फोटो बन्यो उद्धारकाे कडी

२० दिनअघि भारत पुर्‍याइएकी किशोरीलाई फर्काइयो
फकाएर लैजाने प्रहरी नियन्त्रणमा
माधव घिमिरे

विराटनगर — २० दिनअघि बेपत्ता भएकी मोरङ, रंगेलीकी एक किशोरीलाई एउटा फोटोको आधारमा खोजी गर्दै जाँदा भारतको गाजियाबादमा भेटेर उद्धार गरिएको छ । घरबाट सम्पर्कविहीन बनेपछि अनेक खोजी गर्दा पनि फेला नपरेकी उनलाई उद्धारकर्ता संस्थाको टोलीले फेला पारेको थियो ।

तस्बिर:  भारतबाट किशोरीले ‘इमो’ मार्फत् पठाएको फोटो । गाजियावाद, महाराजपुरको यही फोटोको माध्यमले स्थान पत्ता लगाएर उनको उद्धार गरिएको थियो ।

भारतीय प्रहरीको समेत सहयोगमा उनलाई बुधबार विराटनगर ल्याइएको छ । एकोहोरो टोलाइरहने अनि कसैले केही सोध्दा झस्कने गरेकी किशोरीलाई उपचार र परामर्शपछि अभिभावकको जिम्मा लगाइने भएको छ । केही दिन माइती नेपालमा राखेर उपचार र परामर्श दिइने लागिएको हो । किशोरीलाई माइती नेपालको जिम्मा लगाइएको छ ।

Yamaha


फकाएर लैजाने पुरुषलाई भारतबाटै ल्याएर बुधबार सुनसरी, इटहरीस्थित इलाका प्रहरीको जिम्मा लगाइएको थियो । जिल्ला प्रहरी कार्यालय मोरङले उनलाई झिकाएर उजुरी दर्ता गरी अनुसन्धान र कारबाही प्रक्रिया सुरू गरेको छ ।

सुनसरीमा रहेको संस्था रिलिफ नेपाल फाउन्डेसनका प्रतिनिधिले विपन्न सरदार समुदायकी १४ वर्षीया ती किशोरीको उद्धार गरेर फर्काएका हुन् । संस्थाकी अध्यक्ष रबिना खातुनका अनुसार वैशाख ७ गते गाउँनजिक लागेको मेलामा गएका बेला भारतको बिहार घर भएका मुजफ्फर मियाँले भगाएका थिए ।

३५ वर्षीय उनी केही महिनायता रंगेलीस्थित ससुरालीमा बस्दै आएका थिए । दुई श्रीमती र चारवटा छोराका बाबु मियाँले आफूले बिहे गर्ने र भारतका ठूला सहर घुमाइदिने भन्दै फकाएर लगेका थिए । ८ कक्षा पढ्दै गरेकी छोरी एकाएक सम्पर्कविहीन बनेपछि आमा र आफन्तले खोजी गरेका थिए । किशोरीका बुबा रोजगारीका लागि मलेसियामा छन् ।

त्यसैबेला रंगेलीस्थित प्रहरी कार्यालयमा खोजीका लागि निवेदन पनि दिइएको थियो । पछि बुझ्दै जाँदा मियाँले भारत लिएर गएको थाहा पाएपछि किशोरीका आमा र आफन्त उद्धारकर्ता संस्थाको सम्पर्कमा पुगेका थिए ।

किशोरीलाई गाजियावादको महाराजपुरस्थित ‘कोठी’ मा राखिएको उनैले पठाएको फोटोका माध्यमले पत्ता लागेको थियो । सुरुका केही दिन मियाँले आफूसँगै राखेको किशोरीले बताएकी छन् ।

मियाँ बाहिर निस्केका बेला उनको फोनबाट किशोरीले आमा र आफ्ना ठूलोबुबालाई सम्पर्क गरी आफूलाई घर फर्काउन भन्दै रुने गरेका थिइन् । ‘बेला बेला फोन आउँथ्यो’ किशोरीकी आमाले भनिन्, ‘मलाई घर लैजाउ भन्थी तर कुन ठाउँमा हो भन्ने उसैलाई पनि थाहा थिएन ।’

यसबीच, किशोरीका आफन्तले आफू बसेको स्थानको फोटो मोबाइलमार्फत् पठाउन किशोरीलाई भनेका थिए । मियाँ बाहिर गएको मौका पारेर किशोरीले ‘इमो’ मार्फत् आफू बसेको स्थानबाट अगाडि देखिएको बजारको फोटो खिचेर पठाएकी थिइन् ।

‘रिहान स्टोर’ लगायत केही पसल र तिनको नामअंकित साइनबोर्ड देखिने उक्त फोटो आफन्तले उद्धारकर्ता संस्थाकी अध्यक्ष खातुनलाई दिए । त्यसपछि खातुनले भारतको नोइडामा रहेका आफ्ना साथी आइटी इन्जिनियर वसिम अक्रमलाई पठाएर ठाउँ पत्ता लगाइदिन अनुरोध गरिन् । वसिमले फोटोमा देखिएको एउटा पसलको टेलिफोन नम्बरका आधारमा ठाउँ पत्ता लगाए ।

र, चाँडै उक्त स्थानमा गएर उद्धार गरिहाल्न सुझाव दिए । ‘यो ठाउँ यौनजन्य गतिविधिका कारण बदनाम छ’ अक्रमको भनाई उद्धृत गर्दै खातुनले भनिन्, ‘तुरुन्तै आएर घर फर्काइहाल्नुस् ।’

उनकै सुझावका आधारमा संस्थाकी अध्यक्ष खातुन संस्थाका रितेन्द्र चौधरी, अर्जुन चौधरी, नसरुद्दिन हुसेन र किशोरीका ठूलो बुबासहित महाराजपुर पुगेकी थिइन् । बैशाख २४ गते किशोरीलाई भेटेर भारतीय प्रहरीको सहयोगमा उद्धार गरिएको थियो । मियाँलाई भारतीय प्रहरीले पक्राउ गरेर जिम्मा लगाएको थियो ।

उद्धारको काममा भारतीय प्रहरी र त्यहाँ रहेका आफ्ना साथीभाइले निकै सहयोग गरेको उनले बताइन् । ‘२ लाख ६५ हजार रुपैयाँ भारुमा किनबेचको कुरा छिनोफानो भइसकेको रहेछ’ खातुनले भनिन्, ‘एक दिनमात्र ढिलो पुगेको भए उनलाई फेला पार्न नसकिने रहेछ ।’

Esewa Pasal

प्रकाशित : वैशाख २७, २०७५ १९:०५
ADVERTISEMENT
प्रतिक्रिया
पठाउनुहोस्

विश्व बैंकद्वारा २७ अर्ब सहयोग

रासस

काठमाडौँ — विश्व बैंकले वित्तीय तथा सार्वजनिक वित्त व्यवस्थापन विकास नीति र रानी जमरा कलरिया सिँचाइ परियोजना कार्यान्वयन गर्न रु २७ अर्ब ६५ करोड सहुलियतपूर्ण ऋण सहयोग उपलब्ध गराउने भएको छ ।

अर्थ मन्त्रालयमा बिहीबार आयोजित एक कार्यक्रममा विश्व बैंकका देशीय निर्देशक चिमाओ फ्यान र अर्थ मन्त्रालयका सचिव राजन खनालले सो ऋण सहयोग सम्बन्धी सम्झौतापत्रमा हस्ताक्षर गरे। उक्त रकमको आधाभन्दा बढी भाग बजेटरी सहायता र बाँकी रकम सिँचाइ परियोजनामा उपयोग गरिनेछ।

आगामी फागुन अन्त्यसम्म उक्त सम्झौता लागू हुनेछ। रानी जमारा (दोस्रो चरण) सिँचाइ आयोजना भने आगामी पाँच वर्षसम्म जारी रहनेछ। हस्ताक्षर समारोहमा सचिव खनालले नेपालको सामाजिक तथा आर्थिक सहयोगमा विश्व बंैकबाट निरन्तर सहयोग प्राप्त भएकामा आभार प्रकट गरे।

देशी निर्देशक चिमाओले संघीयतामा भर्खरै प्रवेश गरेको नेपालका वित्तीय आवश्यकता पूरा गर्न बैंकले उक्त सहायता प्रदान गरेको बताए।

प्रकाशित : वैशाख २७, २०७५ १८:४९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT