसभा सम्पन्न भए लगत्तै अधिकांश जनप्रतिनिधि आफै डोजर व्यवसायमा संलग्न भए । कान्तिपुरमा समाचार प्रकाशित भएपछि उनीहरूको व्यापक आलोचना भयो ।

अधिकांशले आफ्नो संलग्नता नभएको भन्दै प्रत्यक्ष संलग्नतालाई ढाकछोप गरे । स्थानीय तहले गर्न सक्ने धेरै प्रमुख कामहरूलाई ओझेलमा राख्दै भौतिक विकासलाई प्राथमिकता दिएका छन् । तर त्यसभित्र अनियमितता हुन थालेको आरोप लाग्न थालिसकेको छ जसले गर्दा जनप्रतिनिधिहरू निर्वाचित भएको वर्ष दिन नपुग्दै बदनाम हुन थालेका छन् ।

यहाँको चम्पादेवी गाउँपालिकामा व्यापक भ्रष्टाचार भएको भन्दै केही दिनअघि जिल्ला प्रशासनमा उजुरी दर्ता भइसकेको छ । स्थानीयले फागुन २७ गते भ्रष्टाचार गरेको अभियोगमा उजुरी दर्ता गरेका छन् । आरोपीमा गाउँपालिका प्रमुख नवराज केसी, प्रमुख प्रशासकीय अधिकृत भीमप्रसाद दाहाल, लेखापाल मिलन लुइँटेल, इन्जिनियर नवीन श्रेष्ठ र पूर्वाधार विकास समिति संयोजक अजय लुइँटेल छन् ।

सोही उजुरी अख्तियार दुरुपयोग अनुसन्धान आयोगमा समेत दर्ता गराइसकेका छन् । उजुरीमा आव ०७३/७४ को गाउँपालिका सञ्चालन अनुदानको खर्च सार्वजनिक नगरेको, विभिन्न ४ वटा सडक आयोजनामा दोहोरो मूल्यांकन गरी भ्रष्टाचार गरेको, गाउँपालिकामा आवश्यक सामग्री तथा उपकरण सार्वजनिक खरिद ऐनविपरीत खरिद गरेको उल्लेख छ ।

त्यसैगरी सडक खन्ने काममा प्रयोग भएका स्काभेटरको दररेट निर्धारण नगरी लगत स्टिमेटभन्दा तलमाथि पारी भुक्तानी दिइएको आरोप छ । सडक निर्माण क्रममा विद्यालय भवन भत्काइएको र स्थानीय खोलामा गिट्टीबालुवा ठेक्का लगाउँदा किर्ते गरी स्वीकृत गरेको आरोप छ ।

गाउँपालिकाकै केही वडाअध्यक्षहरूले स्पष्ट रूपमा भ्रष्टाचार बढेको स्विकारेका छन् । त्यसको उचित छानबिन हुनुपर्ने उनीहरूको माग छ । वडा ७ का अध्यक्ष सुरेशकुमार थापाले भने, ‘स्पष्ट छानबिन हुनु जरुरी छ । अहिलेदेखि नै हामीले सचेत नगराउने हो भने थप भ्रष्टाचार मौलाउँदैन भन्न सकिन्न ।’

गिट्टीबालुवा उत्खनन तथा व्यापार अवैध तरिकाले भइरहेको भन्दै वडा ६ का अध्यक्ष तिलक कार्कीले ०७४ माघ २९ गते प्रहरीचौकी फूलबारीलाई रोक्न पत्राचार गरेका थिए । तत्कालीन फूलबारी गाविसका अध्यक्ष खड्गबहादुर कार्कीसहितका स्थानीयले ७ बुँदामा गाउँपालिका प्रमुखसहितका व्यक्तिले भ्रष्टाचार गरेको अभियोगमा उक्त ठेक्कामा समेत किर्ते गरेर भ्रष्टाचार गरेको अभियोग छ । गाउँपालिका प्रमुख नवराज केसी यसअघि पनि सेवाग्राही र कर्मचारी कुटेको विषयमा विवादमा तानिएका थिए ।

गाउँपालिकाका प्रमुख प्रशासकीय अधिकृत भीमप्रसाद दाहालले भने प्रक्रिया र नियम मिचेर काम नभएको दाबी गरेका छन् । कसैलाई व्यक्तिगत रूपमा चित्त नबुझेका कारण गलत आरोपसहित उजुरी दर्ता भएको हुन सक्ने दाहालले बताए । तर आफूलाई जनताले भोट दिएर जिताएको भन्दै जनप्रतिनिधिहरूमा मनोमानी निर्णय गर्ने प्रवृत्ति हावी हुँदै गएको छ । चुनावमा जनताको सेवा एक पैसा नलिई गर्छु भन्ने वडाअध्यक्षदेखि प्रमुखहरूसम्म अहिले गाडी, मोटरसाइकलजस्ता सुविधा लिनमा तँछाडमछाड गरिरहेका छन् ।

प्रकाशित : फाल्गुन ३०, २०७४ २०:२९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT