पहिरो प्रकोप सेन्टर स्थापनाबारे ऊर्जामन्त्रीले गरे छलफल
काठमाडौँ — ऊर्जा, जलस्रोत तथा सिँचाइमन्त्री बर्षमान पुनले पहिरो प्रकोप सेन्टर स्थापनाबारे छलफल सुरु गरेका छन् ।
मन्त्री पुनले शुक्रबार नेपाल-जापान मैत्रिपुर्ण जलजन्य प्रकोप न्युनिकरण संघ(एनएफएडी) का महासचिव टोसीओ मोरीसँग नेपालको पहिरो नियन्त्रण र विपत् व्यवस्थापनका विषयमा छलफल गरेका उनका प्रेस संयोजक रोशन खड्काले जानकारी दिए ।
ऊर्जामन्त्री पुनले जापान र नेपालको बीचमा लामो समयदेखि मैत्रिपूर्ण सम्बन्ध रहेको भन्दै नेपालको विकासमा जापानले निस्वार्थ गरेको सहयोगको प्रशंसा गरे ।
महासचिव मोरीले पहिरो आउनुभन्दा पहिले जानकारी दिने प्रविधि भित्राउनुपर्नेमा जोड दिए । पहिरो नियन्त्रणका लागी सहयोग गर्न आफूहरु तयार रहेको भन्दै त्यसका लागि पहिरो प्रकोप सेन्टर स्थापना गर्न मन्त्री पुनलाई सुझाव दिए ।
मन्त्री पुनले सम्बन्धीत निकायसँग छलफल गरेर छिट्टै सरकारले निर्णय गर्ने बताए ।
प्रकाशित : चैत्र ३०, २०७४ १७:३४