उखु किसानको मागबारे सरकार नबोलेकोमा सांसदहरुको असन्तुष्टि

सर्लाहीका किसानहरुले उखुको भुक्तानी नदिएको भन्दै हरिवनस्थित इन्दुशंकर चिनी उद्योगविरुद्ध आन्दोलन गर्दै आएका छन् । किसान चरणबद्ध आन्दोलनमा उत्रंदा पनि सरकारले कुनै धारणा सार्वजनिक नगरेकोमा सांसदहरुको आपत्ति थियो ।

‘उखु मिलले अहिलेसम्म किसानलाई भुक्तानी दिएको छैन । किसानहरु रिले अनसनमा बसेका छन् । आमरण अनसनमा बसेका छन्,’ एमाले सांसद बास्कोटाले भने, ‘यति हुँदा पनि सरकारको ध्यानाकर्षण भएको छैन । सरकारको जिम्मेवार तहबाट कुनै कुरा आएको छैन ।’

मुलुकमा कृषि यान्त्रिकरण, कृषि बजारीकरण र कृषि विकासको कुरा गरिरहेको सरकारले किसानलाई राहत दिने कुरामा ध्यान नदिएको भन्दै बास्कोटाले तत्काल उखु किसानका माग पूरा गर्न आग्रह गरे ।

कांग्रेस सांसद राधेश्याम अधिकारीले किसानको लगानी सुरक्षा हुन नसकेको भन्दै सर्लाहीको चिनी उद्योगबाट किसानको ब्याजसमेत असुल गर्नुपर्ने धारणा राखे । ‘किसानले उत्पादनको मूल्य पाउदैनन् भने लगानी सुरक्षण कसरी हुन्छ ?,’ अधिकारीको प्रश्न थियो, ‘मैले यति बेचे भने यति पैसा पाउँछु भन्ने थाहा हुँदा हुँदै पनि किसानले मुल्य पाएको छैनन् । संघर्ष गर्नुपरेको छ । सरकारले केही गरेको छैन । वाचा गरेको रकम उद्योगले दिंदैन भने ब्याजसमेत जोडेर सरकारले असुल गरिदिनुपर्छ ।’

अधिकारीले उखु किसानका मागबारे सरकारको धारणा सदनलाई जानकारी दिनुपर्ने माग राखे ।