सुन तस्करी प्रकरण: २७ अभियुक्तको बयान सकियो

विनोद भण्डारी, माधव घिमिरे

विराटनगर — सुन तस्करी र सनम शाक्य हत्या मुद्दाका २७ जना अभियुक्तको बयान सकिएको छ । जिल्ला अदालत मोरङमा जारी बयान प्रक्रियामा सोमबार उच्च प्रहरी अधिकृतको पनि बयान लिइएको छ ।

जिल्ला न्यायाधीश नारायणप्रसाद शर्माको रोहबरमा पूर्व डिआइजी गोविन्द निरौला, निलम्बित प्रहरी उपरीक्षक विकासराज खनाल, सइ बालकृष्ण सञ्जेल, हवल्दार अमरबहादुर थापा र जवान विष्णुबहादुर खड्काको बयान लिइएको हो ।

Yamaha


यसैगरी विमानस्थलका कर्मचारीहरु राजन थापा, पुण्य लामा, गोपाल श्रेष्ठ, हेमन्त गौचन, राजु महर्जन, अमरमान डंगोल, तुलाराम थारूको पनि सोमबारै बयान लिइएको छ । प्रहरी नियन्त्रणमा रहेका ३० अभियुक्तमध्ये बहालवाला प्रहरी वरिष्ठ उपरीक्षक दिवेश लोहनी, डिएसपीद्वय प्रजीत केसी र सञ्जय राउतको बयान लिन बाँकी छ ।

यसअघि राजन कुमार, टेकराज मल्ल ठकुरी, माधव भन्ने मदनप्रसाद घिमिरे, मोहन काफ्ले, लाक्पा शेर्पा र कृष्ण भन्ने नरेन्द्र कार्कीका छन् । त्यसैगरी व्यापारी भुजुङ गुरुङ, राजेन्द्रकुमार शाक्य र महावीर गोल्यान, विमानस्थलका कर्मचारीहरु लालबहादुर मगर, वीरेन्द्रमान श्रेष्ठ, दोराम खत्री, कपिलराज पुरी र बालकृष्ण श्रेष्ठको बयान लिइएको थियो ।

बयान दिने विमानस्थलका कर्मचारीहरुले सुन आएकोबारे आफूहरुलाई केही थाहा नभएको बताएका छन् । आफूहरुले कार्यालयको कर्मचारीका हैसियतमा पूरा गर्नुपर्ने जिम्मेवारी मात्र निर्वाह गरेको उनीहरुको भनाइ थियो । प्रहरीले अभियोगपत्रसाथ प्रस्तुत गरेको बयानलाई उनीहरुले अदालतसमक्ष इन्कार गरेका छन् ।

मंगलबार एसएसपी लोहनी र डिएसपीद्वय केसी र राउतको बयान लिइने भएको छ । साढे ३३ किलो सुन तस्करी र सनम शाक्यको हत्या मुद्दामा प्रहरीले कूल ६३ जनाविरुद्ध मुद्दा दायर गरेको थियो ।

न्यायिक हिरासतमा रहेका सबै ३० जनाको बयान मंगलबार सकिंदैछ । अदालतले बिहीबारदेखि बयान लिन सुरु गरेको थियो ।

प्रकाशित : वैशाख २४, २०७५ १८:२३
प्रतिक्रिया
पठाउनुहोस्

जलमार्ग, रेलमार्ग र कृषिमा साझेदारी गर्ने सम्झौतामा हस्ताक्षर हुन्छ : परराष्ट्रमन्त्री ज्ञवाली

अजित तिवारी, सन्तोष सिंह

जनकपुर — भारतीय प्रधानमन्त्री नरेन्द्र मोदीको दुई दिने नेपाल भ्रमणका क्रममा जलमार्ग, रेलमार्ग र कृषिमा साझेदारी गर्ने सम्झौतामा हस्ताक्षर हुने परराष्ट्रमन्त्री प्रदीप ज्ञवालीले बताएका छन् ।उनले बैशाख २८ गतेदेखि नेपालको राजकीय भ्रमण गर्दै छन् ।  

