यातायात व्यवसायी महासंघका महासचिव सिटौला काठमाडौंबाट पक्राउ

नेपाल प्रहरीको सिंहदरबारको टोलीले सिटौलालाई पत्रकार सम्मेलन गर्न क्लबमा पुगेको समयमा त्यहीबाट पक्राउ गरेको हो । पक्राउ परेसँगै उनले छोटो प्रतिक्रिया दिँदै राज्य व्यवसायी विरुद्ध चरम दमनमा उत्रिएको बताएका छन् । ‘हामीलाई सरकारले गरेको निर्णय विरोध गर्न पाउने अधिकार छ,’ उनले भने, ‘विरोध गर्न पनि नदिने गरी सरकारले दमन सुरु गरको छ ।’

गृहमन्त्री रामबहादुर थापाले सिन्डिकेटका पक्षधर यातायात व्यवसायीलाई पक्राउ गर्न आदेश दिएसँगै देशका विभिन्न भागबाट विभिन्न समिति तथा यातायात व्यवसायी महासंघका प्रतिनिधिहरुलाई प्रहरीले पक्राउ गर्न सुरु गरेको छ ।

सिन्डिकेटको कायम राख्न दबाब दिँदै यातायात व्यवसायीहरुले शुक्रबारदेखि देशभरका सार्वजनिक यातायात सेवा ठप्प पारेका छन् ।