अपहरण शैलीमा चार नेपालीलाई भारतमा दश घण्टा बन्धक
बर्दिया — भारत उत्तरप्रदेश राज्य बहराईच जिल्ला मोतीपुर थाना अन्तर्गत वन तस्करले रुख काटेर नेपालीलाई बेचेको भन्दै किनमेल गर्न गएका चार सर्वसाधरणलाई वनका दरोगा(असई)ले कुटपिट गर्दै बन्धक बनाएका छन् । नेपाली सुरक्षा अधिकारीको अथक प्रयासपछि उनीहरुलाई करिब दश घण्टा पछि मुक्त गरिएको छ ।
सीमावर्ती मिरकिया वन चौकीका दरोगा(असई) अविनाश तिवारीले नेपाली सुरक्षाकर्मीलाई सीमावर्ती बढैयाताल गाउँपालिका स्थित वीर बहादुर नेपालीको घरमा पुराएको काठ फिर्ता गर्न दबाब दिएका थिए । त्यसो नगरिए नियन्त्रणमा लिएका सर्वसाधरण विरुद्ध वन मुद्दा लगाई बहराईच कारागार चलान गर्ने दबाब दिँदै दश घण्टा बन्धक बनाएका हुन । काठ फिर्ता नभएको भन्दै दरोगा तिवारीले भारतीय बजार बलैगाउँ किनमेल गर्न अटो रिक्सा लिई जान लागेका चार सर्वसाधरणलाई अपहरण शैलीमा दुर्व्यवहार गर्दे वन चौकी पुर्याएका थिए ।
बढैयाताल जमुनीस्थित नेपाल प्रहरी र सशस्त्र प्रहरीका ईन्चार्जले पक्राउ गरिएका सर्वसाधरणलाई बिहीबार राति ९ बजे हिरासतबाट मुक्त गराएको ईलाका प्रहरी कार्यालय मैनापोखरका प्रहरी निरीक्षक देवेन्द्र मल्लले बताए । भारतीय वन अधिकारीले सीमावार किनमेल गर्न गएका सर्वसाधरण नेपाली नागरिकलाई अपहरण शैलीमा बार्गेनिङ्ग गरेकोमा सीमावर्ती गाउँका बासिन्दा आतंकित भएका छन् ।
प्रकाशित : वैशाख १४, २०७५ १४:०३