भारतीय प्रधानमन्त्री मोदीको नागरिक अभिनन्दन गरिने जनकपुरको रंगभूमि मैदान निरीक्षण गर्दै परराष्ट्रमन्त्री प्रदिप ज्ञवाली । तस्बिर : सन्तोष सिंह/कान्तिपुर ।

‘प्रधानमन्त्री ओलीको भारत भ्रमणको क्रममा भएका केही घोषणाहरु छन्,’ मन्त्री ज्ञवालीले भने, ‘ती घोषणालाई समझदारी र सम्झौतामा रुपान्तरण गरिनेछ ।’ प्रधानमन्त्री केपी शर्मा ओलीको चैत अन्तिम साता गरेको भारत भ्रमणका क्रममा भारतीय समकक्षीसंगको संयुक्त पत्रकार सम्मेलनमा रेलमार्ग, जलमार्ग र कृषिमा साझेदारी घोषणा गरिएको थियो ।

भारतबाट सिधैं जनकपुर अवतरण गर्ने मोदी काठमाडौं फर्किएपछि दुबै देशका प्रधानमन्त्रीले नेतृत्व गरेको प्रतिनिधि मण्डलबीच औपचारिक वार्ता हुनेछ । ‘वार्तामा अस्ति भर्खर प्रधानमन्त्री ओलीले भारत भ्रमणको क्रममा भएका घोषणालाई सम्झौतामा रुपान्तरित गरिनेछ,’ परराष्ट्रमन्त्री ज्ञवालीले सञ्चारकर्मीहरुसित कुरा गर्दै भने, ‘वार्तामा विगतमा भएका सहमतिहरुको प्रभावकारी कार्यान्वयनमा पनि जोड दिइनेछ ।’

चैत २३ गते भारतको तीन दिवसीय राजकीय भ्रमण गरेका प्रधानमन्त्री ओली र उनका समकक्षी भारतीय प्रधानमन्त्री मोदीबीच जलमार्ग, रेलमार्ग र कृषिमा साझेदारी गर्ने महत्वपूर्ण समझदारी भएको थियो । रक्सौल–काठमाण्डौं जोड्ने रेलमार्ग विस्तारमा सहमति भएपनि दुबै देशबीच हस्ताक्षर हुन बाँकी छ । परराष्ट्रमन्त्री ज्ञवालीले मोदी नेपाल भ्रमणका आएकै दिन काठमाडौंमा तीनवटै सहमति भएका योजनामा हस्ताक्षर हुने बताए ।

‘भ्रमणलाई ऐतिहासिक र सफल बनाउन तथा दुई देशबीचको सम्बन्धलाई उचाईमा पुर्‍याउन केही ठोस सम्झदारीहरुमा हस्ताक्षर हुनेछ,’ मन्त्री ज्ञवालीले भने, ‘मोदीजीको भ्रमणको क्रममा जनकपुरको विकाससंग जोडिएको योजनामा पनि दुबै देशबीच सम्झदारी हुनेछ । हामीले त्यसको गृहकार्य गरिरहेका छौं ।’

जनकपुरलाई अयोध्यासंग जोड्ने रामायण सर्किटको भने जनकपुरमै दुबै देशका प्रधानमन्त्रीले उद्घाटन गर्ने छन् । रामायण सर्किटको उद्घाटन गर्न प्रधानमन्त्री ओली पनि भारतीय प्रधानमन्त्री मोदी जनकपुर अवतरण गर्ने समयमै यहाँ आइपुग्ने कार्यक्रम छ । जानकी मन्दिर परिसरमा दुबै देशका प्रधानमन्त्रीले रामायण सर्किटको उद्घाटन गर्ने मन्त्री ज्ञवालीले जानकारी दिए । रामायण सर्किटसंगै जोडिएको जनकपुर–अयोध्या बस सेवाको पनि दुबै प्रधानमन्त्रीले हरियो झन्डा देखाएर शुभारम्भ गर्नेछन् ।

प्रकाशित : वैशाख २४, २०७५ १८:१७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT